【攝影．電單車】要威，一齊戴頭盔

有幾多人曾經講過：「幾多歲前我要買第一架ＸＸ車。」
我話，25歲前要玩盡佢。
夢想，係開一間電單車同攝影做主題嘅糖水鋪。

23歲，我買咗人生第一架電單車—— Suzuki SV650。

嗰時錢唔多，仲要問銀行借兩皮嘢先買到，感性慾望驅使我去做一個電單車友，令人生有不能忘記嘅兩年。

呢兩年間，識咗一班好開心嘅電單車友，有一段極難忘嘅經歷，電影情節仲發生咗喺我身上，因為電單車，識咗個女仔，佢叫做「老婆」。

好多人都認為，揸電單車溝死女啦，如你有咁嘅諗法，真係睇亞視太多。

喺電單車界入面，車痴佔一部份，其餘全部都係有毒嘅。要有女仔坐你車尾，一係你架車型，一係你個人型，一係條女同你一樣咁毒，先有機會坐上你車尾。

如果有一個咁樣嘅女仔出現喺你生命入面，恭喜你，女神來了。

一架車嘅性能，基本上出廠已經設定好，只要每次出車，有啲傻傻哋嘅女仔加入，每部車都會合法地提升30匹，公路變賽道，單線變雙線，MotoGP 可直播上身。

做車手，只需畀油，但要車尾員入座，先要揸得一手好車，平穩有序，令佢可以安心享受電單車嘅樂趣。

好多人都係唔俾屋企知揸電單車，甚至無俾人知考咗電單車牌。人就係咁，偷偷摸摸就最好玩。

你唔可以當電單車係老婆，佢係「情人」，係每個星期六晚同你去偷情嘅好拍擋。

騎住佢就好似初號機同碇真嗣，期望每次同步率達到100%。

每次出車，如果真・老婆或者女友會呷醋的話，咁代表你同架電單車係真心相愛，劉華都阻唔到你，去啦！做一個世人尊敬嘅九叔。

出得嚟玩，身邊會有好多唔同背景嘅車友，佢哋嚟自 Yamaha, Suzuki, Honda, Kawazaki 等各大品牌，因為兩個轆聚埋一齊，要威，一齊戴頭盔。

最初出車唔會認得邊個打邊個，但從倒後鏡嘅頭燈，同埋前面嘅屎忽，你會逐個逐個記住佢哋，同佢哋發展真感情，熟悉身邊嘅引擎聲，記住每個代表性嘅頭盔。

蔡楓華都講過，一剎那光輝唔代表永恒，你會遇過車友炒車，車友賣車，有聚有散。識少少影相嘅我，有機會為佢哋愛驅留下一個個倩影，希望有一日，會喺我哋嘅糖水鋪出現。

【編按：相片由作者提供。】

（本文純屬作者意見，不代表香港01立場。）