曬舊相不求人　搵返老豆嘅青春

幾年前，大伯過身，老豆執拾舊物件之餘，將數件「紀念品」交俾我。
有金粒、K金手錶，仲有一包舊相底。

當時佢叫我問下相鋪可唔可以將啲相晒出嚟，我聽完就算。

到結咗婚生埋兩個女，都一直放喺書枱深處。

今日，到我清理書枱舊物件，又見返呢包舊相底。

幾張膠片，年紀應該比我仲大，超過 30 年，膠片已經同紙包裝合而為一，膠片有少許溶，因為從來都未打開過，好奇心令我好想睇吓係乜嘢相。

一件極具紀念價值嘅家庭文物，再小心，都要拆爛少少包裝，先可以將佢哋拎晒出嚟。

對燈抬頭一睇，見到個反白影，似係我老豆。

當時腦袋燈泡一著，不如拎部手機出嚟影張相，然後睇下執唔執得返個反白出嚟，咁就睇得清楚。

反正，以前都係黑白相啫。

一打開手機 app，已經有一個 default 反白功能，可以將相底完全變返成正常嘅相。

我見到老豆。

諗諗下，原來從小至今，我從未見過佢年青時嘅樣貌，連張相都無，一時間，我搵返老豆嘅青春，有種考古學家發現文物嘅感覺。

我好奇，到底，我同佢有幾多分相似？

以前嘅佢同而家最唔同嘅，係棚牙，而家嘅假牙整齊得多，但睇張相入面嘅佢，棚牙似乎唔多整齊，令我覺得個樣都有啲唔同。

見返佢以前嘅外貌，係另一種感覺。

另一張係我哥哥，相比起現時贏在ＸＸ前嘅小朋友，張相顯得佢特別蠢，反白前仲以為係我自己。

但見到佢，我諗，影呢批相嗰時我都未出世。

又或者，其中一張，係老豆以前用嚟「相睇」用。

【編按：相片由作者提供。】

（本文純屬作者意見，不代表香港01立場。）