【影評．自殺特攻】個個都係蝙蝠俠捉返嚟，唔搵蝙蝠俠幫手就算？
班罪犯不過是人，即使係好揪少少，也是人……部份成員都由蝙蝠俠生擒回來，電影多番重覆該位鷹派政客與蝙蝠俠有密切聯絡，頂，咁你唔搵蝙蝠俠幫手就算？
如果，你要用一個很客觀很現實的角度去評價《自殺特攻：超能暴隊》（Suicide Squad），一定得個嬲字。幾個罪犯，本來被囚禁在重裝監獄，對社會的威脅就最細。為應付接近有神一般能力的敵人，鷹派政客將他們釋放，組成一支特種部隊，為國家出力。喂，班罪犯不過是人，即使係好揪少少，也是人。像Will Smith扮演的Deadshot，只是槍法百發百中；小丑女更離譜，特異功能只不過是發神經，而且擺明一出監就會畀強勁的小丑拯救，點會明知山有虎偏向虎山行？雖然，我都知，如果套電影連Margot Robbie都無埋，更大鑊。
放走一批不受控的罪犯，然後夾硬加個納米炸彈在各人頭內，意圖讓政府作為最後手段去操控大局。你話個個罪犯也像隨意可以放火的El Diablo，殺傷力驚人，或者，還說得通點解政府要千辛萬苦搵一班罪犯去保衛地球。其實，都唔通，因為部分成員都由蝙蝠俠生擒回來，電影多番重覆該位鷹派政客與蝙蝠俠有密切聯絡，頂，咁你唔搵蝙蝠俠幫手就算？
政府無規矩 暴隊未見暴
所以，我才不會運用理性。我只是覺得浪費。點解要在《蝙蝠俠對超人：正義曙光》（Batman V Superman：Dawn of Justice）上畫同一年便出街呢？點解唔等到《正義聯盟》（Justice League）後，眾角色已有基本交代，甚至有交流，才好似改邪歸正？現在，其實連閃電俠都未正式在電影版登場，Captain Boomerang就已經搶先一步。根本無人知佢之前有幾邪。又係心急累事。無感情呀，華納的高層們，究竟知唔知感情是要累積回來的，一見鍾情畢竟可遇不可求。這個角度，是感性。
到結局打大佬，是意料之內的草草收場。看《自殺特攻：超能暴隊》，最大功用，是自我安慰一下，美國政府其實跟香港政府一樣，當要達成某種目的時，同樣不擇手段，完全視規矩律法如無物。而香港的所謂暴隊，又跟美國的暴隊一樣，去到最後，個個都善良到不得了，一點暴也見不到，根本聽教聽話守規則。個政府先係暴。
（本文純屬作者意見，不代表香港01立場。）