【樂評．鄭秀文演唱會】凡人演出　超人意志　不完美中的完美

每次唱到真係唱唔到，Sammi都係眉頭猛皺，用盡力揸實拳頭同揮臂，睇到大家都戥佢好痛苦…唔記得由邊一首歌開始，全場觀眾一齊大聲合唱，大家都化身做Sammi嘅和音，陪佢行埋呢段艱難嘅路…一首又一首嘅首本名曲，就算歌者唱唔到上喉嚨，聽眾都已經聽咗入心坎。

近年要在香港成功買到演唱會飛，難度之高，可能僅次於上車買樓，其中有幾位歌手更加係特別難，本地代表有陳奕迅、外地嘅有五月天同周杰倫，至於女歌手，近年難買之最，如無意外一定係鄭秀文（Sammi）。

千呼萬喚之下，Sammi嘅世界巡迴演唱會「TOUCH MI 2」昨晚正式開鑼，場內當然針都插唔入，場外甚至有人即場重金收飛，至於演唱會本身，四個字：「慘」不忍睹，可能係歷史上第一個完全唔想睇Encore嘅演唱會。

喉嚨發炎　自嘲走音歌后

稍為留意娛樂新聞，都可能會知道Sammi一開場已經聲沙沙。唔係一般開騷初段未開到聲，之後慢慢漸入佳境嘅聲沙沙，而係連講嘢都瘋狂走音，全晚好多歌、好多音，基本上都唱唔到、上唔到，見到明明好似唱緊，實際上又未必聽到，事關佢開騷前突然發病，咳得極之厲害，喉嚨都發晒炎。

入場之前已經知道呢個消息，一直都幾擔心，唔係緊張「嘩，搶到頭崩額裂先買到飛，要聽『走音歌后』（Sammi嘅自嘲用語）唱足成晚？」，而係關心「開騷先病，失聲仲要死頂，佢嘅演唱會仲要通常都係『奧運式』，永遠要將自己推去極限，會唔會捱唔住？」

或者有人覺得：「喂，你做得演藝事業，收晒歌酬賣晒飛，要唱要跳就基本啦，聲沙沙走晒音仲要人可憐？」，當然，呢種都係一種睇法，如果你係咁諗，篇文睇到呢度其實可以停低，因為大家價值觀唔同，對人嘅基本態度亦唔一樣，唔想晒你時間。

世界巡迴尾站　TOUCH MI 2並非翻炒製作

講番個演唱會，今次其實係2014年「TOUCH MI」世界巡迴嘅尾站，Sammi自己講，自己去過好多唔同地方開騷，始終好想返黎香港做最後一站，咁點解明明係同一個世界巡迴，今次個名又加個「2」，變成「TOUCH MI 2」？原因係佢唔想只係照做一個同上次一模一樣嘅演唱會，於是決定要做一個新嘅製作。

無論係髮型、化妝、服飾、舞台、燈光，以至演唱會最重要嘅部分——歌曲，今次都同上次有好大分別，由選曲、編曲到Rundown，基本上八成以上都係新嘅；例如一開場，第一首已經係新歌《FABULOUS》：「新開始，忙着我要維持有個性的事；別呆住，離群是洩氣人群最正確醫治」。

自從有咗信仰，除咗搣甩極臭脾氣，Sammi另一個明顯轉變，就係方方面面都好似散發住一股正能量，佢嘅歌就尤其明顯，好似《FABULOUS》，「We make it fabulous…We gonna make it fabulous」前前後後唱成廿幾三十次，兜口兜面鼓勵大家，人人都可以做得更多、做得更好，而在交代病況之後，佢都同樣承諾大家：「同以前一樣，無論點樣都好，我會做到最好，有幾多做幾多！」

嘉賓蕭煌奇　感受到Sammi的美麗

講得出，果然做得到，一開場頭兩Part，7首歌入面，6首都係快歌，勁歌熱舞少不免，當時都抹一抹汗，即刻問問身邊朋友：「嘩，一開場就咁盡，一陣仲唱唔唱到落去呢……」，其中第二Part主要關於兩性議題，上一次演唱會都有，不過正如上面所講，已經轉咗新歌、排過新舞，雖然聲音沙啞，不過絲毫無損佢嘅壓台感。

呢邊都未擔心完，嗰邊已經出「意外」——第一個嘉賓出場，咁早？即刻聽到隔離觀眾靜雞雞話：「自己唱唔到，多幾個嘉賓唱多幾首都ok嘅」，Sammi之後話之前聽到一首好鍾意嘅歌，明查暗訪搵到幕後嘅創作人，而佢就係《沒那麼簡單》嘅台灣作曲人蕭煌奇，其實今次都唔係Sammi第一次在演唱會唱自己好欣賞嘅別人的歌，上一次就有林奕匡嘅《高山低谷》。

一如所有嘉賓環節，Sammi先同蕭煌奇在台上閒聊咗一陣，當時佢都已經近乎爛聲，蕭煌奇講咗一句「Sammi姐你好美麗」，須知道蕭煌奇本身係失明人士，佢嘅「美麗」唔會係話Sammi嘅外貌同造型，而佢之後都話自己係「感受到」，原本可能只係尋常不過嘅一番寒暄，當時就唔覺意觸動咗自己嘅無限聯想：「帶住病都照堅持，失埋聲都無Hea做，呢種自我燃燒，其實都真係好美麗。」

全場大合唱　化身和音支持

The Show Must Go On，Sammi之後繼續唱、繼續跳，中間不時自嘲，例如話之前好多人問佢到底「TOUCH MI」同「TOUCH MI 2」有咩唔同，佢就笑住話今晚係會Keep住走音，對上一次都唔係咁；笑當然可以講，但係表面嘅歡樂，既紓緩唔到喉嚨嘅痛，亦遮掩唔到內心嘅苦，每次唱到真係唱唔到，Sammi都係眉頭猛皺，用盡力揸實拳頭同揮臂，睇到大家都戥佢好痛苦。

「如何掉眼淚，欲哭找不到根據，這愛情沒你准許，笑我沒有這資格，別為你心碎」，唔記得由邊一首歌開始，全場觀眾一齊大聲合唱，大家都化身做Sammi嘅和音，陪佢行埋呢段艱難嘅路，「原來上次哭，哭不出眼淚，感情不進則退，感激我們成熟了，應知道流淚有罪，承受任何是非都能捱下去，我都想假裝只得一歲，為你當街的出走也說得過去」。

演唱會至此真係「情感會更加真摯，連呼吸也不可以」（《最後一次》），Sammi更加係「猶如堤缺後沒法停止」（《最後一次》），由《心血來潮》嘅「你當我那夜突然正陷入最低潮，應該笑而沒法笑，才想對你哭一秒」，到《默契》嘅「由始至終，只有你一位，難以代替，愛得多仔細」，一首又一首嘅首本名曲，就算歌者唱唔到上喉嚨，聽眾都已經聽咗入心坎。

一路聽，一路聽，期間有同身邊朋友講笑咁講，Sammi每唱完一首歌，大家感覺都好似見證咗又一項壯舉；直到尾聲，佢唱唱下《不要驚動愛情》，或者因為身體真係非常之唔舒服，更多應該係對自己嘅失望同責備，Sammi再一次爆喊，更加多次同觀眾講「對唔住」，萬人和音即刻唱得更加大聲，台上台下，一時充滿淚水，當下赫然發現，「對唔住」三個字，原來可以咁重。

病魔搵你，大家都唔會想，大家都唔會有力阻止，或者就同Sammi開場講嘅一樣，狀態好又好、狀態差又好，歌者歌迷都係一齊經歷、一齊分享；不能否認嘅係，「TOUCH MI 2」始終都係演唱會，唔係佈道會，「唱」嘅部份係好重要，全晚瑕疵真係好多，無論你咩標準，Sammi都係唔合格嘅。

以事論事的確係咁，不過以人論人嘅話，Sammi已經搏盡無悔，就算眼前條件再差，佢都保持堅毅精神，一步一步克服困難，展現出超人嘅意志；講到底，Sammi，大家當然好想睇到你嘅現場演出，不過其實更想睇到你健康、快樂，睇完頭場真係非常痛心，記得多多休息，如果連超人意志都頂唔住，不妨勇敢咁俾自己叫一下停。

（本文純屬作者意見，不代表香港01立場。）