又係佢哋？從台慶劇看大台演員斷層原因

一年容易又台慶，無綫台慶月隨住10月17晚嘅亮燈儀式而揭幕，三齣台慶劇對我嚟講唔係全部都吸引，不過鹹魚青菜各有所愛，無咩討論空間。
之但係台慶節目今年所用嘅人，就反映出無綫培養自己藝員乏力嘅現象。男藝員嘅演藝生命通常長啲，所以仲未出事，不過女藝員方面就已經有災難feel。

台慶劇一直係指標，除咗睇到大台「出行力」可以畀啲咩出嚟，亦都係睇邊個上位、上緊位嘅好機會。三齣台慶劇女主角：《致命復活》萬綺雯、《幕後玩家》黃翠如、《來自喵喵星的妳》胡定欣加田蕊妮，四個女一，只有胡定欣一個係大台由零開始培訓、選《TVB周刊》COVER GIRL開始一步步慢慢上。（其實我覺得《鬼同你OT》同埋《來自喵喵星的妳》嘅女主角都係阿田，係大台夾硬話胡定欣都係女主角）其他都係由亞視、有線轉會過嚟，到底發生咗啲咩事呢？

無綫出身藝員　成名離巢賺人仔

睇返無綫自家培育女演員嘅模式，大部分都係由藝員訓練班同埋選美活動，例如港姐、華姐當中去搵人。藝訓班同學仔通常要捱十年八年，慢慢培訓先有機會上到女一，最佳人版就係楊怡；而選美當中拎到名銜嘅，就有機會坐火箭直升做第二女主角，甚至係女一，最近期嘅例子就有陳凱琳同蔡思貝。

之不過選美活動年年搞，藝訓班呢幾年都搞得幾密，但點解無晒「根正苗紅」嘅藝員去做女主角呢？我認為有兩個原因：第一，藝員返咗大陸搵人仔，尤其是拎咗視后之後，叫價高咗，一返大陸就好少返嚟香港拍劇。你睇吓之前大台為鄧萃雯度身訂做劇本都請佢唔郁就知。

不過我覺得以下所講嘅第二點影響大啲。

杜之克余詠珊用人唯親　「前朝餘孽​」難上位

近年有自己固定班底嘅資深監製好似係Tommy哥梁家樹、添哥掃街茂李添勝、處境劇之王徐遇安，都紛紛退休或者做咗顧問退下火線，呢班有一定地位同牙力嘅監製，杜之克同余詠珊呢兩位好朋友都應該會畀吓面。宜家佢哋走咗，勢力失衡，新上位嘅監製要用咩人，我估都要聽唔少意見。余小姐同杜先生要用自己人，就比以前更加容易。

當然以上嘅嘢都係我斷估啦，但係客觀事實就夾晒我呢個推斷。一班大台自己培養嘅當紮一線阿哥阿姐，好似黃宗澤咁，就一年先返嚟拍一兩部劇，有啲就好似胡杏兒、楊怡、林峯咁，直頭唔理你自己出去或者返大陸搵機會。而宜家谷緊上位嘅，就係陳凱琳、蔡思貝、黃翠如、李佳芯。佢哋係余小姐嘅有線舊將或者係余黨喺大台當權後先出現嘅人。睇返成件事，咁我以上嘅推斷都合理啫。

時間無得返轉頭，有啲嘢真係天時地利人和。亞視臨終前已經無製作劇集，大台接收嘅一班亞視一線女演員，好似係萬綺雯、田蕊妮、陳煒，就剛剛好可以喺呢個時間填補咗缺口，喺一線位頂住，做女一女二，再等下想谷嘅人可唔可以順利上位。最慘係「半前朝餘孽」好似係胡定欣、黃智雯呢啲要保住或者衝上一線，就真係要自求多福喇。

大局為重　應摒除門戶之見

戴返個頭盔先。我一直都覺得有能者居之，無論係自己由零培育出嚟嘅，抑或係中途轉會嘅，我都唔抗拒，甚至覺得唔同演員合作有唔同花火仲好。不過當你無人嘅時候，就應該摒除門戶之見，或者逐步嚟唔好一刀切。就算想捧嘅演員係有潛質實力，觀眾隔一兩齣劇又見到佢哋嘅話，都仍然係會曝光過度而死。你睇吓陳凱琳同蔡思貝，一開始都幾好，但見得太多，大家就開始鬧佢哋，有反效果。黃翠如依家就識得休息下，台慶劇先放返出嚟，咁做就襟玩啲。

（本文純屬作者意見，不代表香港01立場。）