【影評．3X反恐暴族：重火力回歸】有齊成龍賀歲片特色

Vin Diesel 在電影中，已到達一種超越物理學和生物學的高度。你叫他跟狼人、鐵甲奇俠或者超人對打，我懷疑都可以旗鼓相當。

人人也懷念雙周一成賀歲片，我不明白，為何排《生化危機：終極屍殺》（Resident Evil: The Final Chapter）去賀歲檔，也不將《3X 反恐暴族：重火力回歸》（xXx: The Return of Xander Cage）押後一週，尤其明明已經無人敢再將成龍新片放在重要檔期。難道派堆喪屍去派利是或恭喜發財，會比傳統的動作賀歲片吉利一點？

大佬呀，《重火力回歸》有齊成龍式賀歲片特點：

  第一，誇張。
Vin Diesel 在電影中，已到達一種超越物理學和生物學的高度，舉個例，由半空墮下，一齊跌落地面的木箱，已經變成粉碎，他的血肉之軀，不單絲毫無損，甚至還可以企到直一直的繼續步行。你叫他跟狼人、鐵甲奇俠或者超人對打，我懷疑都可以旗鼓相當。

  第二，重情。
誇張是向 Vin Diesel 食糊之作《狂野時速》（Fast ＆ Furious）系列學習，抄埋入面更重要的兄弟情元素，那種做得團隊成員，點都會互撐的盲目，根本是福星片。只是，沒有前設沒有鋪排，角色性格全部平面到極，還刻意強調當中有深厚感情，真係好勉強好勉強。就似梁振英大大聲話同曾俊華係好兄弟，你不會被感動，只會想嘔吐。

  第三，情節簡單。
真係好耐無睇過情節簡單得咁強勁的荷李活電影。強勁武器話咁易被盜，政府和軍方也手足無措，唔知點解，Vin Diesel 話咁易，搞搞女，立即追查到下落。打幾場交，好輕易便尋回失物。勁就勁在簡單到暈的情節，你都可以隨便數到十幾廿個不合理的地方。我認為係專登嘅。

因為，電影已開宗明義，講明終極目標只係拍幾場動作鏡頭，加幾位打扮性感的索女，最緊要打得有型有款。我不會天真到走去深究劇情。

最緊要有型，究竟，型唔型？咁，要視乎你如何界定有型。如果，一個傻佬駕駛汽車亂撞會被當成是萬中無一的才能，係有型，呢套戲好有型。如果，兩個持槍女人，用吳宇森式慢動作，一路轉圈一路掃射，而子彈不斷在身邊穿過，兩個女人還可以慢條斯理企在路中心等運到，你還覺得有型，呢套戲好有型。如果，你看到八、九十年港產片常見的表達方法，即係人物一登場，畫面靜止，在好大個頭的側邊出現一堆文字，例如：誠實豆沙包或者慚愧波板糖，你都仲真心地覺得好有型，唔使講嘢，呢套戲，你唔睇係你損失。一套西片，有福星片元素，有周星馳元素，有吳宇森元素，仲有親切感十足的甄子丹，你真係去邊度搵呀？

（文章純屬作者意見，不代表香港01立場。）