【春嬌救志明．影評】未必人人有勇氣做春嬌

《志明與春嬌》系列最好睇嘅，並唔止係「成世人流流長，總會愛上幾個人渣」，而係成世人流流長，你總會做過志明（春嬌），或者遇過春嬌（志明）呢位親密伴侶，就係呢一下撻著觀眾，睇到你入心入肺。

好耐無試過有港產片系列拍到第三集，而令人值得期待。上一套係懸疑警匪片《無間道》，可惜爛尾收場，打爛自己招牌。

覺得《小男人周記》頭兩集好睇嘅觀眾，大部份已經五六十歲，但佢地未必有意欲入場支持呢部角色面目全非嘅經典喜劇。

對支持者嚟講，Do Do姐飾演嘅阿Ann拒絕演出，已經再無賣點，即係如果《志明與春嬌》二十年後拍第四集，但套戲講春嬌死Q左，志明傷心一輪後搵到個後生女同佢終老，你會唔會再買飛睇？

【編按：以下內容或含劇透，逃生門在此。】

唔想「被劇透」可以去睇返小弟嘅《男人，唔可以做死一世觀音兵》或《鄭中基：那個曾令人討厭至極，現在又深得民心的富二代》止下癮先。

唔知係唔係要同即將上映嘅《29+1》對撼，《春嬌救志明》今集明顯要突出春嬌同佢班中女BFFs嘅戲份，希望深刻描寫春嬌嘅中女內心世界，反而志明智囊團團長李公公（司徒慧焯飾）及團員德哥（谷德超飾）戲份比預期少，叫人失望。

體壇女神歐鎧淳客串嘅路人索女，完全滿足到中佬唔想做觀音兵、仲要畀後生女反溝嘅願望；陳靜飾演嘅「好X可疑呀呢個可兒」本來喺劇情有好大發揮優勢，不過可惜預告片中陳靜一班姊妹同志明老友House Party嘅場面被cut走，令人失望。

（大佬呀，作為男人，好想睇班中佬同班搭訕識嘅後生女House Party，點可能Cut走呀？）

劇中最唔合理嘅角色，肯肯定非志明青梅竹馬好友「契媽」莫屬。成日都話，要打開大陸市場，用大陸演員真係無咩所謂，但最緊要擺啱位。春嬌咸濕老豆嘅後生老婆搵大陸演員王曉晨飾演非常恰當。臨老入花叢，搵個樣靚身材正嘅女人，只有北方佳麗或台妹先可以符合條件，再串啲可以搵烏克蘭妹去演出。

相信好多男觀眾仍然對第二集志明索爆空姐女友（楊冪飾）嘅視覺享受念念不忘，所以彭浩翔今集搵左有樣有身材嘅蔣夢婕頂上，都好合理。

不過志明明明係香港人，點解青梅竹馬一句廣東話都唔識？OK，加拿大嘅竹升妹唔需要識廣東話，至少識講幾句英文掛？搵「X啲竹升妹真係好麻煩」嘅薛凱琪做呢個角色會唔會適合啲？（得啦，我知薛凱琪已經35歲同埋無波嘛。）

彭導安排「契媽」係一個後生妹其實幾好笑，不過奇怪在志明一直唔同春嬌解釋「契媽」係後生辣妹？然後契媽契仔又突然間以兄妹相稱？咁點解唔一開始定位係「契妹」？須知道女人最忌男人身邊有個契妹，對女人嚟講，總覺得男人契妹契上床是常識吧；今日未上，時辰未到姐。（但又奇怪好多女人收兵時又要契人做契哥）

蔣夢婕已經好搏，又睡衣look又真空look，用「點」擊破一班咸濕仔。不過由於「契媽」同志明一齊坐摩天輪嘅甜蜜場面被Cut，加上劇本set咗志明對「契媽」只係兄妹情，從來無起痰，令兩人對手戲略嫌火花不足。

如果劇中加插一段志明同春嬌同居再無火花，經常以工作忙同攰而拒絕起機，咁就精彩啦。當志明見到索到爆嘅蔣夢婕真空look通屋走之後，即刻成個男人返晒嚟，狠狠地餵飽春嬌，而事後被春嬌發現咗，原來引起志明性慾係另有其人，會唔會比用胸懷大「痣」呢個爛gag，更發揮「契媽」喺劇中作用？

又或者當志明同春嬌遇上分手危機時，「契媽」承人之危向志明投懷送抱，相信更切合邪花入宅嘅主題，呢家有少少違反商品說明條例囉。

講返兩位主角，春嬌為呢段八年嘅姊弟戀，放棄咗好多好多，包括一個同居幾年、管得好嚴嘅前男友家豪（黃德斌飾）、中途過客大陸土豪Sam（徐崢飾）、駐北京化妝品店長個份高薪厚職，而志明呢？老老實實，喺愈來愈功利、女性單身更精彩嘅年代，未必人人有勇氣做春嬌，或者咁講，何必為一個男人，改變自己同放棄太多？

志明有幾衰？

志明一直未有為兩人打算，竟然豪晒九萬五買一件所謂必買嘅潮物藝術品，都無打算儲首期。
無諗過認真求婚同結婚目的，是是旦旦過TVB。
「契媽」暫住兩個人嘅愛巢，不過志明竟然無同春嬌備案，係太無警覺性定貪方便？

當然，志明嘅優點都好殺食。

願意細心同花時間教春嬌媽用Facebook，為春嬌阿爸阿媽做柴可夫司機，夠孝順！
廣告公司青年才俊，前途無限！
身邊好多野花埋身，不過志明從來無動搖unbelievable！

一對情侶拍拖八年，對對方嘅熟悉程度好比真正夫妻，然而步入婚姻前嘅愛情同真正婚姻生活，係兩碼子嘅事；往往摧毀兩人關係，可能係旁人眼中嘅芝麻綠豆小事。

或者借用志明劇中一句：

唔想因爲無做過或有做過嘅事，而令呢段感情有所遺憾。

（本文純屬作者意見，不代表香港01立場。）