【港姐2017．博評】冠軍選得好　讓普天下父母參考的教女人辦

要徹底寵壞你的女兒，即是把她寵到一個無可挽救的地步，光是送她一屋名牌手袋也不夠，你還必須為她爭取一頂選美后冠。

當然，寵壞不是一朝一夕的事。

如果你從小便教她何為禮義廉恥，在內培養她「冬則溫夏則清」的孝節，在外訓練她「汎愛眾宜親仁」的禮數，就算長大後給她一頂選美后冠，她也只會謙虛地彎著腰接受萬人鼓掌，而不會智障地在自己的社交帳戶 hashtag「我就是冠軍」。

小時候有家教，大個女做港姐便可發揚香港精神，像麥明詩一樣，成為女性新典範。

小時候沒家教，大個女再給她一頂后冠，結果怎樣？你便會成為香港地的一個人辦，一個港孩的極致完型。

很多家裏稍為有幾個錢的所謂富二代畢業後的自我價值很低，因為他們還是牙牙學語的時候，已經是萬千寵愛要風得風，想得到什麼只要說一聲便可，甚至乎連說也不用說，只是搬出一副悶悶不樂的表情，父母便能猜出他們的心思。

溫室中養著的小花走出溫室，做父母的更是變本加厲。回到學校，老師改錯卷，扣錯分，父母著晒燈，第二天立刻帶女兒走入教員室跟老師理論，原因是女兒沒有勇氣跟老師當面求正。父母覺得小女孩可憐，怕她有童年陰影，於是出手相救，為女兒出頭，誰不知就是親手斷送了一個讓小孩學習為自己爭取的機會，以及教曉她原來只要有父母撐腰，老師都可以當臭四。

Ok，老師改錯卷點講都係老師唔啱，就當道理真係喺你嗰邊，咁參加比賽呢？五個學生參加一個比賽，冠亞季都冇你個女份，你純粹講一句

其實你已經好叻因為你唔夠經驗

已經好足夠，點知你要帶埋個女走入後台同評判理論。

評判先生，你知唔知咁樣好傷佢自尊心？你哋搞個比賽係咪就係要鼓勵一個小朋友，定係令佢唔開心？

評判怕咗你，臨時整番個「最有創意獎」頒畀你個女，你覺得你個女會點？佢會開心咩？佢仲難受。

大學畢業生的自我價值低，因為在家裏那頂由父母加冕的光環，於投身社會的一刻便一下子掉了下來。點解我住緊舊山頂道讀完 Imperial College 要幫你呢個申請緊居屋嘅理工大學third honor副經理影印文件？

如果我三十幾歲嗰陣仲係好似你咁只係一個副經理，我真係寧願死咗佢。

富二代覺得自己大材小用，所以滿肚牢騷，狗眼看人低。佢哋冇諗過，如果唔係投胎投得好，唔好話居屋，三十幾歲嗰陣連劏房都未必住得起。

這屆選美冠軍選得好，讓普天下父母可以看著一個人辦教仔教女。

要寵壞你個女好簡單，只要教佢四個字就得，就係「不自量力」。

要教好你個女都唔難，如果你見到佢不自量力，就即刻閂埋房門鬧醒佢。

明嘅，掌上明珠，鬧嗰陣一定心痛。不過等佢丟晒香港人嘅假，畀八百萬人逐巴逐巴摑落嚟，你就會知道乜嘢係真正嘅痛。

（本文純屬作者意見，不代表香港01立場。）