【的士眾生相】為入女拔，怪獸媽媽逼女兒放棄了什麼

師傅麻煩你，先去接我個女先，然後去荃灣。

啱啱上車嘅女乘客講。兩站無問題，問題係你都要同我講去邊接你個女㗎……好多時都有乘客講話去醫院、去酒樓，可惜讀心術嘅技能，仲未有司機掌握得到。再一次問明準確地點之後，就出發去接人哋個女了。

我望望個鐘，都五點幾，問一問人哋呀媽：

咁遲先放學呀？

媽媽揮一揮手，好似撥走唔存在嘅蚊咁，輕輕鬆鬆咁答我：

放咗學好耐啦，去上興趣班啫，一陣你行獅子山嗰邊經大圍去城門隧道吖，咁樣快啲。

由源順圍咁樣行去城隧？遠就肯定遠咗，會唔會快咗真係好難講，但係乘客主動提供路線，咁就最理想啦。

趕住返屋企食飯呢？

唔係呀，趕住去上小提琴。

原來小朋友嘅興趣班仲未完，真係好多興趣。

去到目的地等咗唔夠三分鐘，小女孩已經現身，孭住好似裝咗籃球咁脹嘅書包，仲要拎住兩個不織布袋，拎一手仲抽住小提琴盒，分分鐘去旅行比返學更少嘢要帶。

一上車，小女孩已經語帶興奮咁同媽媽講話今日派咗作文，仲話進步到八十幾分。我以為「進步」已經好值得鼓勵，不過媽媽唔係咁諗：

八十幾分唔夠考女拔喎，你寫咗啲咩？比媽媽睇吓。

小女孩嘅興奮稍微減退，快手拎出作文比媽媽睇。

呢啲作文邊駛特登放入file呀，啲通告就亂咁塞。

媽媽嘅語氣本來唔太嚴厲，一秒之後我以為火山爆發：

澳洲？我講過呢啲題目要寫啲係人都知但係又特別嘅嘢㗎啦，點解唔寫威尼斯呀，咁我哋上次做咩要去呀？

小女孩上車時嘅興奮已經一掃而光，語帶哭音咁解釋，話威尼斯去過，老師話想佢哋寫啲未去過嘅地方喎。

老師話老師話，老師話無用㗎，有無分先？分數先重要呀。你去過咪話未去過囉，你寫歌劇院呢啲係人都諗到嘅，唔會高分㗎。

聽得出媽媽盡可能壓低心頭嘅怒意，然而嗰種恨鐵不成鋼嘅焦急，真係點壓都壓唔到。

你就考呈分試喇，唔可以任性㗎，知唔知？我哋學咁多嘢為咗咩呀？

入女拔。

咁先叻女㗎嘛，我哋點解要學小提琴呀？

入女拔。

簡簡單單嘅三個字，真係蘊含住無比嘅力量，就係因為呢三個字，本來已經無趣嘅作文要更加無趣，寫作時最大嘅考量唔係內容與文筆，而係分數同分數。功利主義延伸到小學，每一個興趣班都係一塊拼圖，去拼貼小朋友的人生，儘管多姿多彩，不過被社會嘅期望急促旋轉，再豐富嘅顏色都只會變為白色。

去到目的地附近，出出入入嘅都係小朋友，個個都孭住幾個袋，仲有啲抽住大畫板，有啲掛住網球拍，忽發奇想，成個商場都係啲興趣班、補習班，有無啲班係教家長點幫子女規劃燦爛人生呢？希望唔係個個小朋友都要出淚拔萃地成長吧……

（文章純屬作者意見，不代表香港01立場。）