【的士眾生相】小朋友興趣班要學術又要開心　一班都不能少

九龍灣的下班人眾，就好似一條條混濁嘅污水咁，沿住行人路默默而不規則咁向地鐵站流動。狹窄嘅行人路迫住過多嘅人，總有一兩個特別攰或唔舒服嘅人脫隊而出，轉乘的士。

登車嘅女子放低膊頭上嘅手袋，講低先去沙田再去馬鞍山之後，就除咗對高跟鞋。坐喺司機位嘅我當然睇唔到黑絲包裹嘅嬌小腳掌，只是淡然傳來嘅臭味刺激腦部聯想。「老公呀，我搭緊的士入嚟，係呀對腳好攰呀，無辦法啦，你等埋我先走啦。好快。」

呢句好快足足用咗二十五分鐘，男人一上車就大聲抱怨，又怪搭的士貴又怪要佢等得耐，不過最後一句

唔緊要啦，必要就需要。對腳係咪無咁痛喇。

就出賣咗佢關心老婆嘅本質，只是口裏說不。

「咁點呀，報唔報埋奧數班好？」男乘客關心完第一最愛，就關心埋第二最愛嘅問題。

我諗過喇，一係停咗芭蕾舞先，等佢上下奧數睇下有無機會攞獎牌先？

「定係Cut lego班？芭蕾舞班佢停咗好難pick up返。」

總括佢哋重覆又重覆嘅對話，我都覺得好難揀。芭蕾舞班老師話小朋友有天份最好繼續上，Lego係難得唯一有得玩嘅，其他會話班、非洲鼓班等等，一係同學術有關，一係「個仔玩得好開心」，總之一班都不能少。「咁不如調游水個時間啦，反正游水實轉到班。」女乘客給出睿智嘅答案，男乘客完美補位：「都好嘅，我都唔想佢cut lego，咁好玩。」究竟兩位父母加班嘅時間長啲，定個小朋友上班嘅時間長啲？

「一於咁啦，星期六上咗奧數先上芭蕾舞，游水就調去星期四囉。你睇咩呀？又唔幫手。」女乘客嗔怪男乘客，聽住媽媽級嘅女人咁少女式嘅撒嬌，硬係有一種違和感，原來同自己咁上下年紀嘅男女，都已經為人父母喇。

「我緊睇Jay share篇嘢，佢哋實笑我哋直升機啦。」男乘客將手機遞俾女乘客，女乘客無接：

無童年嗰篇？我睇咗啦，佢個女咪又係上咁多班，不過谷晒落中英文啫，個個都話自己唔做怪獸㗎啦，一到中學interview，個個細路都係乜都識。

竟然係咁？我都奇怪而家上網個個都識叫人還小朋友一個童年，個個都話唔做怪獸家長，但就培養到小朋友勁過怪獸。

我知呀，Jay不嬲都嚴人寬己㗎啦。必要就需要嘅嘢佢識條鐵，唔通等升中學先嚟後悔咩，畀個哈哈先。

男乘客呢頭串完Jay，呢頭順手畀個心情，掩飾真實嘅意願。

「着返對鞋喇，對腳仲痛唔痛？聽日唔好着喇。」男乘客似乎已習慣惡臭，亦唔介懷車資，只係在乎太太嘅腳痛。

「靚吖嘛。着着下慣咗就無咁痛，最多搭多一兩次的士。」

外在結果重要過內在痛楚嘅哲學，無疑係呢對夫婦嘅座右銘，由自己到子女都貫徹呢個理念。

乘客落車之後，我旋即熄冷氣，要吹走車廂入面我適應咗唔覺嘅臭氣。必要就需要呢句說話真係好啱，問題係過度嘅競爭又係咪必要呢？

（本文純屬作者意見，不代表香港01立場。）