【Google 2017排名.博評】我城核心價值,七分娛樂三分炒賣

撰文:李聲揚
出版:更新:

細細個好鍾意睇電視嘅年度大事回顧,仲要分本地國際金融體育(有冇娛樂?),報紙嘅回顧專欄亦係必睇,甚至儲起一份得閒拎返出嚟睇。而家電視少人睇,紙媒又末日,但唔緊要,我地有新一代嘅神:Google大神

大神剛剛出咗2017年度香港「熱爆關鍵字」,又睇下反映到啲乜?呢個「熱爆關鍵字」嘅前身,有個好有型嘅名,叫做Google Zeitgeist。 Zeitgeist係德文,唔易譯,所以Google先用返德文原文。Zeit係時間/時代,Geist係靈魂/精神。Zeitgeist就係「時代精神」,或「時代思潮」。形象化少少,想像下聽日忽然肥仔金或侵侵唔生性,核戰後人類文明滅亡,第時外星人考古睇返人類文明,可能就睇下Google Zeitgeist,估下你哋係點生活——應該仲會發現人類進食係要經過電話影相先放入口的。

亦都留意,Google有解釋呢個榜點嚟。「熱門關鍵字」未必係搜尋最多嘅嘢,而係類似「最佳進步獎」,係2017年網流量明顯比2016年多嘅字。所以年年都熱門嘅嘢,反而未必上到榜。

先睇今年香港十大,結論好明顯:我城嘅核心價值,七分娛樂,三分炒賣。儘管成日有人講This city is dying,香港最黑暗嘅一天,但香港人照樣馬照跑舞照跳,最緊要係娛樂,同炒賣搵快錢。當然你鍾意嘅可以話香港人幾時都咁重視法治誠信之類(下刪一萬字),所以唔會忽然熱門。反正我信了。

(資料圖片)

你睇十大熱門關鍵字,七個係電視劇。更堪玩味嘅係,一套韓劇一套香港網劇之外,五套都係TVB劇。喂,又話罷睇又話CCTVB嘅?又話傳統媒體玩完?咁當然,亦可能根本睇劇嘅人少,更加多係唔睇但又怕冇話題,Google完就扮睇咗。但話時話,Viu台套《短暫的婚姻》好似都幾多人講,但冇入十大喎。係我啲朋友不代表全香港?定其實大把人睇TVB(或至少Google劇情)不過唔敢出聲呢?唔好笑,侵侵當選以及脫歐公投時一樣係咁:侵侵以及脫歐既支持度,遠比「民調」顯示為高。不過支持侵侵同脫歐政治不正確,唔好意思同人講咁解。

剩番三個關鍵字,iPhone 8同iPhone X,仲有「易鑫」。共通點?你懂的。段估唔係因為大家對科技產品好有興趣,或者想去大陸網站買車賣車上車會。有趣嘅係,明明冇咁好炒嘅iPhone 8,排名高過iPhone X。可能因為早啲出世?又或者年初大家未知部機會叫乜,想當然就以為係iPhone 8同iPhone 8 plus。

Viu台套《短暫的婚姻》好似都幾多人講,但冇入十大喎。(《短暫的婚姻》截圖)
+3

另外,「新經濟三寶」三隻新股(閱文,雷蛇,易鑫)之中,易鑫唔係最多人抽嘅一隻,亦唔係超額倍數最多嘅一隻。咁點解得佢上到榜?相信因為佢最遲上市,熱潮已煲起,最多人關注。

講句公道話,唔同國家用嘅分類或者算法未必一樣,網民習慣亦唔一樣,互聯網滲透率亦唔同。所以本人無意拎香港同台灣或邊度比,去「證明」香港人特別唔關心國際大事之類。要比,就同自己比,比較下香港個榜,今年同之前幾年有乜唔同。小弟整理咗過去四年(2014-2017)嘅熱爆關鍵字,睇到十個趨勢:

2014—2017熱爆關鍵字(作者提供)

1.之前三年都有電影上榜,全部係外國電影。2014有《Interstellar》, 2015有《Minions》同《我的少女時代》, 2016有《你的名字》。去到2017欠奉。港產片就當然從來冇出現過,說好了的香港人好支持港片呢?

2.反而香港流行曲有出現過,2015年嘅《羅生門》(段估唔係套戲或篇小說)。當然亦可能因為好多人唔知歌名點解。

3.明明iPhone唔係最多人用,大把人話貴,Android粉(特別係三叔嘅「叔粉」)攻擊不遺餘力。但iPhone年年都上榜,今年上夠兩部。原因也是你懂的。

4.之前三年你見到HKTV同ViuTV上榜,今年亦消失。原因不明,可能已經人人知道,唔使再搵,或者只係新屎坑三日香,無以為繼。

5.TVB真係爛船有三斤釘,每年都有劇上榜。甚至2015年杜如風上榜都九成關TVB事。

6.韓風沒法檔,除左TVB劇,上到榜嘅,就只有韓劇。冇美劇同日劇。上到榜嘅名人亦唔多唔少同韓國有關,下一條講。

7.人物其實好少上榜,強如侵侵都冇,因為你要某一年人氣明顯比上一年高先得。上榜嘅人物就只有金秀賢,同埋杜如風。前者當然係因為《來自星星的你》,後者當然係因為TVB嘅《流行首爾》同《東京攻略》。

(《羅生門》MV截圖)
iPhone唔係最多人用,但iPhone年年都上榜。(資料圖片)

8.雙數年份,足球賽事必定上榜,但2016奧運反而冇。 

9.唔計足球賽事,四年入面,上榜嘅「國際大事」,就只得兩單。一單係2014年馬航,一年兩單空難,MH370更加到而家都唔知去咗邊。第二單就係美國大選。英國脫歐冇上榜,話香港人係港英餘孽嘅不妨留意下。

10.咁多年以嚟,同買樓相關嘅東西都上唔到榜,或者真係上唔到車搵都慳返。同樣地,其實股市相關嘅都好少上榜,直到今年嘅易鑫——呢個當然可以理解,你睇下之前幾年股市表現就知。

金秀賢因為《來自星星的你》「都教授」而成為亞洲男神。(網上圖片)
+7
(本文純屬作者意見,不代表香港01立場。)