可以倚老賣老，就係因為有貨賣

點解你仲係坐唔到佢個位？個個老細傻的？市場唔呃人，你話你有熱血有衝勁，但市場就話你知路數人脈見識經驗，往往更加值錢。

又係小故事開始，都係真人真事，唔知主角會唔會睇到，你識得佢嘅記住畀佢睇。

早排，讀精算的師兄，在Facebook傳咗段文畀我。係某初入職場嘅師弟寫，講想棄精拎教鞭，作育英才，決定由TA（教學助理）做起。我等花生友，萍水相逢，佢識我老鼠，其實人哋生命真係唔關我事。打咗一大段嘢，最後都冇回佢。但忍唔住今日再寫，叫佢三思（不過，應該已經太遲）。

唔係我心中只有錢，大把精算人都教書，不少教咗多年，我都教過兩年。棄精拎教鞭冇所謂，人工都不錯。但，就真係唔好做TA。我冇做過，但見過。做TA嘅，工作量唔會少過教師幾多，分分鐘仲要入課室教書。由朝做到晚，都算，但偏偏仲要睇班老屎忽教師嘅面口，而班友應該高你4、5倍人工， 但可以準時4點半返屋企享天倫之樂。咁嘅環境下做得幾年，正常人都變反社會人格，小則在老屎忽飯盒加料，大則在學校放炸彈。

一隻以「唉我幾廿歲人」嚟卸膊的皮蛋

以上種種或有誇張，但我都教過書，冇做過TA，都仰過老屎忽的鼻息，幾乎鼻屎都食埋。當年我都係冇做精算（事實亦冇人請），最初教間良心私校。雖則人工唔高，但幾開心，話晒年青仲有團火呀之類。不過當時最令我抓狂就係一名花名「皮蛋」嘅老嘢。當年未有梳乎蛋，但佢就完全係梳乎蛋嘅老化版（所以個花名好有前瞻性！）

「皮蛋」嘅口頭蟬，係：

唉我幾廿歲人……

我唔知佢幾大，但照計都近60。佢用呢句嘢，將所有嘢卸得就卸，完全同佢physically一樣，係太極高手。考試成績入分？「唉我幾廿歲人……」放學開會？「唉我幾廿歲人……」咁乜水幫佢做？正係年少無知，充滿熱血嘅區區在下我本人。

當時我都未至於投訴，但有時同老校講起，同時間亦係幾廿歲人嘅老校，亦同我講返呢句「唉佢幾廿歲人……」嘻。後來轉去第間學校，新校，校長似乎深明呢啲「幾廿歲人」害人不淺，一律只請新人。從此我冇再受呢啲苦，改為受老校勞役。

然後呢？沒有然後啦。對，後來離開學校，投身金融界十幾年中，真係冇乜遇過呢啲「幾廿歲人」。我當然有遇過老嘢同事，亦遇過十分仆街的同事（大把）。但，就好似冇乜遇過「倚老賣老」嘅同事。

職位不高的老嘢　通常冇乜殺傷力

我當然有遇過老而不的老油條老屎忽，問題係，其實我幾肯定，佢地本質就已經係仆街，並唔係因為老咗先咁。「倚老賣老」，在學校大把，在公務員體制我估都唔少，但，在商業機構，特別係金融界，其實唔係咁多嘅。

唔好搞亂「倚老賣老」同埋 「仆街高層」，兩樣嘢嚟的。當然做得高層嘅多數唔會太後生。但商業機構最殘酷，老而唔高嘅員工，其實最高危，亦最可憐。佢哋在公司，往往係冇乜人尊重嘅。我遇過嘅，係「仆街高層」，多過「倚老賣老」好多，畢竟你得個老字，關我乜事？我唔再係當年嘅熱血少年嘛，你幾廿歲？哦，唔使做？同老細講咯。

而我經驗所見，老而不高嘅，一般都練成油條神功，唔會太神憎鬼厭。因為佢哋能力有限，人工高自然亦高危，唯有靠人緣，靠懶係同你打成一片，靠得閒幫你留意幾時有特價機票搶，就係佢哋生存技能。一般嚟講，我對呢啲老而不高，都好nice。又唔係搞到我，唔係在我部門就得。

至於公司點解有呢啲人？好多原因，最常見係「黃馬褂」，家族企業或中小企最多。但其實呢種應該係歸入「高」，唔係老。畢竟fresh grad都可以做「黃馬褂」。 另一原因？就係公司「有人情味」。對，有啲香港公司其實都幾有人情味，或者係老細同HR太軟弱，唔想炒人，甚至有炒後生唔炒老嘢的惡習。我建議後生仔最好避開呢啲公司，除非你可以玩熟個遊戲，玩到你都變老嘢。

再講一次，商業機構，特別係金融界，其實冇乜人情味。做乜咁強調呢點？即係話，其實年輕人好多睇唔順眼嘅老嘢，特別係做得高層嗰啲，應該真係有佢長處嘅。

老嘢霸高位　因為後生未夠班

你唔覺？覺得人哋日日好似皮蛋咁碌嚟碌去？賭神高進話齋：後生仔，係你唔夠爐火純青啫。

你諗下，正常地，老嘢人工點都高過你啦，對不？又正常地，體力呀，勤力呀，點都唔夠你嚟。講電腦講科技講潮流，亦唔夠你嚟啦。而講熱血講夢想佢更加唔夠你嚟。

  咁，點解你仲係坐唔到佢個位？個個老細傻的？

情況，就好似有一排德國隊畀人話青黃不接，有啲激進啲嘅球迷，總覺得廿六七歲嘅某某仲選入去做乜？唔好阻住地球轉，畀新人上位啦，新人有體力又有Heart。

多數我都係挑釁地回覆：

係係係，最好選隊U21去踢就實捧盃！

就係咯，鬼唔知後生仔好氣好力，但，拳怕少壯棍怕老狼。總唔見平均年紀廿一二歲嘅小朋友隊捧到英超歐聯世界盃。點解帖雅娜37歲生埋仔都仲要打？杜凱琹話畀你知，因為啲後生嘅未接到班嘛。

老嘢憑乜可以做隊長，做正選，仲拎高你一截人工？咪就係，路數，人脈，見識同經驗咯！市場唔呃人，你話你有熱血有衝勁，但市場就話你知路數人脈見識經驗，往往更加值錢。教師公務員你可以話年年加人工，老嘢自然高。但球隊好金融經濟好，後生仔唔會係最高人工，市場話你知經驗更值錢。咁當然，去到個頂點又會落返黎，運動老將多數要減人工。

倚老賣老？好多時只係好簡單嘅常識，機會成本之嘛。年輕人經驗冇乜但好氣好力冇負擔，咁梗係賣熱血賣衝勁啦。老嘢唔夠氣要供樓，就當然踢法經濟啲，跑少幾步，識得收放，但一樣唔好蝦。唔信，踢過街場嘅都知，玩過辦公室政治嘅都知。

（本文純屬作者意見，不代表香港01立場。）