香港人搵快錢 我們只能在大海上徒勞無功的掙扎
香港人總被一種莫名的不安全感籠罩，成日驚唔知第日會點，好天收埋落雨柴，賺多一萬幾千都好。可能那麼多年來都是，身分和主權都是曖昧和飄忽的，今天相信和確立的，極可能在一夜之間被改變，往一個你和我都不知道的方向改變……
不是飯局，是咖啡局。
不是電視台小花，從來沒參加過什麼富豪飯局，八卦雜誌言之鑿鑿的飯局價，感覺似是而非。
曾經那麼一次，卻參加過咖啡局，體會搵快錢快感。
飲杯咖啡淨袋 5 萬蚊 叻過 300 萬年薪
在法國工作認識的朋友，他們是一個非政府組織，想到亞洲設辦公室。北京唔使諗，所以想試吓香港或新加坡。法國朋友在亞洲半個人都唔識，於是想我幫手搞個拉線咖啡局，找幾個關鍵人物坐低傾。
Email 都懶得寫，text 咗幾個幫到手嘅人，有熟有唔熟。拉線咖啡局歷時個半鐘，第一杯咖啡都未飲完，5 萬蚊，袋袋平安。
嗰刻，幾爽。
對於一向做生做死，超時冇補水冇補假的媒體人來說，是我第一次搵快錢。
香港人鍾意搵快錢，唔使 effort 就有錢落袋。
每天工作 15 小時，年薪 300 萬唔叻，旅行順便帶水貨返嚟，或者抽新股，賺個一萬幾千，先為人所樂道。
重點是，勞力和收入要不成正比。
簡單而言，是不勞而獲。
有一次，6 月中在英國做完嘢，準備返香港幾日，冇為意咁啱係倫敦嘅 sale season。一位香港女子朋友，兩天之內打了 10 通越洋電話給我，內容大同小異，歸納其大意是：
「而家香港炒 Hunter Boots 好好價，你同隊 crew，一人帶一對着一對，都要同我帶返嚟。」
沒考究又濕又熱的香港，是不是適合穿這種塑膠雨靴，也沒有懷疑香港女生平均腿長，是不是跟英倫女子有差距。
結果，我一對都冇帶，仲要買個 Smythson 嘅 wallet 向香港女子賠罪。
「你真係好蠢。」
世事難料 苦海浮沉 所以香港人愛炒
搵快錢，代表着數。
不是多勞多得，不是按比例加薪。快錢帶來的快感，即係賺一蚊都係賺突。
因為彈丸之地小眼睛小嘴巴的島民性格？或是小氣基因使然？很難考究。
香港人鍾意炒，鍾意搵快錢，係因為總覺得自己 under paid。
講真，超滿足超有錢，得鬼閒炒 iPhone。成日捕住個電腦搶撳掣，好好玩咩。
唔係話香港人搵得少，美國人扣埋稅其實冇幾多，而係永遠都覺得唔夠嘅心態，令香港人炒完又炒。
說穿了，是不安全感。
香港人總被一種莫名的不安全感籠罩，成日驚唔知第日會點，好天收埋落雨柴，賺多一萬幾千都好。
可能那麼多年來都是，身分和主權都是曖昧和飄忽的，今天相信和確立的，極可能在一夜之間被改變，往一個你和我都不知道的方向改變。
一個西班牙朋友說得好，他說，香港人總像浮在大海上。
日復一日的掙扎，沒有盡頭。
西班牙人即使沒有工作，也樂得每天躺在陽台日光浴，看着國家 45% 的青年失業率，不痛不癢。國家前途黯淡，但西班牙人終究是西班牙人，即使身分民族不能當飯吃。
朋友說，香港人的不安全感是因為沒有根。
在大海上徒勞無功的掙扎，只會更累。
想離開，卻沒有目的地。
抓着炒波鞋炒 iPhone 得來花花綠綠鈔票的炒民們，共勉之。
（本文純屬作者意見，不代表香港01立場。）