波士永遠是對的，因為揹鑊嗰個係佢唔係你
稍為管過人嘅中層都知，同你想像中唔同，出咗事，踢落下屬身上，係好難過骨嘅。我份報告大大個標題寫錯字，大老細打嚟鬧，唔通我話下屬寫錯唔關我事？邊有咁多吳克儉。
講兩個職場小故事熱身。
第一個故事，出自金融才俊陸東本《智者傲行》。講佢在瑞銀（UBS）建立分析員團隊。有啲囂張分析員，一言九頂，「我份糧唔包呢啲」。對付呢啲人，陸東話好啦，唔使嘈，一齊過去大老細房，二選一睇吓大老細留邊個。陸東話出到呢招，對方多數自然歸順。
第二個小故事同足球有關。英超曼城嘅耶耶托尼（Yaya Toure）呢兩年嘅際遇，唔少打工仔都有共鳴。兩年前佢生日，正值公司喜慶（拎英超冠軍），結果唔記得咗佢生日。佢好唔開心，借經理人把口話要走人。結果走唔成，今年嚟個新波士，行內有名嘅哥迪奧拿（Pep Guardiola）。哥帥直頭公司年度大project（歐聯）都冇放佢入名單。耶耶托尼梗係又唔開心，亦係借經理人同哥帥對罵，要佢道歉云云。 哥帥當然唔鬼理佢，佢連效力公司10年嘅老臣子赫特（Joe Hart）都可以踢走，何況係開始走下坡，麻煩多多嘅耶耶托尼？
留意：
1. 分析員足球員，同藝人補習天王一樣，已經係比較重視個人能力嘅職業，亦所以二打六同明星級待遇可以爭好遠。
2 . 陸東提到嘅下屬，我估年薪幾百萬。耶耶托尼更不用講，踢緊頂級球會頂級賽事。
3. 哥帥總唔可以自己落場踢埋一份，我估陸東亦唔會落手落腳砌Excel model。
故事話畀你知，即使係頂級打工仔，波士又唔可以做埋你嗰份都好，同波士作對冇好下場。一般打工仔更不用講。咩係真波士？唔只係睇organization chart咁膚淺。波士就係Hire and Fire嘅權，捧得你上神台亦拉得你落嚟。
所以嚴格嚟講，梁振英係咪曾俊華嘅波士，都有得拗。至於曾生嘅名句You always agree with your boss，就要語理分析，亦都與你分析。有人理解做晦氣說話 「你係波士你話乜咪乜咯」，有人理解為向「真波士」顯示忠誠。
只講極端例子 未免太小學雞
唔估佢諗乜，只講呢句嘢，又點去理解？句嘢好多人唔同意，因為感覺好奴性嘛，做擺尾乞憐嘅哈巴狗幾咁可悲，而新一代個個都充滿希望要改變世界嘛，點可能乜都同意。
不過唔該，be sensible，唔好只睇always字面。 話「唔通叫你食屎你又食咩」，就真係曲解原本句嘢。 喂你結婚發完誓話永遠愛佢，唔通老公嫖賭飲吹欠債性病樣樣齊都永遠咩。阿媽叫你返學要聽老師話，咁你駁佢 「老師叫我食屎我又食屎咩」，就實在太小學雞。
真係有人會連希特拉都拎出嚟講，叫你殺人你就照做咩。但，大家老實承認啦，你嘅工作邊有咁大是大非，頂多咪老細叫你幫佢買衞生巾，或者叫你去洗廁所。
講完always，講埋agree。我理解嘅agree，唔係波士講乜你都當真理。而係既然老細決定做，你應該跟住去做，同埋企佢嗰邊。同人吹水你可以客氣咁講 「係老細決定嘅」，但冇理由話「我勸咗佢佢死都唔聽我講」。至於你心中詛咒等佢出事，就另一回事。
揹鑊嗰個話事係基本常識
好難接受？咁你諗真啲？波士工作係乜？就係管你嘛。再睇佢唔順眼都好，佢係話事嗰個係基本常識。試諗下如果陸東叫個分析員寫個報告，個分析員可以話「我唔想寫喎，你要尊重我」。咁仲得了？
你唔想寫？或者覺得波士咁做不智？得，講出嚟。講點解你唔想，講點解波士咁做會出事。聰明又明理嘅波士會再諗，可能改變心意，亦可能維持原判，而最後你都係要順從。合理嘅要求先順從？但除非唔合法或明顯違背公司規矩，否則在波士個「合理」面前，你個「合理」行埋一邊先。
點解？因為波士嘅波士，大老細，搵佢返嚟，就係要佢全權問責。稍為管過人嘅中層都知，同你想像中唔同，出咗事，踢落下屬身上，係好難過骨嘅。我份報告大大個標題寫錯字，大老細打嚟鬧，唔通我話下屬寫錯唔關我事？邊有咁多吳克儉。
覺得波士係廢柴嘅，一定唔係少數。特別係最鍾意去pantry吹水午飯又一齊食返到公司又上facebook乜乜secret嘅嗰啲八公八婆。對，波士梗係靠擦鞋上位的，梗係黃馬褂，梗係好彩，梗係出賣人不擇手段踩住人上。
總之只有自己懷才不遇默默耕耘，特別係在冇波士份嘅WhatsApp group之中最努力耕耘。
至少你波士爭贏同年代的其他精蟲
睇我以往嘅文都知我串串貢，唔易服人。但職場上，遇過嘅波士，冇一個我覺得好冇料。當然唔係每一個都好叻，但至少每一個都有值得我學習嘅地方。
其實，係咪真係有咁難理解呢？肯定人哋嘅才能，真係咁難？做得你波士嘅，唔係應該有一定才能？對，好多只係因為佢年資夠，甚至只係因為佢出世得早，係幸運精蟲。咁但係，電視節目有好多種，精蟲都有好多條。我同意波士年代易上位，水鬼升城隍。但至少你波士都爭贏同年代的其他精蟲，總有佢原因。你見佢今日好似梳乎蛋咁hea，好可能你唔知佢有幾叻同埋用咗幾多努力先上到呢個位。鴨子划水，水上面好平靜，下面辛苦到仆街。你必需要好努力，先可能顯得毫不廢力。
我相信，上司叫你洗廁所呢啲，極偶然發生啫。你一單半單完全唔同意佢唔緊要（但，都係要做的）。但如果你發現每一件事佢都好唔合理嘅。咁點算？
真係Underpaid 又何必留低？
首先，檢討下自己。耶耶托尼搞到今時今日咁，好大程度上因為真係唔掂，力不從心。你可以上YouTube搵「Yaya Toure work rate」嘅片睇佢點夢遊球場。如果真係覺得自己冇問題（可惜，好似百份之九十嘅人都咁覺得），咁就一係同波士八字唔夾，一係就波士變態有問題正廢柴啦。咁，仲可以點？轉工啦。
對，返緊工日日鬧波士嘅，問下自己點解仲要成日「懷才不遇」。而家科技先進，大把人劈炮創業，不乏成功例子。況且而家一街都話追尋夢想唔好做奴才，你裸辭一定好型，大把人支持你。
到底係咩留低你？耶耶托尼今年33歲，嘈咗兩年話走，有冇走到？到底你係咪真係你想像中咁懷才不遇？十個打工仔有九個半都話自己underpaid，但，唔走，咁點證明？定你唔敢冒險？定有老婆仔女要養有樓要供？定物慾大得滯一年要去幾次豪華旅行？
個個人有自己原因。既然選得留低，一係就冇料走人，一係有嘢值得你留。咁所以，都係聽聽話話啦。況且，是真的，山水有相逢嘛。哥迪奧拿點解未開季已經唔妥耶耶托尼？因為，之前在巴塞已經有牙齒印。冇任何科學數據， 但印象中， 同上司唔妥嘅， 特別係去到間間都話人針對佢嗰啲， 好少會係人哋走寶該人日後飛黃騰達。
（本文純屬作者意見，不代表香港01立場。）