婚宴人情公價的意義

撰文:詩寧
出版:更新:
「蝕唔起唔好擺酒」係真嘅……因為係你自己發起要慶祝結婚,咁拎十萬八萬去慶祝一吓、氹自己同另一半開心,理所當然要預咗自己找數啦…但所謂「公價」,係咪全無意義?
詩寧
Gettyimages

之前寫過一篇博評,叫各位新娘勿忘初衷,搞婚禮唔使咩都盡善盡美,因為人生其中一件最美好的事情已經降臨在你身上了,能夠找到生命中的另一半,並承諾以後共同面對所有風雨,比起咩華麗backdrop、星級化妝都重要。

相關文章:【夢中婚禮(下)】一生人一次,是祝福還是魔咒?

嚟到年尾結婚旺季,早兩日傳媒出咗篇報道講人情公價又升,一般酒樓最平$700。身為2016年新娘,我話你知報紙條數係堅嘅,而家嘅酒席除返開,的確係每人最少比$700,新人先唔使蝕得咁甘(並唔係唔使蝕,只係無咁甘)。但係,我並唔係話「如果你封低過$700就唔好去飲。」我絕對無咁嘅意思!!!我絕對認同人情係要基於賓客對新人嘅交情、同埋賓客本身經濟能力,大家想封幾多就幾多,唔應該有壓力。

調查顯示,酒樓擺酒的人情「公價」已加至700元。(Gettyimages)

只係篇報道一出,就見好多網民撲出嚟鬧「無錢唔好學人擺酒」、「唔搞咁多嘢咪唔使蝕囉」、「做咩要迫人夾錢食飯」……

大家冷靜吓,等等先!其實對新人派帖畀你,都真係無講過「你一定要畀公價以上先好嚟」。所有嘢係你幻想出嚟咋,人哋拎得最少30萬出嚟擺酒,你嗰$700真係無你睇得咁大、咁重要,新人拎得錢出嚟,真係預咗蝕,最少一定蝕攝影、化妝、租衫、相簿、油畫……

  擺酒係為自己慶祝 拎錢出嚟係應份

當然,「蝕唔起唔好擺酒」係真嘅,如果新人無「蝕錢」準備,唔好擺酒。同埋,根本就唔應該用「蝕」呢個概念,因為係你自己發起要慶祝結婚,咁拎十萬八萬去慶祝一吓、氹自己同另一半開心,理所當然要預咗自己找數啦。

  究竟點解要定「公價」? 

「公價」 點樣得出嚟?就係一圍酒席嘅價錢除返12個人頭,即係$700 X 12 =$8,400,如果佢擺20圍,就最少付出咗$168,000搞場婚宴。

呢條數代表咩?係咪全無意義?

如果你同新人只係泛泛之交,甚至係你日日咒佢早登極樂嘅同事,所謂「公價」真係完全唔關你事,我建議你條氣唔順就畀少啲,心理平衡啲。

但公價,對於真心出席好朋友婚宴的我,會因為錫對新人、而又有能力想幫輕吓對方,咁公價就令我知,最少封$700或以上,可以令對方輕鬆點、表達吓心意。當然,經濟情況人人唔同,$500、$600一樣係心意,你隨心封,真正朋友派得帖都唔會介意,唔通你入$200落去佢要你嘔返隻鮑魚出嚟咩。

你隨心封,真正朋友派得帖都唔會介意。 (資料圖片)

  對付無賴新人 不宜手軟

我當然都試過接到完全唔熟的人電話,佢同我寒喧咗幾句廢話之後…

佢:「你下星期六得唔得閒呀?」我不虞有詐:「得閒。」佢:「咁就啱喇,我嗰日擺酒呀,畀個地址我寄張帖畀你。」

用陷阱形式請人真係賤到不得了,對付賤人不宜手軟,如果派帖嘅人真係好乞你憎,或者佢真係為湊夠數而亂請人/擺酒前一星期發現有位剩先請你,你都應該鼓起勇氣推咗佢!佢唔尊重你,你大可隨便一句「我當日唔得閒」,或隔兩日隨便搵個借口:「原來我記錯,嗰日要返工呀/返大陸呀/探病呀/拜年呀……」

係,世上有害群之馬,遇着呢啲無賴我唔會客氣!所以我最唔明就係,你唔想去婚宴,點解唔推?咁大個人,拒絕一個聚會都唔識/唔敢?如果你真係覺得人哋請飲係打劫你,但你唔忠於自己良心去反抗,你就無資格怨。

對於婚宴,賓客都應該勿忘初衷,朋友人生大事,想你見證,證明你喺對方心中地位超然,理應祝福而唔係「問候」。可能係多年無見嘅中學同學,但佢覺得你喺佢中學時期有所影響,當佢檢視人生上半場嘅時候諗起你,你又何必只諗起嗰$700?

當好友檢視人生上半場嘅時候諗起你,你又何必只諗起嗰$700?

總之你有心祝福人,就帶住高興心情去見證;毫無祝福感嘅,就直接推咗佢。最睇唔起就係唔想去又唔敢推,懷着抱怨嘅心去飲,由收帖怨到散席,何必呢?

(本文純屬作者意見,不代表香港01立場。)