林建岳用雲吞麵形容《十年》　掀起全港「雲吞熱」

月頭《十年》奪得香港電影金像獎，俾內地媒體封殺不在話下，仲鬧得滿城風雨，輿論兩極。一邊話電影呼應時代價值，值得攞獎；另一邊就話套戲藝術水平不足，係政治綁架專業。好啦，過咗半個月，重映做完，仲登錄埋 Google Play，以為都冇咩好傾架喇。點知「君子報仇，十年未晚」，寰亞電影老闆林建岳喺星期日突然又爆金句評《十年》：

「如果我話畀你聽，有間雲吞麵舖係全香港最好嘅餐廳，你會唔會服氣？」

林老闆嘅比喻認真夠本土，有誠意！本城網民為咗「感謝」佢，立即掀起一片「雲吞熱」，人人化身食神，列出最愛嘅街坊雲吞麵店，連傳統名稱「細蓉」都成為年度潮語。

查實香港雲吞麵世界知名，係中外遊客必試美食，有雲吞麵店甚至連續多年得到米芝蓮車軚人推介，你估易呀。林老闆係知雲吞麵係好嘢嚟嘅，佢做主席嘅旅發局，咪都以雲吞麵作為代表香港嘅「道地美食」之一囉。

林老闆可能特別識食，上年年尾佢都有句全城熱賣金句，又係同食有關。事關中港矛盾，佢話，中國市場係一舊肥肉，「但我哋香港偏偏啲人就唔係好鍾意肥，鍾意食齋，咁都冇辦法。」查實咁，潮流興瘦身，而且甲之熊掌就乙之砒霜，冇話鮑參翅肚、佛跳牆先好食嘅。《食神》史提芬周都係憑一碗叉燒飯，呀唔係，係「黯然銷魂飯」，食到家燕姐感動流涕啦。學周星馳話齋：「只要用心，人人都可以係食神！」

 延伸行動： 

查實林老闆是用心良苦，佢只不過係提醒大家，雲吞麵梗係唔係「香港最好」，最好美食？係住家飯嘛。今晚一於返屋企食老婆／母親大人嘅住家飯，唔使黯然，但包保銷魂。