東方足球聯賽奪冠 「牛丸」教練成世界第一

撰文:博評組
出版:更新:
健力士世界紀錄認證官(右)向「牛丸」陳婉婷(左)頒發健力士世界紀錄榮譽證書。(江智騫攝)

唔知你有冇留意香港足球,不過最近全世界都睇實港超聯。冇呃你,事關東方上月底擊敗南華,提早封王,成就佢哋個教頭,人稱「牛丸」嘅陳婉婷成為世界上第一個帶領男性足球隊喺地區頂級聯賽奪冠嘅女教練,尋日仲獲頒發健力士世界紀錄榮譽證書,連 BBC 都有報道!

陳婉婷芳齡二十有七,去年年底接棒成為東方主教練,冇錯,就係港隊鐵門「英雄輝」葉鴻輝效力嗰隊。牛丸以細心見稱,無論對球員嘅技術、心理質素、定係默契,全部瞭如指掌,成功革新東方足球隊,今年 15 場聯賽賽事,只輸 1 場!帶領球隊相隔 21 年後,再次奪得王者寶座。連球迷都睇波時打氣,都竟然係嗌「牛丸!牛丸!」可想而知佢嘅領導能力有幾受大家肯定。

牛丸自細已經鍾意足球(因為碧咸),讀完大學雖然可以搵一份平平穩穩嘅工作,但係佢決心追夢,唔理屋企人反對,去天水圍飛馬做數據分析員,由低做起,一步一步爬上來,慢慢用熱誠打動屋企人、球員,同埋球迷。呢一刻成功創造歷史,值得驕傲!

近呢幾年,世界球壇愈來愈多女性教練領導男性足球隊。譬如 2014 年,法國就首先有職業足球隊請咗兩位女性主帥,秘魯仲早,2012年已經有球會請咗女主教練。不過「踩過界」嘅女教練始終未成主流,亦未曾贏過冠軍,大部分球會依然係男性嘅天下。無他嘅,而家講緊嘅係男性球壇嘛。其實教練由唔使落場,講食腦,用戰術,又何來男女之分?可以話性別平等,尚有漫漫長路啊。

 延伸行動: 
咪以為香港運動員係垃圾,香港人嘅夢想更加值得支持。無論你嘅夢想如何,我哋一起去追!睇下我地專訪牛丸嘅勵志故事:
【01專訪】男隊女帥創歷史 「牛丸」陳婉婷軟實力治軍