【三個傻佬學煮餸．情人節篇】中式糖水啱唔啱？

消費情人節，餐廳扭盡六壬，價錢 mark up 晒，願者上釣。
其實花小小心思，自製情人餐，伴侶更窩心。

Eric 有個老友，梅窩有間屋仔，整間房儲滿花膠王。每次請我哋班友仔 BBQ，都會煮一大窩花膠腐竹糖水。席間所有女人仔都大讚好養顔。Eric 就諗，中式糖水，可否化作鬼佬情人節甜品？

呢條橋一出，Jim & Jeffrey 嘴喵喵，恥笑道：「你有冇娘啲呀，不如整煲豬尾花膠湯啦！」

Eric 唔信邪，求教老友。做法如下：

 ※ 花膠腐竹煲糖水 ※ 

煲滾水，放兩片薑，熄火；
將花膠浸入熱水，焗過夜。
翌日，花膠已軟，洗乾淨，切碎，腐竹花膠煲水；
加冰糖，即成。

Eric 的鬼主意係，花膠與腐竹煲至完全溶解成奶白淡黃色的糖水，其實不分中西式，搵一 set 靚靚器皿，中式糖水都可以好西式。

在家品店發現一 set 玻璃碗及小杯子，加一粒 cherry，完全不似中式糖水，搞掂。

  貼士

腐竹要用易溶的，否則煲極吾爛。

花膠不用貴價貨，用最便宜的薄花膠便可，反正溶入糖水。

花膠份量多一點，冷凍後可成啫喱狀。Eric 把食剩的放入雪櫃過夜，翌日凍食更美味。及後宴客時，花膠啫喱加熱糖水，一冷一熱奉客，反應不俗。

  蝦碌...Orz

試煮當日，Eric 用錯腐竹，煲極唔爛！而且落咗蓮子，有苦味，大家晒偏咀。

（圖片由作者提供。本文純屬作者意見，不代表香港01立場。）