【足球.博評】世青盃奪冠,英格蘭青訓「又」有希望?仲有排睇!

撰文:世界波
出版:更新:

文:洛迪高@世界波

英格蘭青訓一直以嚟為人詬病及恥笑,不過2012年落成嘅聖喬治公園,以及英格蘭U20剛勇奪世青盃,加上英軍U21於U21歐洲國家盃賽殺入四強,僅互射12碼不敵宿敵德國,令世人,尤其是擅於吹捧嘅英媒頓時覺得自家青訓前景美好,但事實又係咪如此?連帶脫歐都被指對英軍青訓係一大利好因素,但最後會唔會只係看上去很美?

  世青盃奪冠代表咩

U20世青盃奪冠,係英格蘭國家隊近來少有嘅國際賽事冠軍榮譽,今次奪冠,當地傳媒當然大書特書暢想一番,但事實今次世青盃奪冠,含金量並非想像中咁高。

首先係勁敵德國因為要應付U21歐國盃,加上唔少球員甚至有機會出戰洲際國家盃,所以唔重視U20世青盃。另外就係今次世青盃勁旅欠奉,英軍係晉級路上面對嘅阻力唔算大,如果以名氣計,面對過嘅最有名氣對手只有意大利。

然後大家可以再睇下包括英格蘭在內四個國家於2008年起,有幾多位球員參加過青年隊國際大賽而又喺之後獲成年隊徵召-英格蘭:17、法國:11、德國:24及意大利:24。英格蘭數字上唔差,但如果新星甚至本土球星嘅上陣時間遭到外援壓擠,咁樣上面所講嘅喼帽數字,係完全唔可以同成績成正比。下文就會畀大家睇到法國同英格蘭嘅分別。

勁敵德國因為要應付U21歐國盃,所以唔重視U20世青盃。(圖為德國隊U21擊敗英格蘭後慶祝/Getty Image)

【相關文章:本土優先VS包容外援:脫歐引發英國球壇的政治角力】

  英超上陣機會

不過公道講句,拎呢個冠軍其實都唔易,而且唔少英格蘭新星有才華亦係事實,但英媒吹捧後但大未必佳嘅背後,存在嘅係一直以嚟嘅問題,就係佢哋喺英超並無太多機會。我哋先睇今屆世青盃金球獎得主,準備由車路士轉會到利物浦嘅蘇蘭基(Dominic Solanke)。上一季喺英超並沒有上陣機會。金手套得主活特文(Freddie Woodman)就畀上季征戰英冠嘅紐卡素外借至蘇超嘅基爾馬諾克。喺英超上陣最多嘅成員,就係效力般尼茅夫曲克(Lewis Cook),上陣嘅6場431分鐘……至於近年唔少人提起英軍未來中場皇牌嘅曉士(Will Hughes),更喺啱啱先由英冠打吡群轉投英超嘅屈福特,更唔洗提繼曾受傳媒追捧嘅前車路士中場,早已消失於人們視線嘅麥伊治蘭(Joshua McEachran)。

至於睇番U21歐國盃其他參賽球隊,你會發現意大利、西班牙及德國陣中,唔少球員已經喺該國聯賽企穩陣腳,甚或已經有大國腳經驗,例如西班牙嘅沙奧尼古斯(Saul Niguez Esclapez)、德國嘅麥斯美亞(Max Meyer)以及意大利嘅貝拿迪斯治(Federico Bernardeschi),而德國甚至已經無揀效力緊曼城嘅辛尼(Leroy Sane)……

英超外援多係不爭事實,因為成績壓力及本身有錢,自然喺追求成績或喺英超生存嘅道路上,寧願揀來之即戰,或業已成名嘅外援幫手。另外當教練喺外國人時,又點期望佢哋會用多啲英格蘭人而唔係搵本身用番嘅球員鞏固更衣室話語權?

其實而家英格蘭青訓都要面對埋外援競爭,唔少球會都中意去外地挖後生仔,當喺梯隊都少咗機會時,更遑論上一隊了。

如果由數字上出發,第一季踢下英超嘅本地年輕球員嘅上陣時間比去年增加20%,去到716分鐘,但以比例計,英格蘭球員喺聯賽球員中跌至只佔30.8%,為歐洲各國聯賽中,本國球員比例嘅聯賽。再者以2015年一次統計顯示,英超中由球會培養而由同時進入球會英超名單比例為新低,平均僅得11.7%嘅青年球員可以為青訓球隊於英超上陣,亦只得41位22歲以下球員踢過起碼一場英超比賽,合均踢上16,532分鐘,平均每位球員僅上陣403分鐘;喺法國,數字為98位球員,踢上79,062分鐘,平均數為一人805分鐘。

喺英超上陣最多嘅成員,就係效力般尼茅夫曲克(Lewis Cook)(右),上陣嘅6場431分鐘。(Getty Image)

  教練培訓及任

英足總嘅培訓發展當然唔只得球員,亦有教練。當人們提起其他國家少帥潮時,少不免都提到英格蘭少帥之匱乏而指英格蘭未有作該方面作出足夠重視。不過咁嘅指控其實唔算正確,因為英格蘭足總嘅教練培訓計劃,喺數字上比不上部份歐洲列強。喺年頭嘅統計數字,德國有超過1,500人擁有歐足聯職業教練證書,西班牙嘅持證人超過2,000人。

英格蘭呢?只有203人。然後大家再比較下現時英德西喺自己地頭下季頂級聯賽教練人數(截至):英格蘭4/20(僅計英格蘭藉),德國8/18,西班牙15/20,其實「錯」都係「錯」在英超,因為喺英超角逐有巨大利益,因此喺成績連帶收益關係,令班主都唔敢太冒險用少帥,而係選擇穩陣型領隊,所以英格蘭球壇都仲係充斥艾拿戴斯(Samuel Allardyce)、柏祖(Alan Pardew)及普利斯(Tony Pulis)等保你護級成功嘅領隊,而唔會用好似德甲賀芬咸教頭拿加斯文(Julian Nagelsmann)呢類少帥,般尼茅夫領隊艾迪賀維(Eddie Howe)已經算係一個異數。不過樂觀啲睇,而家有唔少後生教練都執教英超球隊梯隊或預備組教練,或者過多一排會有更多機會卦…

  有學園,又有無戰術系統?

發展青訓系統下,最重要嘅係同國家隊或本國足球文化有關,例如西班牙足球強調傳控,因此青訓都會以培訓相關能力及視野等為主,而德國亦因為有一定焦點,因此你會發現近年德國喺進攻中場方面出現新星井噴,包括已經算老嘅列奧斯(Marco Reus),後來者仲有達斯拿(Julian Draxler)及辛尼等,出現人滿之患。

至於英格蘭雖然不時有「新星」爆出,但似乎從來都無一個系統出現,亦唔係有某啲位置特別多新星。或者其實又關英超事,當隊波經常轉領隊,連本身成年隊嘅結構同戰術都成日變時,又唔期望青年隊有一個跟一隊嘅系統方便佢哋上位?上面提過英國球會青訓梯隊都有唔少外援,當英格蘭青訓方向仍缺乏方向或有戰術素養培訓,如果只講個人技術只會比外援輸蝕,而且亦好難為國家隊建立一個穩定體系,所以你見到英格蘭成年隊喺整體上發揮不及唔少現時嘅歐陸勁旅。

西班牙足球強調傳控,青訓培訓相關能力及視野等;德國進攻中場方面則出現新星井噴。(Getty Image)

【相關文章:英國退歐 英超步向衰退之路?】

  脫歐帶來希望

指英國脫歐又會唔會為英格蘭後生仔帶來機會?雖然話脫歐有可能會為之後歐洲其他地方外援到英超帶來唔方便之處,變相影響人員流通,也許會為年輕人帶來機會。不過呢種說法其實同當時法國總統大選,有人驚極右陣營瑪琳勒龐(Marine Le Pen)上任後會為法國國家隊帶來「白人至上」主義並驅逐非正統法國人一樣,只係一個虛妄嘅幻想。由於英超背後牽涉巨大利益,眾多利益集團絕對唔會畀影響佢哋收入嘅事情發生,相信有關英超嘅外援政策都會繼續不變……

小時了了,大未必佳,係好多英國傳媒吹捧過嘅英人天才嘅寫照,其實有時唔係本身才能問題,當大個後連表現嘅機會都無,又何來有從實戰來嘅進步?呢一點正正係其他國家青訓成果比英格蘭出色之處。

(文章純屬作者意見,不代表香港01立場。)