【西甲．博評】華維迪塑造新巴塞 同傳控Say Goodbye？
文：洛迪高@世界波
安歷基（Luis Enrique）嘅離開，意味巴塞隆拿夢四已完，究竟新帥華維迪（Ernesto Valverde）能否再造夢五未可知，而雖然華維迪表示願意適應巴塞本身踢法暗示未必有大變，不過事實係巴塞喺陣容及踢法上都應該亦有需要有所調整，因此可期望佢為巴塞戰法及用人帶來唔少轉變。
為中後場補充活力以作壓迫
雖然前場嘅美斯（Lionel Messi）同蘇亞雷斯（Luis Suarez）已年過三十，但加埋尼馬（Neymar）嘅MSN組合近季依然起到重要作用，所以相信唔少球迷都認為無需要有太變動，佢哋仍然可用佢哋才能為球隊攻城陷陣，而華維迪最需要下功夫動手腳嘅，就應該係中後場了。
隨住布斯基斯（Sergio Busquets）及小白恩尼斯達（Andrea Iniesta）老去，提升巴塞中場活力係其中一個重要課題，華維迪本人都講過，佢嘅戰術都幾倚重中場，加上執教畢爾包時前場壓迫風格都出晒名，如果要保持本身巴塞近年前場迫搶力度及華維迪戰術風格，布斯基斯同小白都未必勝任，上季購買嘅中場安祖高美斯（Andre Filipe Gomes）及丹尼斯蘇亞雷斯（Denis Suarez）仲未證明到自己滿足到球隊中場要求時，似乎再買中場都無可厚非，因此早前傳出巴塞求購恆大巴西中場保連奴（Paulinho）及法甲尼斯嘅科特迪瓦中場占舒利（Jean Seri），都係從中場活力著手。至於轉會巴塞傳聞甚囂塵上嘅巴黎聖日耳門意大利中場華拉堤（Marco Verratti）似乎目的不在於提升活力，皆因佢嘅活動範圍多限於中圈附近，因此就算成功加盟巴塞都唔夠巴塞用。
打法更直接
哥迪奧拿（Pep Guardiola）嘅巴塞可以話係表現出傳控足球及Tiki Taka嘅極致。喺哥帥離開後，因為各種原因，球迷們都睇到巴塞控制比賽嘅能力已有所減弱，所以當時聘用安歷基，被指為希望球隊風格可以不再倚賴傳控而有更多直接攻擊手段，而華維迪喺畢爾包時，球隊於由守轉攻時更快，會更直接發動進攻。由於華維迪喺畢爾包時對阿度里斯（Aritz Aduriz）嘅使用就可以側面睇得出佢嘅直接打法，由於前面有一位可以做橋頭堡及用身體搵食嘅中鋒，所以喺後場組織時，畢爾包球員都不時選擇直接長傳畀中鋒，然後利用運動力強嘅中場及前場球員，如安達靴里拉（Ander Herrera）、蒙尼恩（Iker Muniain）及伊拿基威廉斯（Inaki Williams）等人衝擊對手防線，就算失波都可以再用體力圍搶對手。喺直接打法，華維迪嘅畢爾包亦活用邊線攻勢去提升攻擊速度。華維迪第一次執教畢爾包時嘅左閘迪賀奴（Asier Del Horno Cosgaya）及右閘伊拉奧拿（Andoni Iraola，華維迪第二次執教時仍在陣中）同樣攻擊力十足，配合舊時嘅耶斯迪（Francisco Yeste）、艾斯巴利亞（Joseba Etxeberria），以及上面提到嘅蒙尼恩。
由於華維迪嘅球隊打法直接，因此當邊線有空間時，中場都可以選擇馬上轉邊，再利用前方翼鋒內楔嚟個一條龍，有別於過往巴塞時喺中路造文章再利用左右閘位球員off the ball走背脊拉開空間畀中路調動，畢爾包嘅踢法就更容易破對手堵塞中路，放邊線嘅密集防守。但提到呢種踢法，最重要都係有一位中鋒，畢爾包有阿度里斯，而巴塞陣中都有類似球員，就係上季來投但缺乏上陣時間及表現嘅柏高艾卡沙（Paco Alcacer）。喺點樣使用佢同MSN適應如此踢法都係一大難題，始終要發揮尼馬及美斯特長，必要令佢哋持球，又或者調轉咁睇，咁樣可能反而令巴塞可以減少對MSN嘅依賴。
提升兩閘威力
提到兩邊，就當然要提閘位球員，如果華維迪要加強兩邊攻擊力度，似乎購買兩閘球員勢在必行！喺右閘方面，巴塞已購入賓菲加嘅葡萄牙攻擊型右閘施美度（Nelson Semedo），如果阿歷斯維度（Aleix Vidal Parreu）可以於下季回復當初效力西維爾時嘅水準，右閘方面就唔需要沙治羅拔圖（Sergi Roberto Carnicer）去客串了。至於左閘方面，佐迪艾巴（Jordi Alba）近年表現回落，而榮譽加身後爭勝動力不及佢場上引起嘅騷動，而迪治尼（Lucas Digne）表現不似預期，似未能承擔接班大任，似乎需要再買人，華維迪如果見到筆者呢篇文，我會提議華倫西亞嘅荷西加耶（Jose Luis Gaya）。
青訓可用否？
買買買？巴塞唔係青訓好勁咩？拉馬西亞青訓營出過碧基（Gerard Pique）、美斯、布斯基斯、柏度（Pedro Rogriguez）及堤亞高艾簡達拿（Thiago Alcantara）等人，可惜近年產品如沙治羅拔圖、剛轉會到愛華頓嘅辛度拉美尼斯（Sandro Ramirez）、已轉投多蒙特嘅馬斯巴查（Marc Bartra），以及回歸嘅迪路菲奧（Gerard Deulofeu）等人水準唔係差，亦偶有閃光而令人有所希望，但已比不上前人水準，而且因為較多為攻擊球員而由於MSN嘅存在而令上陣時間唔多（昔日天才保贊（Bojan Krkic）就係絕佳例子）。不過好似巴塞中場仍然由上面提過已經老化嘅布斯基斯及小白操持，另一位主力就係由西維爾來投嘅拿傑迪錫（Ivan Rakitic），就連沙治羅拔圖及拉芬拿艾簡達拿（Rahinha Alcantara）等人都未能接班，好似沙治羅拔圖要做右閘先叫做有啲出場。
有人會話華維迪喺畢爾包都好肯用新人，好似伊拿基威廉斯及艾里沙巴拿加（Kepa Arrizabalaga）等，但唔好忘記畢爾包係一間好特別嘅球會，喺轉會窗都只能夠買有巴斯克背景嘅球員，咁好自然就要依賴青訓，而且成績壓力無咁大，亦自然可以放心用青訓，但巴塞就唔同，喺用青訓同成績下揀，唔可以Why not both時，相信球會都希望先保住成績，尤其當青訓成果並唔算十分突出時（其實買番青訓球員回家都係一個選擇，如阿仙奴右閘比利連（Hector Bellerin））。
縱使華維迪上任後曾強調會適應巴塞戰術，但筆者相信都係客氣說話，或者適應嘅可能只係陣式而唔係打法。巴塞相中佢，無非都係想為近年發展作改變，雖未致於捨棄傳控足球，但的確希望能夠喺傳控同直接打擊拎一個平衡，始終傳控唔係個個都駕馭到，加上現時巴塞陣中球員老化或動力減弱，新援或新青訓未能完全滿足有關打法時，華維迪要做嘅，必然唔係單純融入體制之中，你估個個都敢用布斯基斯打中堅？你敢，而家嘅布斯基斯都未必得了。
（文章純屬作者意見，不代表香港01立場。）