【香港球員TALK 2】靚仔、門神 謝德謙球衣的故事
「波衫對我嚟講係一個歷史，因為一個球員可以著到幾多件職業球隊嘅球衣？一年可能只得兩到三件，整個生涯其實可能只得四五十件。
但每一件都有自己嘅故事，可以回憶到當年嘅每一場比賽、感受，係一種對自己事業嘅回顧。
我每一件自己著過嘅波衫，都會儲起，由南華青年軍、香港08，到公民、太陽飛馬，到而家南區、香港隊等等我都會儲起。
前前後後都應該過百件了，每一件都好有紀念價值。」－－謝德謙，本土門將
「我覺得自己算係一個幾好彩嘅球員，算叫做無咩高低，雖然過往兩年可能無乜正選，但對我嚟講其實係一種幾好嘅體驗。一次係公民，一次係太陽飛馬。公民我踢得少，令我明白自己有咩不足嘅地方，令我對自己嘅弱點加強練習；而太陽飛馬更加係令到我更加明白，真正嘅足球員係需要啲咩。就好似足球員嘅態度，或者係點先係完善嘅配套。所以我今年喺南區幫手，唔多唔少都參照咗當年太陽飛馬嘅模式。例如健身呀，形象呀等等。因為香港只得十零隊，二百幾個球員，香港隊更加講緊係30人，要點樣去建立足球員嘅形象，令人感覺足球員唔係波牛，令人明白足球員可以係一份有前途嘅工作，呢樣嘢係我好想帶畀所有人。」
謝德謙喜好：鮮色波衫
想不到平時看來斯文的阿謙，一坐下來談起足球，就有着如此宏大目標與理想。不過我不想整個訪問太過重量，所以立即轉換話題。究竟，足球員對球衣款式上有否特別要求或特別喜好？
「其實我係有要求嘅，因為我唔鍾意黑色，所以我一定要鮮色嘅波衫。但要求其實都係一路改變緊。開頭我一定係要短袖，但發現短袖好容易跣手，所以著左兩年就開始喺波衫入面著件長袖拉筋衫，情況就得到改善。但後尾改例，拉筋衫要同波衫同色，而我嘅衫又比較鮮色，所以都幾難搵，因此今年開始著長袖。」
第一件波衫：媽媽買的特價品
「呢件係我第一件波衫，亦都係我足球嘅開始。你可以睇到其實件衫已經起晒毛粒，已經經歷過十分之多嘅寒暑。以前細個屋企條件唔可以話十分好，能夠擁有一件波衫已經好開心。嗰陣時媽媽見我踢波，咁啱又特價，就當獎勵我送咗呢件波衫畀我。而且媽媽好細心，因為我嘅位置係龍門，佢唔想我落地整損，所以特登買件長袖波衫畀我。呢件衫可以話係屋企首次對我喺足球上嘅支持。」
的確，家人對足球員的支持十分重要，特別在香港足球環境下，如沒有家人支持，真的很難去繼續足球事業。阿謙道出這件衫的故事，看得出他是一個重感情的男人，十分重視家人，而且對他的支持尤其重要。這件球衣，已經是他小學時的寶貝。
公民歲月：有最好嘅鬥志
「公民係我自己踢得最耐嘅球會，踢足11年，最有感情，就算到而家都係。」
又一次引證了阿謙是一個重感情的人。
「公民最特別嘅地方係雖然佢哋唔係有最好嘅人腳，但佢地有最好嘅鬥志！我記得呢場波好重要，因為呢場波我哋先可以踢亞洲賽。對手，正正係南華！我哋由落後3球，到追返3球，我哋仲要打少2個，但最後12碼贏左，所以呢場賽事可以話係我生命中最重要嘅賽事。嗰時南華嘅氣勢絕對比我哋好，可能香港大球場比較有利佢哋發揮，因為香港大球場對比起其他球場係大好多，不論係旺角或者小西灣都好，所以相對嚟講，對我哋以守為主嘅球隊比較不利。因為我哋嗰時前線唔算真係好強，所以對住強隊往往都係打穩守突擊為主。所以球場愈大，就愈多空位，對於防守嚟講係相當不利。」
看到阿謙一邊講述當年賽事，完全感受到當日賽事對他的影響，每個細節都能夠道出，亦感受到他相對回味當日的勝利。
「當日我哋賽前都做咗好多準備，例如盡量逼南華要喺中路進攻，唔好畀佢哋落兩邊，等佢哋空位少啲，奈何我哋輸咗3球。可能好多人都會覺得，輸咗3球，其實已經輸咗，但我哋無放棄過，加上半場前法圖斯入返一球，令球隊唔駛帶住輸3球嘅結果入返更衣室，令到大家更加唔會放棄，帶住信念去踢埋下半場。最終我哋都創造到奇蹟，追平，然後贏埋，嗰一刻個感覺真係好夢幻。」
難忘的比賽：香港對巴拉圭
「其實喺香港隊，我有份出場嘅次數我自己都數得出，但點解我會揀呢件，因為呢場波我從來都無諗過有得出。呢場係香港對巴拉圭嘅比賽。每一次我入選香港隊，無論有無機會出場，我都好努力去練，去為落場做足準備。雖然我知道機會係少，因為我上面仲有阿輝啦（葉鴻輝）、有阿鵬啦（王振鵬），所以點計我都係比較少有機會落場嘅一位。但咁啱呢場阿輝就無踢，而阿鵬又無入選，得返春暉（張春暉）同我。開頭教練都係俾春暉踢，但估唔到下半場會換我入去。當時上半場已經輸緊3定4球，好少可會喺咁嘅情況下換龍門。所以對我嚟講，係好特別嘅一場香港隊比賽。」
「加上，呢場賽事令我真正感受到咩係世界級水平，無論速度、技術各方面我哋同對方都有一段好大嘅距離。現今嘅香港隊已經比起當時全面左，因為KIM SIR（金判坤）嘅要求其實真係好高。所以如果而家嘅香港隊再對返嗰隊巴拉圭，我相信唔會再輸咁多。（當年香港輸7：0）我好希望香港隊可以着重啲青訓，因為睇返現有陣容，可能幾年後得返阿輝一個，各位置上都需要有新人去補上。無錯，短時間內可能香港隊嘅成績會稍為下滑，因為新人始終需要時間去鍛鍊同吸收經驗。就好似卡塔爾點解喺今年世盃外圍賽踢得好，係因為一早已經有左一個十年嘅計劃去準備，本土青訓同入藉兵雙線平衡發展又取得平衡。」
「香港隊其實最需要配套上嘅配合。唔可以話單單今年有成績先增加配套，我明白香港係一個比較現實嘅環境，往往同成績掛勾，以往覺得體院足球無成績而剔除足球，但而家香港隊有成績又起個將軍澳足球中心，係咪需要咁現實呢？我認為唔單止足球，運動往往唔可以只睇成績，係需要時間去培訓。運動員係好需要完整嘅配套去支持，咁樣先可以令運動員更專注喺自己嘅運動事業上面。」
三件球衣 印證足球路
阿謙選了三件球衣，如果要排最喜愛的先後，會如何排列？
「先係紅色呢件，因為無屋企嘅支持，我就唔會選擇足球作為我嘅事業。之後就係公民，因為如果唔係公民，就唔會有之後嘅香港隊。係公民令我踏上香港隊嘅路，最後就係香港隊。其實呢三件波衫可以話係有關連，印證住我一步一步去實踐自己足球嘅路向。」
訪問完畢後，看到阿謙的車牌，可以想像到他如何喜愛足球，如何熱愛着自己的事業，大家又看得到車牌中的意義嗎？
【編按：相片由作者提供，並鳴謝MovinOn提供場地作訪問之用】
（本文純屬作者意見，不代表香港01立場。）