【01博客咁睇波】東歐新丁看點:有睡褲門神,又有兄弟相殘

撰文:李聲揚
出版:更新:
阿爾巴尼亞外圍賽作客一球都冇失過,但守強攻弱,攻力一樣不濟。世界排名 24 隊最低,仲要對住主辦國法國——不過阿爾巴尼亞之前友賽法國一勝一和。另外兩隊羅馬尼亞同瑞士並非傳統強隊,撈返個第三爆冷都冇話完全唔可能。李斯特城都捧英超啦。阿爾巴尼亞拎冠軍「不過」係 300 倍之嘛。
李聲揚
歐國盃足球。( 資料圖片)

話咁快就歐洲國家盃(下稱「歐國盃」)開幕,列強大國講得太多,電視台有《歐遊全細界》,我都同大家講下小國。

上屆(2012)歐國盃決賽周都只係 16 隊,今屆就擴張到 24 隊。咩概念?即係 53 隊爭 24 個位,差不多一半機會,同時亦造就好多小國有機會踢決賽周。

決賽周有 5 隊波處子登場:威爾斯、北愛爾蘭、冰島、阿爾巴尼亞同斯洛伐克。但我唔打算講威爾斯同北愛爾蘭,反正不少球員在英超或英冠搵食,香港又多戀殖球迷,應該幾熟悉。況且兩隊其實都踢過世界盃決賽周(北愛就細個睇過,威爾斯就我阿媽都未出世)。冰島就真小國,亦都未踢過任何大賽決賽周,但都係唔寫。原因?主要因為我冇去過。

對,睇作者介紹都知我熱愛東歐,你見篇博評最頂嗰張相,就係喺斯洛伐克影的。就寫去過嘅東歐新丁——阿爾巴尼亞同斯洛伐克,順手寫埋同樣去過又鍾意嘅匈牙利。點解?匈牙利足球積弱多年,對上一次踢歐國盃決賽周時,我都未出世,以新一代「歷史由我開始」的原則,都可以當新丁。

入正題,每隊我會講下:

1)國家印象
2)大賽經驗
3)代表作
4)球星
5)簡評

 阿爾巴尼亞 

阿爾巴尼亞國家隊主場相當硬凈,2001至2004年居然保持不敗, 不少強隊都曾在此失分。(作者提供)

國家印象:國旗上面好大隻鷹,中共的老朋友,同其他語系完全無關的阿爾巴尼亞語,自梳女,碉堡,德蘭修女。

大賽經驗:

代表作:外圍賽作客砌低葡萄牙,主場就守到 92 分鐘先輸。同組友賽作客和法國,主場贏埋。

球星:當然係效力瑞士球會巴素利(Basel)嘅沙加(Taulant Xhaka)。有乜特別?佢同父同母嘅細佬 Granit Xhaka(下季轉去阿仙奴)唔係代表阿爾巴尼亞,係代表瑞士。而瑞士仲要同阿爾巴尼亞一組,即係應該可以兄弟同場對決。繼 2010 世界盃保定(Boateng)兄弟分別代表德國同加納對決後,又一佳話。

仲認到第個嘅,可以留意踢法甲南特嘅隊長 Cana,亦係國家隊上陣次數最多球員。另外,正選門將 Berisha 踢緊意甲拉素。

Taulant(右)與 Granit Xhaka(左)這對親兄弟將於同組對決。(Getty Images)

簡評:阿爾巴尼亞外圍賽作客一球都冇失過,但守強攻弱,攻力一樣不濟。世界排名 24 隊最低,仲要對住主辦國法國——不過阿爾巴尼亞之前友賽法國一勝一和。另外兩隊羅馬尼亞同瑞士並非傳統強隊,撈返個第三爆冷都冇話完全唔可能。李斯特城都捧英超啦。阿爾巴尼亞拎冠軍「不過」係 300 倍之嘛。

【歐國盃最新動態、分析及球評,盡在 01博客 x 01Sports 歐國盃專頁!(按此進入)】

 斯洛伐克 

斯洛伐克的木教堂,世界文化遺產。(作者提供)

國家印象:木教堂,靚女多(是真的),捷克個舊相好,現已離婚。留意斯洛伐克(Slovakia)唔係斯洛文尼亞(Slovenia)。原文 Slovensko 同 Slovene 更加難分。

大賽經驗:斯洛伐克 1994 年先「再出現」。 2010 年世界盃打入十六強,分組賽踢左意大利出局。

代表作:巴閉咯,外圍賽主場贏西班牙,係西班牙 8 年嚟首次外圍賽輸波。仲有早兩個星期友賽,作客反勝德國。歐洲兩大強隊都輸過俾佢,勁呀。

球星:都係嗰兩個。隊長係英超利物浦的史基泰爾(Škrtel),副隊長兼首席球星當然係意甲拿坡里的隊長咸錫(Hamšík),佢亦係分組賽該組神射手。

簡評:5 隊首次亮相嘅球隊,斯洛伐克世界排名最高。24 隊當中佢排 14,又有遇強愈強嘅往績。對殘陣嘅俄羅斯唔成問題,分分鐘可以砌低埋英格蘭。撈個次名出線唔係發夢。

真.匈牙利牛肉湯。(作者提供)

 匈牙利 

國家印象: 匈牙利牛肉飯(Goulash,其實係湯), 捲毛豬, 布達佩斯(Budapest)鏈子橋,多瑙河,作曲家李斯特(Liszt), 水球,劍擊,浸溫泉,大鱷索羅斯(Soros),電腦之父馮紐曼(von Neumann)。

大賽經驗:大把,拎過世界盃第二添。但 86 年後絕跡所有大賽決賽周。

代表作:不幸地,係冇嘅。

球星:冇得講,一定係門將基拿利(Király)。最易認當然係佢條晨運褲/睡褲。咁多年都係咁嘅造型。對,我讀大學時已睇緊佢踢波!當時代表哈化柏林(Hertha Berlin)踢歐聯添,最記得都係條褲。

要談匈牙利,絕對少不了睡褲門神基拿利。(Getty Images)

當時睇佢係 1999 年,如今佢老人家已經過咗 40 歲生日。若果佢上陣,會破紀錄,成為歐國盃決賽周年紀最大嘅球員。而佢呢幾年都仲係正選,早已經係代表匈牙利次數最多嘅球員。老人家仲得唔得?6 月頭匈牙利作客友賽德國,見佢身手都仲幾好。

簡評:講匈牙利足球,你必定聽到講波佬講普斯卡斯(Puskás)。普斯卡斯當然係神級,但,1927 年出世呀大佬。對,所有匈牙利足球嘅光輝,都係阿爺嗰代嘅事。

匈牙利的光輝歲月已係咸豐年代。(作者攝於布達佩斯)

另一「阿爺年代強國」烏拉圭足球都復興,匈牙利都總算碌到入大賽決賽周,但明顯地,係受惠於決賽周 16 隊變 24 隊。外圍賽同組只係北愛爾蘭羅馬尼亞,都只拎到第三再附加賽晉級。有幾多實力,大家心照。

今次分組對住專殺弱旅的葡萄牙,C 朗拿度(Cristiano Ronaldo)拎神射手,就係靠對匈牙利呢場。另外仲有奧匈帝國年代的舊相好奧地利,而奧利地在外圍賽 9 勝 1 和。

仲有係首次亮相嘅冰島都不太好惹。3 場貨仔,有得睇好睇,求神拜佛望基拿利唔好傷,破完紀錄可以執嘢走。

【九位球迷博客講波經就叻,估波又如何?不如睇睇佢哋嘅心水隊伍同預測!】

(本文純屬作者意見,不代表香港01立場。)
你可能感興趣