【01博客咁睇波】評盡歐國最值得期待的11位新星

撰文:李聲揚
出版:更新:

世界盃同歐洲國家盃(下稱「歐國盃」),除咗睇大牌球星,梗係想睇有乜新星可以一戰成名;
但由於資訊愈嚟愈發達,某國球星一鳴驚人嘅例子,愈黎愈少;
要睇新星,只能靠睇年輕人。歐洲足協選咗今屆歐國盃最值得期待嘅 11 位新星;
資格係要未過 21 歲。陣容如下:

11 個球員全部都代表國家隊唔夠 10 次,絕對夠新鮮感。傳統足球強國西班牙、德國、法國、英格蘭、葡萄牙都有人入選。獨欠意大利。難怪意大利被視為老鬼當道後繼無人。

小弟睇開德甲,德甲球會近年相當重用年輕球員。呢個 11 人陣容入面,6 個年輕人踢德甲(ok,其實有兩個踢完歐國盃先轉會。)非德甲嗰幾位亦咁啱有睇過下,又同大家介紹下呢堆球員。踢德甲嘅講多兩句,踢英超嘅大家咁熟,我就講少幾句。

1. Rico

西班牙嘅 3 號門將,已經超過 21 歲。點解仲入選?因為 24 隊當中根本冇一個唔夠 21 歲嘅門將。年紀輕輕已經捧走兩次歐霸盃,因為佢踢西甲球會西維爾。上季歐聯分組賽佢都仲係球會一號門將,但去到歐霸盃淘汰賽已經被同鄉 Soria 搶去正選。佢在歐國盃上陣機會,微乎其微。不幸地主要競爭對手 De Gea 都只係 25 歲,在可見將來都會在國家隊壓住佢。

2. Bellerín

呢位西班牙守將香港球迷亦會比較熟,因為佢效力英超阿仙奴。佢亦入選上季英超 PFA 年度最佳陣容,阿仙奴得佢有份。西班牙人才濟濟,佢今年 5 月尾先首次代表西班牙,在國家隊暫時上陣機會唔多,但到未來幾年老一代退下來,應該好有機會成為國家隊主力。

3. Elvedi

呢位瑞士中堅,名氣應該係 11 人陣容中最細嘅。效力德甲慕遜加柏。上季都有啲機會上陣,歐聯分組賽都踢過,但表現麻麻地。今屆瑞士小勝阿爾巴尼亞場波, 佢冇份踢。不過瑞士正選中堅 Djourou 表現不穩,佢都仲有機會上陣嘅。再唔係,就要等到下季德甲,或者歐聯了。對,慕遜加柏拎咗德甲第四,有機會入歐聯分組賽。

【歐國盃最新動態、分析及球評,盡在 01博客 x 01Sports 歐國盃專頁!(按此進入)】

4. Kimmich

德國新星,可以打中場或後防,名氣亦唔細,主要因為佢踢德甲班霸拜仁慕尼黑。拜仁上季後防傷兵滿營,主帥 Guardiola 將原來踢中場嘅佢,調去「客串」中堅。效果嘛,還可以啦,至少拜仁夠膽歐聯都畀佢踢正選。今屆德國首場對烏克蘭,佢冇份踢。但中場 Khedira 似乎麻麻,右閘 Höwedes 亦唔多掂。佢絕對可以補上,但出名保守的德國主帥 Löw 夠唔夠膽派佢上陣就另一回事。

5. Coman

法國翼鋒,11 人陣容中我最鍾意嘅球員。出道於法甲巴黎聖日門,之後轉去意甲祖雲達斯,祖雲達斯再將佢外借去德甲拜仁慕尼黑。去到拜仁佢就大放異彩。似乎巴黎聖日門同祖雲達斯都走寶了。最初我都以為佢只會在「垃圾時間」出下場,完全估唔到佢一嚟到就成為拜仁主力。

雖然只係借將,但拜仁有權在下年 8 月借用期滿後,用 2,100 萬歐元將佢買斷。以佢上季在拜仁嘅表現,拜仁必定會咁做。代表作當然就係上季歐聯,佢作客倒戈祖雲達斯入波,將「母會」踢出局。

今屆歐國盃開幕戰佢已有上陣,係決賽周上陣最年輕嘅球員。未夠 20 歲,已經拎過法甲意甲德甲冠軍,前途無可限量。

6. Renato

葡萄牙嘅全能中場,外型同踢法都令人諗起荷蘭名宿 Davids。上季踢緊葡萄牙賓菲加,來季會加盟拜仁慕尼黑同 Kimmich 及 Coman 做隊友。佢由賓菲加轉會拜仁,轉會費係驚人嘅 4,500 萬歐元。有幾誇?呢單交易創下葡萄牙聯賽本土球員紀錄,同時亦係拜仁史上第四貴收購,而佢只不過係 18 歲。

佢會唔會在決賽周為葡萄牙上陣仲係未知之數,但入選 23 人大軍,就已經令佢破左 C 朗拿度(Cristiano Ronaldo)紀錄,成為最年輕踢大賽決賽周嘅葡萄牙球員。

7. Alli

英格蘭嘅 Alli 香港球迷相當熟悉,唔使我多講。效力英超熱刺,上季的 PFA 最佳年輕球員。歐國盃英格蘭對俄羅斯佢亦正選上陣,踢足 90 分鐘,雖則表現未必係隊中最好。我少睇熱刺,最記得反而係今年 3 月尾,英格蘭友賽作客德國,半場落後兩球,最後反勝三球。Alli 在中場助攻助守,完全有佢偶像利物浦名宿謝拉特(Gerrard)的風範,佢亦被 BBC 選為該仗最佳球員。

8. Sané

德國的中路攻擊球員,踢史浩克零四,而史浩克近年青訓相當出色。Sané 好快已經成為主力,亦係上季球會表現最好嘅球員之一。代表作當然係 2014/15 歐聯賽季,史浩克作客勝皇家馬德里。雖然史浩克最後都係出局,但佢嘅入球已贏盡好評。

今屆歐國盃佢未有機會上陣,一度見到佢在場邊熱身,但最後領隊 Löw 冇換入佢。德國隊中路攻擊球員甚多,佢要上位唔容易。下季史浩克冇歐聯打,佢 2017 年夏天約滿,好有機會轉去大球會。

9. Martial

英超我主要睇曼聯,法國嘅 Martial 就係 11 人陣容中兩位曼聯球員之一。2015 歐洲金童獎得主。由法甲摩納哥加盟曼聯時,轉會費 3,600 萬鎊,破晒年輕球員紀錄。第一次後備入替為曼聯上陣,立即有波入。之後第一次正選就梅開二度。完全係夢幻開局,對得住身價。可惜依然救唔到曼聯,亦救唔到領隊雲戈爾(Van Gaal)。

歐國盃首仗,佢同 Coman 都有後備入替,但建樹就唔多。法國始終前鋒線令人有啲擔心,Benzema 又冇入選。Giroud 久攻不下之時,除咗靠 Payet,Martial都係選擇之一。

【九位球迷博客講波經就叻,估波又如何?不如睇睇佢哋嘅心水隊伍同預測!】

10. Rashford

另一曼聯球員,另一神童,仲要係英格蘭球員。同 Martial 差不多嘅夢幻開局,但並唔係貴價買入,而係自己青訓,更加傳奇。上屆歐霸盃 32 強,曼聯首回合輸波,次回合神童一號 Martial 熱身時傷埋,造就佢擔正。結果梅開二度,救返雲戈爾。3 日後,佢在英超處子上陣,又梅開二度!

神奇之旅延續到去國家隊,佢首次為英格蘭上陣,就為球隊先開紀錄,當時距離佢為曼聯首次上陣只有 4 個月。呢條路,同 Rooney 當年有啲似。英格蘭盛產神童,Rooney 在 2004 年歐國盃就技驚四座。

不過今屆歐國盃,英格蘭在 Hodgson 領軍下,英超當紅炸子雞 Vardy 都先列後備,首仗 1 分鐘都冇得出。佢想複製 Rooney 的奇蹟,就有點難度。出都冇得出,點入波?

11. Emre Mor

最後一個,土耳其的 Mor,現於丹麥踢波,但下屆會轉去德甲球會多蒙特,有機會在歐聯舞台見到佢。土耳其輸畀克羅地亞場波,已經有派佢後備入替。暫時就睇唔到呢位「土耳其美斯」有邊瓣比得上正牌美斯,但至少佢落場已經破左紀錄。今屆上陣過嘅球員當中,佢就最年輕(Rashford 仲未有機會上陣,而執筆之時 Renato 的葡萄牙未踢。)

 

【編按:圖片來源為歐洲足協官方網站。】

(本文純屬作者意見,不代表香港01立場。)