【01博客咁睇波】德法中場攻防戰

德國過完意大利這一關，可以話係元氣大傷，中場線傷嘅傷、停嘅停，究竟可唔可以再進一步呢？
陣中大將曉姆斯今仗停賽，對於德國嚟講可以話係極大損失，加上保定能否出戰成疑，所以德國今仗可以話係非常難打。

德軍傷兵多中場弱　需防法國快速反擊

如果保定可以出場，要守住法國靚仔前鋒基奧特應該較為輕鬆；但對住靈活多變嘅基沙文，無論係梅斯達菲、賀維迪斯等，都未必可以完全「凍結」此子。過去兩仗已經發現，法國打雙箭頭十分吃香，「由基奧特幫基沙文開路」依條方程式十分有效，能否守得住基沙文勢成關鍵。

中場方面，傷兵有基拉迪、小豬，防守中場立即成為弱點。幸好法國中場單打獨鬥比團隊合作較為出色，如果貼身防到皮耶、普巴等都應該問題不大。法國中場守強於攻，無論尼高路簡迪、馬度迪、舒拉達連都係防守型中場，而且創造力強嘅卡比耶速度相對較慢，防守應該問題不大，但進攻上相對地有問題了。

德國中場線多為技術型，行軍速度亦快，組織進攻都一直猶如行雲流水。但今仗對方有普巴、尼高路簡迪、馬度迪等速度破壞力都一流嘅中場，能唔能夠再好似之前咁就真係好大疑問。今仗中場攻防戰應該會幾好睇，最怕係久攻不下，比法國快速反擊就出事了。因為上述防守中場，加上穆沙施素高、皮耶都係爆得之人，如果一不留神，就好容易中招失波。

前鋒線上，無咗高美斯，問題大唔大呢？其實兩睇。

德國絕對有能力打「無鋒陣」，但相對地容易防守。舒賀爾尼同普多斯基都係翼鋒底子，要佢地正面衝鋒可能有點吃力。高空波一定輸晒，法國有阿爾拉米復出，加上文加拉同哥斯尼都可以頂住高波，所以高空波已經唔可以成為德國嘅攻擊招數。

咁無鋒小組推進呢？法國有經驗老到嘅艾拉同沙格拿兩邊守住，迫住德國要喺中路入涉，但又談何容易？阿爾拉米同哥斯尼唔算得上係慢嘅中堅，加上防中協力，要滲入法國敵陣就算唔係天方夜譚，都唔會係一件容易嘅事。只要艾拉同沙格拿唔咁快畀人消耗晒體力，相信有能力保住不失。

問我？我個人認為法國贏面大啲嘅。

（本文純屬作者意見，不代表香港01立場。）