容祖兒年年都幫果間大型電器店拍廣告，最近有個新嘅出街，
入面好搶鏡果幾個西裝友，可能係令容祖兒最接近MMA嘅一次，
最搞笑係果個重要人物仲要無嚟香港。
（圖片來自英皇娛樂 EEG Facebook）
除非呀劉師兄去打比賽，或者容祖兒參加G-1，如果唔係我估Joey同MMA嘅聯繫最近都算係呢一嘢。
廣告入面果幾個西裝友，係一隊跳舞唱歌組合，叫World Order，跳同步機械舞跳得好好睇（其實我唔識應該點叫呢種舞，而且好多人解讀究竟咩意思，但跳舞方面我真係咩都唔識），下面係其中一首歌嘅MV，記得唔好齋聽唔睇呀。
講咗噤耐都未講同MMA有咩關係。呢隊組合嘅創辦人、導演同主唱係我偶像，叫須藤元氣（須藤元気，Sudo Genki），係一位好好好出名嘅日本前綜合格鬥家。佢果時已經係格鬥界入面嘅一個奇葩，就講佢出場同打法有幾奇。
佢嘅出場超級無敵誇張華麗，誇張到想講「唔洗吓話？」。當大家出場都係想留力，所以慢慢行出場，佢就要帶晒道具咁跳住舞出場，有時仲要唔係一個跳，係一大班人一齊跳！無錯，果時日本MMA出場係講究過現時UFC好多，但係都唔洗噤大陣像掛？仲誇過當年拳擊手Naseem Hamed「王子」個萬聖節出場。
（左面係Naseem Hamed，右面係須藤元氣，出個場都玩埋千手觀音）
另外，講吓打法。左右換架、後旋踢、轉身鞭鎚呢D嘢，其他人就係奇招，對須藤生嚟講濕濕碎。打打吓跳舞、無啦啦背脊向住對手、屁股行先、緩步跑，未見過啦掛？唔好以為佢單純玩嘢贏唔到嘅人，佢地面技術好勁，21場MMA比賽入面16勝之中，有12次來自降服。
佢並唔係力量型選手，好多時候可以贏到，除咗因為佢純熟嘅技巧之外，就係因為人地完全估佢唔到。你以為佢出拳咩？佢抱摔；你以為佢出摔咩？佢起腳。仲有，你有幾可練習果時搵到個人背脊對住你？當佢緩步跑同跳舞果時，你面對緊個陌生嘅情況，而打拳最忌就係唔知點算。
你無任何準備，但係佢就有。正所謂「以正合，以奇勝」，人地估你唔到就好難防守，難防守就比你帶住個節奏走，你帶到個節奏即係可快可慢、可進可退，想唔贏都幾難。
每次贏咗仲會舉張「We are all one」banner。
2006年後佢無再打MMA，2009年成立咗WORLD ORDER，幾年來不斷放MV上youtube，做埋網絡紅人。不過2015年又宣佈退居幕後，只做WORLD ORDER嘅製作人唔出鏡。除咗搞音樂之外，佢仲出咗10幾本書，認真百足噤多爪。
其實打拳，我自己好鍾意基本招式，愈簡單愈基本，我就愈鍾意。但係須藤元氣呢種跳來跳去、誇張又寸嘴、複雜又奇怪嘅打法，有一種莫名嘅魔力，吸引你去睇，令你想學吓佢，但同時你又知道呢世都做唔到。除咗佢之外，古今中外都未再有一個噤有特色而又成功嘅拳手。
果時得知WORLD ORDER嚟香港，仲以為係拍片，點知係廣告，仲要須藤元氣唔嚟！結果，容祖兒最接近MMA嘅一次，都仲係經幾層先連繫到。
吓？原來我做咗標題黨？無所謂啦一次半次，為我偶像，比我做一次丫。
今日係噤多！
（文章圖片來自youtube截圖）
（本文純屬作者意見，不代表香港01立場。）