【武術01ＸPokemon GO】真係好想捉比華拉同沙古拉

一開始選咗車厘龜，我專登嘅。
太早捉比卡超會好低Lv唔夠勁㗎（好似係）。

不過大師兄最想要都係比華拉（右面）同沙古拉（左面）。我係唔會叫佢地做咩快拳郎、飛腿郎嘅。如果有人知邊度有記得同我講。

無理由喺呢到單講寵物小精靈嘅，梗係要講下武術野。呢兩隻小精靈係最頭果151隻嚟，個樣一望就知道係格鬥系啦。而佢地同真實嘅格鬥家都有關㗎。

比華拉，日文名叫 Ebiwalar，取自一位日本拳擊手，叫海老原博幸（Ebihara Hiroyuki）。沙古拉，日文名叫Sawamular，取自一位日本Kickboxer，叫沢村忠（Sawamura Tadashi）。佢地兩位都係日本格鬥界入面嘅前輩，不過年代唔同，大家睇返佢地嘅比賽可能會覺得都唔係好特別。沢村忠七幾年果時紅到出埋動畫，有興趣可以睇一睇。

但係呢兩隻小精靈個英文名來源，大家一定識。

比華拉英文名叫Hitmonchan，沙古拉英文名叫Hitmonlee。Hit即係打，Mon即係Monster怪獸，講到呢到大家都心裡有數，Chan係指老是常出現嘅成龍Jackie Chan，Lee就係咩遊戲只要同格鬥有關就關佢事嘅李小龍Bruce Lee。

每隻格鬥遊戲都會有個「李小龍」，打法企法小動作都係李小龍咁：街霸有Fei Long，Virtua Fighter有Jacky Bryant，生死格鬥有Jann Lee，鐵拳有Marshall Law 同Forest Law兩父子，再講落去應該可以講到聽晚。

既然隻隻遊戲都有李小龍，一隻識踢人嘅小精靈叫Hitmonlee，都好合邏輯。不過，出腳嘅係Bruce Lee都明丫，但係點解拳擊樣嘅比華拉係成龍，呢個真係千古難題，唔通外國人只係識佢兩個？

其實鐵拳同寵物小精靈合作，出咗作叫Pokken Tournament嘅遊戲（Pokemon同Tekken即鐵拳合體）。隻遊戲係控制一隻小精靈同人打鬥，而唔係叫佢出招禁簡單，好巴閉。

但好笑嘅係Pokken Tournament無比華拉同沙古拉，而有兩隻比卡超。

小師妹話Pokemon Go入面最想捉喵喵怪，但係我見周圍都係得波音蝠......

（圖片來源為Robb Gallegos的Facebook）

（本文純屬作者意見，不代表香港01立場。）