【香港球員TALK3】南華兄弟班梁冠聰梁諾恆的球衣故事(上)

撰文:波三痴
出版:更新:

「波衫,對我嚟講,係一種榮耀。如果有特別意義嘅,好似香港隊波衫咁,就更加係無上嘅光榮。」大佬梁冠聰道。
細佬梁諾恆補充:「仲有係一種使命。好似着上香港隊嘅波衫,就代表住香港 700 萬人,去為香港爭取最好嘅成績。」
剛剛上山(加盟南華會)的兩兄弟,說出了波衫對他們的意義。

梁冠聰、梁諾恆兩兄弟今年一同加盟南華會。(相片由梁諾恆提供)

細佬再補充:「仲有一份責任,因為着上波衫,就要為球隊,無論係香港隊定係球會球隊,負上責任,付出十二分嘅努力去做到最好,直到完場或是被換出為止。」

梁冠聰、梁諾恆兄弟班,一起由香港飛馬轉會南華會。可能很多球迷都會有個疑問:上季如此好成績,又有兩個冠軍,為何會一起上山呢?

南華會邀請 沒有拒絕的理由

原來剛剛上山的兩兄弟,並非同時決定上山。

「其實我哋係唔同時間收到南華邀請,係細佬先決定,然後到我。我同細佬嘅合約期都有分別。」大佬道。

細佬亦說:「其實加盟南華會呢個決定,係因為由細到大都知道,南華會係香港數一數二嘅大球會;而我自細就鍾意曼聯,南華會畀我嘅感覺,就好似香港嘅曼聯一樣,因此代表南華會都可以話係我自細嘅夢想。」大佬接着說:「而且南華會歷史上都有好多好成功嘅球員,亦贏過好多唔同嘅錦標,所以佢嘅歷史背景都深深吸引到我。所以當南華會邀請我時,都好難有理由去拒絕。」

兩兄弟亦同時道出,南華會最吸引人之處,莫過於其配套設施。有自己的訓練場地、健身房,甚至宿舍,而且全部都歸納於同一個地方,感覺上更職業,這些都是其他球會暫時未能做到。

兩兄弟感情十分好,自小便一起踢足球。(相片由梁冠聰提供)

曼聯超級盃球衣 代表大佬對足球的決心

講到波衫,大佬話首先一定要講呢一件。

「呢件係 2006 至 2007 年曼聯超級盃波衫,我地(深水埗U15)喺香港贏咗冠軍,代表香港去新加坡踢賽事,如果贏咗會去奧脫福。當年曼聯超級盃對我嚟講,係一件好大嘅事,亦係我哋一班人跟住堅 sir(李志堅)踢咗十年八年嘅原因。呢件衫係代表住我同一班兄弟,為咗去奧脫福呢個夢想,一齊奮鬥嘅故事,所以呢件衫對我嚟講係好有意義。每當見到呢件波衫,就會諗返起以前一星期練足 6 到 7 日波,為嘅就係想贏一個盃。雖然我哋喺新加坡最後輸咗,但係同時亦令到我同一班兄弟決心去踢到香港最頂級嘅聯賽,所以如果無呢件波衫,就唔會有今日嘅我。」

2006 至 2007 年曼聯超級盃球衣,在背號可以看到曼聯超級盃字樣,是大佬下定決心向足球發展的見證。(相片由梁冠聰提供)

橫濱球衣 印證細佬職業球員夢

「至於呢件,我就係英國返嚟之後,第一年踢職業球隊嘅波衫——橫濱。」細佬開始介紹。「我揀咗 12 號,係因為當年喺英國踢波得到全年最佳球員時,係着 21 號嘅,所以自己覺得 1 同 2 呢兩個號碼組合幾旺我。但當時由於 21 號已經有人着咗,所以我揀咗 12 號,同樣都係 1 同 2 嘅組合。呢件衫意義在於見證自己真正成為職業球員,亦好多謝李 sir 畀咗呢個機會我,而且仲好重用我,令我得到香港聯賽第一個入球,第一次入選香港隊(初選),一切都好夢幻,因此呢件波衫對我個人嚟講,係好深刻同好有意思。」

細佬梁樂恆首次踏足職業舞台的球衣,當中經歷首個入球和首度入選港隊,意義重大。(相片由梁諾恆提供)

全球選拔足球運動 The Chance 一次機會大佬重拾信心

「第二件我揀嘅波衫,就係黑色呢件。」大佬道。「 2011 年我喺香港時,Nike 搞咗個全球選拔足球運動叫 The Chance,喺全球選拔出 100 位好手,然後喺英國決賽選出 8 名球員,佢哋就會得到一份職業球員合約。我好好彩,喺香港選拔賽時勝出,雖然到上海時就輸咗,但由於上海球員簽證問題,未能到英國出戰,所以就由我補上。」

2011 年Nike "The Chance" 全球選拔足球運動球衣(相片由梁冠聰提供)

「我亦都好好把握呢次機會,喺英國倫敦最後決賽入選最後 32 強,亦都成為中國代表地區成績最好嘅選手,只可惜最後未能得到職業球員合約。」

「其實喺曼聯超級盃後,曾經有段時間認為自己無咩進步,對自己嘅實力有所懷疑。但正正因為果次英國之行,同世界各地好手較量,令到我視野闊咗,同時亦都畀到好大信心自己,可以喺全球好手中企穩一個席位。對我自己嘅足球事業,有好大鼓勵同肯定。」

原本只想着在世界大舞台享受足球的梁冠聰,完全想不到可以在這個大大舞台上散發耀眼光芒,而且更令到他學習獨立、學會專注,希望能夠突破自己,在足球事業上有更好成就。亦都因為這次經歷,令大佬肯定自己必須要走上職業足球員這條不容易走的路。

南華對祖雲達斯之戰 難得學習機會

有比賽日印字的祖雲達斯球衣。

南華將於本月 30 日,在香港大球場約戰意大利甲組聯賽冠軍祖雲達斯。雖然祖雲達斯大部分主力或一線球員未必會隨隊來港,但問到兩兄弟最想同哪位選手較量時,他們都選擇同一為球員:保羅戴巴拿。兩位都認為保羅戴巴拿是近來冒起最快的新星,而且速度與射術上乘,個人突破能力十分高,因此最想與他較量。

細佬希望能在祖雲達斯身上學習:「雖然今次大部分主力未有隨隊來港,但對方始終係意甲冠軍,相信隊中球員無論在速度、視野、技術都有好多值得我哋學習嘅地方。」

而大佬亦表示十分期待:「今次係我哋真真正正第一次代表球會對外隊,期待之餘,亦有雙重意義。細個就睇外隊睇得多,今次終於有機會對外隊,好想睇下自己同歐洲一線球員嘅分野有幾大。另外一個意義就係如果當日有幸落場比賽,就會係我哋兩兄弟第一次代表南華會嘅正式比賽。」大佬愈說愈起勁:「另外我亦好期待同卡華禾艾沙姆較量,始終身為中場球員,都想同同位置嘅球員較量。」

下一回將由兩兄弟介紹他們是如何走上球員之路。

(本文純屬作者意見,不代表香港01立場。)