【香港球員TALK３】南華兄弟班梁冠聰梁諾恆的球衣故事（下）

上篇提到剛剛上山加盟南華會的兩兄弟梁冠聰、梁諾恆，說出了曼聯超級盃、Nike 全球選拔足球運動波衫對他們的意義。今回將談談他們成為球員之路。

如果有留意梁冠聰、梁諾恆這兩兄弟，絕不會對他們兒時的身型感到驚訝，而他們亦承認自己同屬「肥底」身型。究竟他們如何付出才可以保持現在的運動員身型呢？

「其實以前會比較辛苦同在意，減肥果陣所有有汁嘅嘢都唔食，飲嘢就只會飲清水。可樂呢類飲品真係掂都唔敢掂。慢慢久而久之，就習慣呢種清淡為主嘅飲食習慣。始終知道自己係「肥底」，所以都唔敢點亂食嘢。有時候放假如果真係食多咗，都會去健身，保持自己嘅運動量，唔畀機會自己肥返。」細佬說得輕鬆，但減過肥的人都知道，其實需要絕大決心與毅力才能成功。可能就是這一份決心與毅力，不單令他們成功修身，更成功踏上職業足球員這個行列。

「講返波衫，我揀嘅第二件嘅係香港隊。呢件係我參加仁川亞運嘅波衫。雖然自己自細加入香港青年隊，但自從去咗外國之後，就好似同香港足球絕咗緣咁，無返過嚟踢同香港有關嘅賽事。」原來細佬頗為在意在英國那段日子的香港足球真空期。「好彩當時 Kim sir 選擇咗用較年輕球員去角逐亞運，令我同阿哥都得以入選，而且仲得到分組賽兩勝一負唔錯嘅成績。仲第一次感受到代表香港人嘅果種光榮，全香港都支持住我哋去比賽。」

「而且果次比賽學咗好多嘢，記得輝哥（葉鴻輝）以超齡球員身分帶領住我哋一班年輕人，佢嘅經驗同提場都幫到我哋發揮，無論係場外定係場內，佢嗰份感染力，成為我嘅學習對象。」的確，葉鴻輝除了把關技術出色，最出名的就是那份「永不放棄、打不死」的精神。如果有親身體驗過他的比賽，就會明白梁諾恆講的那份感染力。

「最後，就係上年香港飛馬嘅波衫。其實 3 年職業球員生涯，一直都係踢中下游球隊，相對嚟講算係無乜壓力。而第一次感到有壓力就係踢香港飛馬。因為無論規模、訓練模式等，都會畀我以往效力嘅球會較為優勝同埋要求更高。」一向香港飛馬（以及前身太陽飛馬）都打着積極組軍及爭取冠軍的口號，細佬首次感到職業球員的壓力也不感意外。「以往踢得好就可以，勝負可能無咁重要。但喺香港飛馬，踢得好並唔足夠，最低要求係要贏波。季初比較差，銀牌同聯賽盃都爭標無望，好彩最後James （Kevin Bond）帶領我哋殺入足總盃同菁英盃決賽。」

「感覺其實好特別，無論決賽對手係邊個，嗰種心情真係好難形容。始終係自己第一次踢決賽，所以既緊張又興奮。最後我哋歷史性咁喺 4 日內奪得兩個盃賽冠軍，令我心情由緊張興奮，變成激動。」記得當日在大球場捧盃一刻，的確令人無限激動。

「加上首次踢決賽就可以贏得獎盃，更加係我職業生涯上首個獎盃，因此呢件衫對我嚟講真係好有意義。當日我仲可以着住佢，同父母、阿哥、女朋友一齊去分享嗰種喜悅，相信我呢世都唔會忘記。」

到大佬介紹最後一件球衣：「我自己最後一件揀嘅，係我第一場代表香港踢 A 級國際賽嘅波衫，當日場波對住越南。」原來球員真的會記着自己賽事級別！「其實每個球員都希望可以代表自己嘅地方踢波，都希望可以成為球隊常規正選，為自己嘅地方出一分力。嗰種榮耀對我嚟講係大到無法形容，因為你係代表住自己嘅城市（香港只能代表城市），代表住全香港七百幾萬人去比賽。」

「因此呢件波衫，係代表住自己踢咗 5 年職業賽事後，終於真正代表香港一隊，踢 A 級賽事嘅里程碑。見證住自己幾年嚟嘅努力同肯定。因為香港雖然唔係一個好大嘅地方，但要入選香港隊亦唔係一件容易嘅事。因此，呢件衫令我明白到得到各界嘅認同，就唔可以令佢哋失望。要更加努力，去令自己進步。」

聽着兩兄弟的介紹，發覺兩位很有禮貌，而且十分正面。憑着自己的努力，去爭取更好的成績，裝備自己，想着為球隊、為香港付出自己的一切，這種態度十分值得我們借鏡。當然除了自身的努力外，在兩位身後支持着他們的家人、女友都十分重要。在此希望兩位愈踢愈好，能在南華會及香港隊取得更大成就，繼續向着他們的夢想進發！

（本文純屬作者意見，不代表香港01立場。）