西甲第三勢力：一路走來西維爾

講起而家西甲勁旅，你會諗起咩？
幾年前被戲稱「西超」嘅巴塞隆拿及皇家馬德里，近年可以加上喺2013-14贏過一次西甲嘅馬德里體育會。
不過當洛迪高打開西甲聯賽榜，突然發現緊隨皇馬同巴塞嘅，唔會馬體會，而係西維爾。

文：洛迪高@世界波

提到西維爾，大家會諗起佢哋連贏咗三屆歐霸盃，令該盃賽畀人改名做「西維爾盃」，但喺西維爾「壟斷」歐霸盃前，佢哋帶畀球迷都有唔少深刻印象。

歐洲黑店

如果要講歐洲黑店，波圖近年係表表者，但再之前，西維爾唔洗客氣，直接認第一都得！如果大家記得波圖做黑店嘅手法，就係多數由南美聯賽 / 甚至乎較低組別聯賽以超平價買入年青球員，然後用心培養，等到打起咗就轉售圖利。由於唔似葡超競爭較細，波圖有更多大空間用後生球員，而西維爾喺西甲咁做可能要負上好大代價，不過喺本世紀初，呢個策略都好成功！

其中一個大成功（即係大賺）案例，係而家名滿江湖嘅丹尼爾（Daniel Alves）。西維爾先以50萬歐元由當時身陷財政危機嘅巴西球會巴希亞借入當時僅得19歲丹尼爾，到翌年一月轉會窗就以55萬歐元完成收購，其後丹尼爾表現受到班霸巴塞青睞，並於08年26歲時以3,550萬歐元轉會到巴塞，西維爾賺達3,445萬歐元……

做得黑店打開門口做生意，賣得畀巴塞緊係要向皇馬落手，今次主角同樣係巴西人－巴迪斯達（Julio Basptista）。03/04球季，西維爾由聖保羅以350萬購入當時21歲嘅巴迪斯達，巴迪斯達其後入球如麻，惹得皇馬垂涎三尺，兩年後就以2,000萬歐元轉投皇馬，淨賺1,650萬歐元。

除咗呢兩位表表者，當然仲有唔少成功案例，好似同樣被賣去巴塞嘅基達（幫西維爾賺1,000歐元）及呢季轉投馬體會，幫西維爾賺咗2,450萬歐元嘅加美路（Kevin Gameiro）……

青訓出色

作為歐洲黑店，西維爾除咗高價賣出外地球員外，仲會賣優質青訓產品，數目仲唔少！其中一個代表係而家皇馬隊長沙治奧拉莫斯（Sergio Ramos）！喺03/04球季終於踢上一隊嘅佢係翌季爆起，最終係05/06球季就以19歲之齡加盟皇馬，西維爾就此淨袋2,700萬歐元。另一位就係「電單車」雷耶斯（Jose Antonio Reyes），佢喺03/04球季以2,000萬歐元加盟英超阿仙奴。至於另一位快速翼鋒捷西斯拿華斯（Jesus Navas）亦都喺克服自己「外流恐懼症」下於13/14球季以2,000萬加盟英超曼城！

邊線好手

講起西甲嘅邊線進攻，除咗畀引為笑資嘅網絡名言——「祖亞昆維辛迪雙翼齊飛」外，西維爾嘅邊線攻擊都令人聞風喪膽，佢哋仲出產唔少優質翼鋒！除咗上述提到嘅拿華斯及雷耶斯外，仲有同樣同樣由球會有份養成（由其他球會購入年幼球員至青年軍或自家青年軍）嘅迪亞高卡普（Diego Capel）以及柏洛迪（Diego Perotti）！配合埋左右二閘後上同前鋒搶點，西維爾邊線進攻已經成為安達盧西亞一個名勝。

組軍微調

雖然經歷過歐霸盃前身歐洲足協盃兩連霸，與及轉會市場屢獲巨利嘅球場內外輝煌，不過西維爾都有一段時間喺成績及轉會市場上比以前較為遜色。其中更牽涉一齣球壇悲劇-佩亞達（Antonio Puerta）猝死…呢位死時年僅22歲嘅西維爾青訓產品本來大有前途，可惜人生卻在2007年對基達菲的西甲賽事中因心臟病迄然而止...及後西維爾雖然都可持續參加歐洲賽，但表現都未見突出。

至於一直引以為傲嘅轉會手段都無以前咁神，始終低價購入年輕球員始終係一個賭博，西維爾都難以確保佢哋水準，好似丹尼爾般嘅慧眼識英雄，簡直不可能再複製。雖然其中有好似現時效力國際米蘭嘅法國中場干度比亞（Geoffrey Kondogbia）嘅例子，但首席黑店之名已經畀波圖搶咗。至於西維爾引以為傲嘅青訓，成材嘅質量同數量都無之前咁勁，近年較突出嘅就係現時效力利物浦嘅左閘艾拔圖摩蘭奴（Alberto Moreno）及仲踢緊一隊，最近入選過西班牙國家隊嘅門將沙治奧列高（Sergio Rico）。

或許意識到一直做賣家球會除咗成績難以穩定（雖然而家都幾穩定，但無可否認係由南美或其他聯賽搵番嚟嘅「璞玉」已經無前人咁犀利），近年西維爾都開始多向其他地方失意軍人埋手，或者利用最實惠嘅借用方式去提升球會實力，當中如果加上優先買斷條款，雖然及後轉售未必搵到好多錢，但都叫做有錢賺。

近來例子除咗有上面提過，因為喺巴黎聖日耳門不受重視而希望轉會嘅加美路外，仲有喺多蒙特失意，喺西維爾搵番信心嘅意大利鋒將恩莫比利（Ciro Immobile，已轉會意甲拉素），今季就有分別喺聖日耳門及曼城失意嘅門將施列古（Salvatore Sirigu）及中場拿斯尼（Samir Nasri），其中拿斯尼仲表現出色，再加上喺法甲球會圖盧茲加盟嘅26歲鋒將賓耶達（Wissam Ben Yedder）及曾經嘅中場天才甘素（Ganso，由巴甲聖保羅來投）。

西維爾亦無忽略向年青球員埋手，包括向馬體會借用前鋒韋圖（Luciano Vietto）同埋卡尼維達（Matias Kranevitter），不過比起以前轉賣球員，西維爾都係幫馬體會練兵俱多。由於可見，西維爾對轉會政策嘅調整，比起以前搵錢為上，到而家成績似乎佔先，始終有成績（如持續打入歐戰）先會有更多收入，而倚靠球探能力或運氣搵到好球員而唔會畀其他球會搶走嘅難度越嚟越高，咁嘅路線似乎的確更健康及合理。

（文章純屬作者意見，不代表香港01立場。）