【足球．博評】紅魔成功反彈　摩連奴做咗啲乜？

雖然現時曼聯僅排第六，落後榜首車路士 10 分，落後歐聯區 3 分（截至 2017 年 1 月 11 日）。不過近來所有賽事 15 場不敗，加上超聯最近 6 戰全勝，無論場上表現及最後比數都「魔性澎湃」，擺脫季初嘅疲弱表現。
「魔君」摩連奴（Jose Mourinho）似乎搵到執教曼聯嘅方程式，令曼迷一片樂觀之聲，為費格遜爵士（Sir Alex Ferguson）退休後少見……
摩連奴縱橫球壇多年，有成功有失敗，曼聯季初到不敗開始前表現飄忽，令人擔心摩佬是否魔力不再，但要知道，摩佬始終係球壇最佳領隊之一，出名拗頸唔輸得嘅佢，3 年前錯過一次接費 Sir 班嘅機會，今次點會輕言放棄？
洛迪高為大家分析一下摩佬成功令紅魔近來反彈嘅一啲原因。

文：洛迪高@世界波

  1. 穩定陣容

摩連奴領軍其中一個風格，就係「小陣容」，一季下來可能長期使用同一班底，見嚟見去都係某幾個球員做長期正選，所以摩佬經常第三季就離開執教球隊，原因常被指係因為用得球員太盡（尤其老將），令第三季兵疲影響成績。不過喺執教曼聯初期，球會近年成績及人員使用唔算穩定時，摩佬揀定一個班底磨合，除咗可以增加球員默契，仲有助固定陣式打法，摩佬更容易亦更快將嘅戰術傳送畀呢幾年因為莫耶斯（David Moyes）及雲高爾（Louis Van Gaal）積累下來嘅沉悶以及單調而受影響嘅球員。近 6 場英超唔止成績好，球員表現配合同進攻亦比季初流暢及更有目標。

  2. 成功收購

雖然曼聯近幾季成績不佳，不過搵錢能力不減反增嘅曼聯投資並無減少，但收購嘅球員都難言成功，好似迪馬利亞（Angel Di Maria）更只係踢咗一季就走人。去到今年嘅新球員到球季呢個時間表現都算唔錯。

A. 伊巴謙莫域（Zlatan Ibrahimovic）：
先唔計人工，唔洗用轉會費就簽到戰神有唔少人讚，亦有質疑聲音，畢竟伊巴已經 35 歲，適唔適應到英超強度及瀕密賽程都係疑問。不過伊巴除咗用入球反擊外，喺前場嘅戰術作用亦相當適合球隊及英超——前場背身持球或 set 波，方便係禁區前沿做配合或者分波畀邊線。差唔多場場出晒嘅佢雖然有啲場次略顯疲態，但快車期間屢屢入波都令人相當驚喜，不過同時亦令球迷擔心佢體力問題……

B. 米希達利恩（Henrikh Mkhitaryan）：
開季時間遭遇受傷以及雪藏，上陣時間唔多而且落到場表現得仍需時間適應嘅「阿美利亞美斯」踏入冬天終於開始展示身價，對熱刺一箭定江山（可惜及後因傷離場），復出後就送上美妙絕倫嘅蠍子腳。除咗入球外，米希達利恩嘅積極回防、技術、配合及意識令球隊喺陣地戰以及反擊（摩佬最擅長嘅其中一瓣）都做得更加好。

C. 普巴（Paul Pogba）：
以全球最貴身價來投嘅法國中場加盟初期換髮型多過入波，而且位置變動較大，直到摩連奴決定重用卡域克（Michael Carrick）及靴里拉（Ander Herrera）後，普巴正式得到解放，正式成為球隊核心，雖然入波都未算多，但射波組織同幫助球隊攻守轉換都相當稱職，至於對唔對得住佢嘅身價，就可能要再努力啲啦！

D. 艾歷拜利（Eric Bailly）：
呢個之前名不見經傳嘅科特迪瓦中堅用接近 3 千萬英鎊（約 2.9 億港元）由西班牙黃潛艇維拉利爾加盟，不過佢一加盟就有好表現，佢嘅搶截、活力以及速度為曼聯增加唔少生氣同敏捷性，不過可惜季中佢要出戰非洲國家盃要缺席一段時間，相信摩連奴最想佢安安全全健健康康歸隊……

  3. 激活球員

如果激活唔到現今球員，有多多錢都唔夠洗啦！喺不敗期間最驚喜嘅莫過於兩位後防球員——鍾斯（Phil Jones）以及盧祖（Marcos Rojo）！一代「鍾斯」雖然出道時被視為天才（英式嗰隻），但加盟曼聯雖然表現唔錯，但傷多過踢，但近期竟然可以連續出場已經令球迷大喜過望，而且表現都不減當年，令曼聯球迷慢慢忘記上年表現都唔差嘅史摩寧（Chris Smalling）。

另一位驚喜球員當屬阿根廷後衛盧祖，加盟至今無論打左閘定左中堅只有少數場次有出色表現，雖然打左閘時助攻力有保證，但防守方面較毛燥經常令後防有危險，但由夥拍鍾斯開始，縱使兩位球員都被視為有勇無謀，但佢哋一齊產生嘅化學作用令人跌晒眼鏡，尤其盧祖變成定海神針，平時要人補位嘅佢竟然變得頭腦冷靜，屢屢為隊友補位。雖然盧祖攔截兇狠惹來爭議，但曼聯於不敗期間嘅防守表現得頗為穩健，盧祖及鍾斯功不可沒！

  4. 戰術

誠然，莫耶斯嘅 9981 斬只係出現過一次，但無可否認就算佢為曼聯買入創造型球員馬達（Juan Mata），但戰術上都無咩流動性以及創造力，如香川真司等走位靈動嘅球員一係無咩機會出場，就係上到場無咩表現。之後去到雲高爾執掌下，縱使佢執教荷蘭戰 2014 年世盃令人充滿期望，但嚟到曼聯佢嘅固執性格表露無遺，球員走位欠奉，所謂 killer pass 亦極少見，更多嘅係為控球而控球，橫傳回傳極多，就算購入迪馬利亞，球隊踢法都依然沉悶……

歷經呢兩位領隊，唔少人都話曼聯已經丟失費 Sir 治下嘅攻勢足球，而摩連奴來投後經過季初調整，現時似已慢慢擺脫前兩任影子及令球員慢慢忘記前兩任領隊嘅戰術思維，重塑曼聯踢法。

費 Sir 治下曼聯攻勢多由兩翼發起，以速度或反擊拖垮對手（費 Sir 曼聯後期於陣地戰其實不時老鼠拉龜），以及利用氣勢硬迫對手於重要時刻犯錯送禮。摩連奴執教曼聯初期，球隊戰術模糊，因此先會出現作客對利物浦時要擺一擺大巴，先求和對手，但然後又遭車路士痛擊……

近期曼聯場上表現得更有系統，隨住球隊陣容慢慢穩定，打法亦開始見雛型：以普巴及伊巴為中軸，配合邊線球員創造力盤扭、內楔及配合。除咗短傳，亦不忘長傳及傳中，令用伊巴身高優勢進襲，比上任雲高爾曼聯更防不勝防（雲高爾曼聯經常作無創造意味短傳，令對手及早補防，令球隊更難攻入對手腹地），加上米希達利恩及連格（Jesse Lingard）等用速度走位及突破衝擊對手及打反擊，不時嘅反擊及突破場面喺上兩任時比較少見。至於防守上，球季初期比較少見嘅前場壓迫，近期亦見多咗，正如對新特蘭一戰普巴就利用前場壓迫造做伊巴入波。

當然曼聯喺不敗期間嘅對手其實唔強，不過趁呢個時間磨合球隊戰術，搵到最適用球員加培養番勝利習慣都係一件好事，不過經過足總盃同聯賽盃後，英超就要回師主場對利物浦，到時先係真正考驗，睇下摩佬對於曼聯嘅調教，係咪真正經得起挑戰，亦會係今年能否入番歐聯，甚至爭英超嘅分水嶺（雖然 6 連勝後仍然排緊第六……）。

（文章純屬作者意見，不代表香港01立場。）