【足球．博評】雞年值得留意嘅星二代
話說洛迪高屋企有三隻馬騮，意思係一家三代都有屬猴嘅人，呢種都算係一種傳承。
講起傳承，球壇講最多當然係父子檔。再講告魯夫父子檔都已經係咸豐年代嘅事，不如趁啱啱踏入雞年，同大家數下有咩有睇頭嘅新．星二代！
文：洛迪高@ 世界波
李華甸奴（Rivaldinho）－ 父：李華度（Rivaldo）
大家記得森巴好波之人，通常都叫XX甸奴，XX度。李華度就慌個世界唔知佢個仔唔好波，直頭改個名叫李華甸奴！好彩呀囝都叫做爭氣，仲同老豆試過同場入波。隨後佢有機會轉投葡萄牙球會博維斯塔，不過佢表現麻麻要重返巴西，不過李華度就想囝囝同佢一樣，可以去意甲搵食，不過21歲仔嘅佢相信未夠實力，所以最近盛傳意乙拉蒂納想借佢，咁都係一個機會嚟嘅！
費達歷高基艾沙（Federico Chiesa）－ 父：基艾沙（Enrico Chiesa）
講起意大利，意甲嘅費倫天拿有意無意之間都有兩個名將之後，一個係意大利前鋒基艾沙之後費達歷高；另一位就係羅馬尼亞前隊長赫傑囝囝伊亞尼斯。
費達歷高最近威水史就係射入老豆前戰友保方大門（雖然睇重播都唔太肯定佢掂到波），19歲人仔，主要司職右翼嘅佢今季不乏上陣機會，聯賽暫時2入球2助攻算是不俗。
伊亞尼斯赫傑（Ianis Hagi）－ 父：赫傑（Gheorghe Hagi）
至於另一名將之後，18歲，同老豆一樣司職進攻中場嘅伊亞尼斯赫傑就仍然主要踢青年軍，但都同樣喺青年聯賽暫有2入球2助攻，都符合位置要求。佢同時做過羅馬尼亞梯隊隊長，以及喺佢老豆執教球會下做過隊長，同佢老豆一樣有領袖風範，佢老豆唔止猛讚個仔未來勁過佢，仲親手將佢送到紫百合！
基奧雲尼施蒙尼 （Giovanni Simeone）－父：施蒙尼（Diego Simeone）
講起意甲，就當然要提下馬德里體育會施蒙尼囝囝基奧雲尼施蒙尼！同佢作為強悍防中嘅老豆唔同，阿仔就做前鋒。佢喺河床及班菲特嘅表現吸引意甲熱那亞出手！今季佢表現都相當唔錯，意甲暫時踢21場都入咗10球！
積斯甸古華特（Justin Kluivert）－ 父：古華特（Patrick Kluivert）
講起前鋒，就要睇下古華特阿仔積斯甸，17歲嘅佢已經代表咗荷蘭U18國家隊嘅佢啱啱先進入一隊，唔知有無機會複製老豆18歲踢歐聯決賽仲入埋波嘅成就呢？
盧卡沙豪域 （Luka Zahovic）－ 父：沙豪域（Zlatko Zahovic）
講完前鋒當然講中場，大家仲記唔記得斯洛文尼亞瀟灑中場沙豪域？佢囝囝踢前鋒，仲已外借返祖國嘅馬里博爾表現唔錯，聯賽上陣14場入10球，嚟緊如無意外佢會返海倫芬。海倫芬近年盛產前鋒，睇下佢下年喺荷蘭會唔會成為斯洛文尼亞新希望！
基斯甸馬甸尼 （Christian Maldini）－父：馬甸尼（Paulo Maldini）
講完中場前鋒，當然到後衛！第一個就係傳奇馬甸尼嘅寶貝仔基斯甸！而家似乎發展不似預期。由AC米蘭青年軍出道，而家去咗第三級別嘅Reggiana，借完到馬爾他聯賽，而家又借咗去意大利第四級聯賽。20歲嘅佢仍然有機會去高級別聯賽，但A米講到明留畀馬甸尼阿仔嘅3號波衫，係壓力定動力？最後會係基斯甸著定其他兄弟著仲未可知：會唔會佢細佬丹尼爾仲有機會上位呢？
父輩出名，後代壓力之大可想而知，而能夠比老豆更出名嘅更係少之又少，除咗係因為壓力，更大原因其實都係因為實力問題。機遇？其實有老父幹都已經叫贏在起跑線上，但同時因為老豆出名家庭富裕，所以星二代踢波動力多係證明自己而唔係搵錢養家，咁去到中途發現力有不逮半途而棄亦屬正常。
講咗咁多星二代，你會發現好多已經出出地名嘅，例如施丹三子已經早登台面，當然實力如何都係要放長雙眼。星二代入面甚少龍門，其實原因都算簡單，因為門將呢個位置較為特殊，唔係話星二代就有啲著數嘅，而且亦唔需要成名早，好似卡斯柏舒米高（Kasper Schmeichel）成名早，但真係證明自己比肩父親，都要等到上年李城奪冠啦。
（文章純屬作者意見，不代表香港01立場。）