盤點有趣足球賭盤　咩都有得玩！

瑟頓聯肥仔門將韋尼梳爾（Wayne Shaw）早前對阿仙奴前大出風頭，仲喺比賽途中食批搶晒Focus，不過最後竟然被揭發可能同搏彩公司有關而要離開球隊，原來事前球隊贊助商開咗個盤話佢會食批。
其實喺球壇入面呢啲奇怪／得意賭盤，等洛迪高同大家介紹返！

文：洛迪高@世界波

你以為邊個入波先，邊位球員比賽會發生咩事同角球大細已經夠有趣？少年你太年輕了，因為外國好多博彩網站，真係你諗到嘅有得賭，你諗唔到嘅，都有。不過記住，未夠18歲唔可以進行賭博，而賭博亦要跟合法途經，同埋沉迷賭博，猶如賭錢落海。

李城奇跡

大家都知道上年李斯特城英超開季嘅奪冠賠率去到1賠5,000，故事最後大家都知，不過大家未必知原來童話會咁樣終結，但上年仲有啲李城賭盤可以畀大家玩埋今季，至少喺雲尼亞里（Claudio Ranieri）被炒後都仲有。以下係幾個上季李城開季時嘅賭盤：

1. 李城英超奪冠後一季雲尼亞里被炒——1賠30,000。雖然而家已成真，但馬後炮咁講，其實呢個奪冠後雲帥被炒唔係無可能；
2. 李城贏英超後一季降班——1賠100,000。如果而家仲係咁，一定好多人狗衝……買10蚊都好啦；
3. 李城贏英超後一季贏歐聯——反正上年都發生李城童話，嚟多次有何不可？反正而家都係16強落後緊西維爾1球啫；
4. 以上3項同時發生——1賠1,000,000——有冇人買咗呢……而家中咗1個先……

世界大賽類

世界盃及歐洲國家盃呢類大賽全世界都望住，當中又點少得博彩公司參一腳？

蘇亞雷斯之咬

蘇亞雷斯（Luis Suarez）喺荷甲試過咬人，去到13年效力利物浦又試過咬車路士守將伊雲洛域（Branislav Ivanovic），一眾博彩公司自然唔會放過開盤機會，有間挪威博彩公司就開出蘇亞雷斯喺14年世界盃會再出口傷人，賠率算熱，1賠175，結果大家都知道啦...有幾多人落咗注？喺歐洲有167位賭仔贏錢。

加斯居尼的眼淚

大家仲記唔記得一代英格蘭天才中場加斯居尼（Paul Gascoigne）？佢喺1990年世界盃四強領到黃牌，就算入決賽都無得出，結果佢淚灑當場，畫面令人動容。喺2010年世界盃時，博彩公司威廉希爾就開出2賠7賠率，注項係有英格蘭球員會重演當時場面。最後英格蘭16強止步，而英國民眾最深刻嘅印象，應該係朗尼（Wayne Rooney）喺球隊於分組賽賽和阿爾及利亞，當住鏡頭諷刺球迷噓佢哋……

值得一提嘅係，作為博彩業巨擘，威廉希爾喺12年歐國盃再度出擊，幾無厘頭地開出1賠4賠率同大家賭喺當屆大賽完結前歐元會大瀉……究竟有幾無聊先走去開盤同買……

球員特別篇

除咗比賽，足球博彩都有唔少針對球員嘅特別項目，唔少包括轉會等，不過亦有一啲再特別啲嘅。

沙比的遠射

話說沙比阿朗素（Xabi Alonso）效力利物浦時，有位球迷喺博彩公司Paddy Power投注200英鎊（約1,906港元），買沙比可以喺自己半場入波，當時賠率係1賠125，博彩公司仲覺得執豆咁執，點知沙比喺足總盃對盧頓聯時就真係入球咁嘅波，令博彩公司要賠成25,000英鎊（約24萬港元）。咁嘅巧合令洛迪高不禁懷疑，落注嗰個有冇同沙比夾埋……

哈利卡尼的入球

哈利卡尼（Harry Kane）作為英軍鋒線新頭牌，天空體育嘅Skybet就設立賭盤買佢未來入球數：

1. 卡尼為熱刺射入267球成為球會入球最多球員；
2. 卡尼射入260球英超入球（不限球會）。

買咗嘅球迷真係唔知幾耐先收到錢，萬一佢選擇外流就仲慘，可能收唔到錢……講起前鋒入波，同行Bet365就關心李城華迪（Jamie Vardy）多啲，佢哋就畀球迷估佢今季入球幾多，中位數係14.5，而家大熱嘅係小過呢個數。

最後又同大家講返李城，自雲帥辭職後，Ladbrokes都有相關投注注項，包括：

1. 李城喺2020年會再拎一次英超冠軍；
2. 2020年前李城會整一個雲尼亞里銅像（1賠2都算幾熱）；
3. 雲尼亞里再教英超球隊等等。

（文章純屬作者意見，不代表香港01立場。）