【傑運選舉．來稿】伍家朗落選好出奇？望望投票機制就會明

點解嘅點解嘅？早幾天網上議論紛紛，皆因傑出運動員選舉得獎名單中未見香港羽毛球「一哥」伍家朗的名字。
可能會有人話「好學唔學，喺度學政府玩小圈子？」咪住咪住，但明明傑運有公眾投票，仲有幸運大抽獎贏手機、電腦，好明顯公平、公正、自high過政府好多喎！
那究竟公眾投票排第3的伍家朗做錯咩，會到頭來8傑不入？

文：喬于洋

上周《01體育》有一篇文章講及曹星如、傅家俊和跳繩隊未能參選傑運原因，當中其實已透露「入閘」要靠「會員制」的提名票，不少網民已經激速嗅到「小圈子」味道。不過伍家朗早就「入閘」，而奧運出戰16強，香港超級賽歷史性封王的成績亮麗，那落選問題出於何處？

《01體育》文章主要講解提名準則，卻未有提及重要的投票機制。傑運準則標明「得票最高之8位運動員獲獎」，當中「獲得票數最高之一位運動員將獲頒星中之星香港傑出運動員大獎」，而選舉將分3組（評審團、本港體育編輯/記者、公眾投票）投票。「喂，咁即係一人一票，高票者當選，又冇阿爺欽點，好似公平過選班長喎！」等等……冇人話3組投票比重係一樣。

評審團 (佔整體投票比重的60%)
本港體育編輯/記者 (佔整體投票比重的20%)
公眾投票 (佔整體投票比重的20%)

20、20、60，又代表什麼？其實好簡單。

比喻有100人參與公眾投票，10個體育記者投票，然後有9個評審，

K先生分別得到50/5/1票，按比例計算，他實質票為0.1/0.1/0.07，共0.27票；

至不過同一時間，F小姐分別得到20/2/4票，實質票為0.04/0.04/0.27，共0.35票，結果0.27:0.35，F小姐完勝。

還是好複雜？如果在一個二人選舉中，就算公眾及記者票低迷，只要評審達半數就好大機會當選。

仲未明？即是在1000人的公眾投票中，要取得當中332票先等於評審的1票，明未？或者又有人會問「點解你要咁無聊用9個評審嚟計？」唔好意思，現實世界傑運只有9個評審。

有趣的是，大會從來只會顯示得獎者獎金數字，如你想知最終票數？諗下好了。

雖然伍家朗已出post安慰返大家，又謙虛表示其他人實至名歸，但心水清的大家或者鬧最勁、最反感的其實是制度的不公義。世界上有樣嘢比「小圈子」更差，佢叫「假民主」。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）