【武術01】夠皮未?可以炒得起證明內地網民對現代搏擊有幾無知

撰文:斷水流大師兄
出版:更新:
「楊氏太極拳傳承人」雷雷與格鬥狂人徐曉冬對戰。 (網上圖片)

好耐無見,唔廢話,只想講下最近個「MMA vs 太極」,證明內地網民、以及一般民眾,喺武術方面嘅無知同落後,呢個係武術界、或者講想普及武術嘅人(例如我)嘅失敗。

另外,因為我認識徐曉冬嘅學生,所以同佢見過面,同大家分享下我所認識嘅徐曉冬。

你練咩Q就勁咩Q

件事其實好簡單,你練咩多就勁咩,練咩少就唔勁咩。如果練泰拳嘅人,每日就打沙包一個鐘,然後去練十二碼四個鐘,你知唔知佢最叻會係咩?低掃?唔係,係射十二碼。

如果你成世都無同人搏擊,你係無可能搏擊叻嘅。就正如一個拳擊手,踢腳唔會叻得過一個泰拳選手一樣,你都無練過、無踢過,你叻咩鬼嘢?

都2017年啦,成天都係衛星,人手一部智能電話,好多人對武術呢方面嘅思想都仲係好落後,存有好多幻想。你推手推得多,就推手叻;你套路打得多,就套路叻;你同人對練得多,就搏擊叻。當中有無關連?實有,但唔多囉,唔好幻想自己用九成九時間自己一個打沙包,同人搏擊會有幾好。

你要喺某種規則下贏,就要針對嗰種規則練習。所有運動都係,包括搏擊運動。2017年啦,呢個道理好難明咩?

「贏就成派威,輸就嗰個人功夫未夠」呢種思維可以幾時完

然後內地好多網民嘅討論都係非常之......點講好呢,落後?不知所謂?

一輸,就嗰個人未到家,代表唔到太極;贏咗,就算幾唔似太極,又話佢有太極內勁乜乜乜,身法有幾太極之類。呢種「勝利拳迷」嘅諗法,只會阻礙門派,以及成個武術圈嘅發展。

你喺某門派學到技術A,到你學另一個門派嘅技術B嘅時候,發現A對B有好影響,呢種事成日都聽到,一D都唔出奇。

大家都係兩隻手兩隻腳,技術上有關連,甚至兩者可以互惠,有幾新奇?其實成個MMA就係呢件事,講技術嘅混合、融和、變化,每每要求「自己門派」只會固步自封。而創新永遠係一門武術有生命力嘅象徵。

但以上嘅討論對於內地網民而然都太過困難同深奧啦,因為佢哋都仲係停喺打機層面去諗:呀龍個就代表少林,呀虎個就武當,佢就乜乜,佢就物物。而贏咗就成個門派威,輸咗就練未到家,籠門任搬。

我就係想問一句,輸有問題咩?一個學你門派嘅人,輸咗就代表你學嘅嘢無價值?你對你學緊嘅武術究竟幾無信心?玻璃心要幾脆,先要東避避西避避,又要搵邊邊個先得?係咪要搵到有人贏,先證明你門派嘅價值?咁如果再輸,又點算?一次過話晒現時無人學得成?二十年前深山公園見到個呀伯就最勁?

唔係傳統武術無技術可用,但有無去試?有無俾時間去適應?有無諗方法進步?

學你門派嘅人輸咗,有咩大不了呀?所有門派都有人輸過㗎啦,一開始UFC,好多立技門派都因為唔識地戰而輸,咁又點,鬧上嗰個人未夠班?唔係, 人地去學、去練、去適應、去進步,因為佢地知道要玩呢個規則,就必須進步,令自己更為完善。同時,如果現時你只練巴西柔術,你喺MMA都無可能走得遠。

適應係要時間,亦有陣痛。你會發現你熟悉嘅嘢唔再合用,你要有勇氣去面對陌生事物,你要改變自己,改變訓練嘅方式,放棄唔岩用嘅嘢,留低岩用嘅嘢。過程雖然痛苦,但呢種事,呢個痛苦嘅過程,唔係就係武術嘅根本咩?

我相信,好多傳統武術入面嘅技術,都可以用於搏擊。但要去試、要去練、要去睇、要去學、要去用,唔係坐喺到講,懷緬過去常陶醉就得。現時有好多師傅都有咁做,去改進自己,保持一個開放嘅心去接受新事物;但有更多嘅師傅因為某D原因,根本無心咁做。

我認識嘅徐曉冬

因為佢學生係我朋友,所以有次去北京嘅時候,佢帶我去過徐曉冬嘅必圖拳館,亦有次喺佢搞嘅拳賽入面同佢傾過計。嗰個拳賽,係佢同其他北京嘅拳館合作搞嘅業餘比賽,業餘比賽呢回事,真係要花好多人力物力、精神時間去做,如果無心一定做唔成。

另外,北京大學個MMA學會,都係佢整出嚟,對於推廣MMA,佢係有下功夫。而佢對太極嘅睇法,因為佢學生都有練太極,所以我相信唔會差得去邊。

不過已經係兩年前嘅事,現時佢點諗我唔知。

Wow ! Old news is so exciting!

(網上圖片)

其實,呢件事洗唔洗講咁耐呀?夠皮未呀?呢種事其實都出現咗好多年㗎啦,柳龍拳件事都已經十年有多啦,俾件事完啦好嘛?

唉,今日係咁多!

(因為近期過咗去武備志幫手,所以少咗喺呢面講嘢,要喺到同博評嘅編輯同讀者朋友講句唔好意思,Sor呀。)

(本文純屬作者意見,不代表香港01立場。)