【曼聯】摩連奴如何重建大換血，令紅魔重返巔峰？
就算上年已經贏過足總盃，今年亦已贏聯賽盃，但由於摩連奴過去嘅奪冠史，曼聯球迷已經有更高期望，所以而家要聯賽爭前四已經唔多滿意，而且經歷過雲帥後，唔少球迷對比賽場面都希望摩連奴能夠令球隊可以不再催眠觀眾。
文：洛迪高@世界波
一朝天子一朝臣喺足球界係永恆不變嘅道理，曼聯喺費格遜（Sir Alex Ferguson）退休後，經歷過莫耶斯（David Moyes）嘅混亂期，雲高爾（Louis van Gaal）嘅稍微穩定期，到而家摩連奴（Jose Mourinho）。就算上年已經贏過足總盃，今年亦已贏聯賽盃，但由於摩連奴過去嘅奪冠史，曼聯球迷已經有更高期望，所以而家要聯賽爭前四已經唔多滿意，而且經歷過雲帥後，唔少球迷對比賽場面都希望摩連奴能夠令球隊可以不再催眠觀眾。
不過摩連奴曾經講過，自己一定唔會賣走由雲高爾放棄嘅迪馬利亞（Angel Di Maria）、小豆靴南迪斯（Javier Hernandez）、韋碧克（Danny Welback），足證佢對於現時陣容都不大滿意，配合今夏盛傳曼聯將會畀摩佬一大筆預算，預期摩連奴會正式喺傳會市場作大幅度買賣，等球隊更能滿足自己戰術要求。
無論摩佬想唔想長留曼聯，摩佬入魔就係要令曼聯能夠盡快重返巔峰，不過曼聯真係需要重建大換血﹖等洛迪高同大家分析下！講明先，洛迪高唔會喺呢篇文章提到而家經常謠傳嘅收購目標，免得被指「想得太多」。
後防
雖然摩連奴嘅「大巴」戰術不太常見，不過無可否認摩連奴多年嚟嘅立命之本，都係防守。縱使現今足球出現越嚟越多球隊使用前場逼搶，但摩連奴似乎並無盲目追隨，依然鍾情於後場防守，因此喺大部份比賽，紅魔都係同費Sir時代差唔多，等對手過半場後再利用球員位置感壓縮空間令對手難以進攻。因此你可以見到今年勞基梳爾（Luke Shaw）因為攻強於守，摩連奴喺考慮兩閘之間嘅攻守後，都會選擇喺右路用上進攻能力極強嘅華倫西亞（Anthony Valencia），而左路就會用上攻守較平衡，甚至防守性更高嘅球員，例如達米安（Matteo Darmian）。可惜摩佬為咗與時並進（事實今季有幾場賽事，紅魔都用上前場逼搶。），相信都要配置番一班可以配合前場逼搶嘅球員，體能極佳嘅拜利（Eric Bertrand Bailly）就係其中一個。
至於兩位英軍國腳鍾斯（Phil Jones）及史摩寧（Chris Smalling）就前途堪憂。史摩寧今季表現唔算突出，而且做錯唔少防守選擇證明佢未必有足夠足球智慧去實行戰術，至於鍾斯本來夠體能同體格，而且可以打右閘十足當年摩佬於車路士嘅愛將伊雲洛域（Branislav Ivanovic），不過由於鍾斯太易傷，如果唔能夠確保健康，最後只會變成雞肋或被清洗。預計摩連奴為咗可以實行高位迫搶，集中力更佳、更健康同體能更勁嘅球員會更受佢青睞，最重要都係夠頭腦可以平衡到攻守，而筆者就相信喺中堅位置會有較大變化。
中場
唔知大家對於天價中場普巴（Paul Pogba）有咩睇法？筆者就認為佢表現唔差嘞。筆者同時相信中場會係今夏曼聯變動較大嘅位置。大家今季有眼見，雖然普巴身價咁高，但旨意佢係中場又要攻又要守九項全能係唔多實際，而家曼聯中場中路可以幫到手嘅除咗安達靴里拉（Ander Herrera）外，就係老將卡域克（Michael Carrick）…
今季普巴喺位置上都變動過唔少次，但效果最好都係叫普巴中場自由人，附近有人幫手掃蕩同派牌，等佢可以專心做盤球上前或做多啲最後一傳及一射。為咗圍繞普巴打造戰術，相信喺中場中方面都要彷倣當時祖雲達斯配置——就係派牌加體力／掃蕩型。同埋今年喺賣走小豬舒韋恩史特加（Bastian Schweinsteiger）後，因傷患及多線作戰令中場中人手突然出現過短缺，究竟摩連奴喺呢方面會用收購嚟解決問題定係多用青訓做輪換陣容都值得研究，不過相信摩佬都係會選擇買多幾個人。
前場
今季曼聯做和波專家，最大原因係於唔少比賽中把握力欠佳，結果一是未能打破缺口，二係入一球後遲遲未能殺死比賽令對手趁機追和，而呢一個唔止係前鋒問題。
先講中場，曼聯需要嘅喺一位踢法直接可傳可射嘅球員，正如馬達（Juan Mata）及米希達利恩（Henrikh Mkhitaryan），但同時亦要有一定防守意識……好多要求﹖相信呢個問題錢解決到嘅。至於筆者就對今季外借去西甲格拉納達，評價唔錯嘅彭利拿（Andreas Pereira）有相當期望了。
前鋒方面，由於伊巴謙莫域（Zlatan Ibrahimovic）重傷未知好番會否續約，摩連奴現時就要提早組新鋒線迎接以後日子。摩佬歷來球隊進攻特色都係以速度取勝，以及由前場球員自行解決問題。除咗上述提到嘅射得又傳得技術又要好嘅中場，前鋒都會要求個人能力夠高可以獨自解決戰鬥嘅球員，如執教國際米蘭時期嘅迪亞高米列圖（Diego Milito）以及伊度奧（Samuel Eto’o），因此新仔拉舒福特（Marcus Rashford）及另一位年輕鋒將馬迪爾（Anthony Martial）相信會多返機會現身鋒線而唔洗屈身邊線，但買前鋒豐富鋒線事在必行。目標人物？筆者講過唔會猜測，不過可以肯定嘅係目標一定係Complete Forward，各項能力兼備兼有比伊巴更強嘅機動性，因此你會見到傳聞曼聯收購嘅前鋒，都具備剛才提到嘅元素及特質。朗尼（Wayne Rooney）呢？哈哈，相信唔少曼聯球迷都已經將佢摒棄於球會計劃之外。
有錢當然唔怕洗，洛迪高只能夠講，今年夏天轉會市場未開始，「傳曼聯」已經出現好多球員，睇怕去到轉會窗一開，真係可以有無限咁多個48小時了。
（文章純屬作者意見，不代表香港01立場。）