【溏心風暴3】許家唔識分莊閒要求多多 火姐親自出手鬥過
撰文：張嘉敏
出版：更新：
黃家嘅人成日畀許家反客為主。
《溏心風暴3》已經播出了十多集，許家同黃家兩家人的紛爭亦愈來愈浮面，好多事都互相看不過眼。其實睇了咁多集都好唔明點解許家的人明明受緊黃家的恩惠，都可以成日聲大大咁同黃家的人爭，連基本感恩的心都無，仲好似是黃家欠了他們咁，總之就係對黃家諸多不滿，一日到黑就只是想在許旺集團爭奪話事權。正如關菊英所講：「完全唔識分莊閒！」真係好離譜。而作為黃家一家之主的夏雨又無用，只會盲撐所謂的恩公，畀人踩到上心口都唔識反抗，所以今晚呢集火姐終於要出手了！
以下含少量劇透，逃生門在此
火姐氹返離家出走嘅二嫂同梁贊。
今集講許家二少Adam（李成昌飾演） 為了想奪回許旺集團行政總裁一職，設局令梁贊（阮兆祥飾演）犯錯，並召來律師Donald（蔣志光飾演）開公司會議，指控梁贊洩流公司機密，Adam直指梁贊不適合再繼續出任CEO。許家大少Alan （李國麟飾演） 於是向黃永正（夏雨飾演）提出由Adam出任CEO，夏雨答應，但黃家上下均反對。
此時火姐 （李司棋飾演） 決定要親自出馬喇，她單拖去跟Alan和Donald談判，為黃家出聲：「開初嘅時候你哋嗰邊做主席，我哋呢邊做CEO，大家都好滿意呢個安排。但係依家你哋嗰邊做CEO喇喎，咁我哋呢邊係咪應該做返主席呢？Balance，兩邊要balance，咁樣先至公平公正吖嘛。依家係我想許大少你讓個主席位畀我坐。」火姐好型呀！
火姐單人匹馬去同Alan談判。
火姐唔似老公咁無用。