【叱咤】《長相廝守》以外仲有好歌 ToNick：希望樂隊遍地開花
撰文：黃浩晉
出版：更新：
樂隊ToNick於昨晚的叱咤頒獎禮上，憑《長相廝守》奪得「叱咤樂壇我最喜愛的歌曲大獎」，主音恆仔、結他手小龜、Bass手Ryan忍不住流下男兒淚，雖然鼓手晨曦笑言自己「冷血」唔會喊，但講出一段愛妻宣言同樣感動台上台下。
ToNick憑《長相廝守》奪得「我最喜愛的歌曲」，他們四人在台上非常激動。(黃國立攝)
呢張靚仔啲！(陳順禎攝)
小龜在台上提到，ToNick由只得四個人表演，一步一步走到叱咤的頒獎台；由蒲窩、蒲吧，一步一步走到三千人的九展，光是這段經歷就知道ToNick有今日的成績得來不易，相信由當時開始支持ToNick的樂迷一樣會有深刻體會。可能大家都經歷過，在人少的場地跳到揈晒頭會俾人當異類，但今時今日睇band show，睇ToNick你唔郁先係異類，這個轉變也證明了有更多人接受樂隊文化。
今時今日你睇band show唔會唔跳啩？(資料圖片)
眨下眼就10年喇，不過網上面仍然有ToNick當時的參賽片段，仲可以睇番「元祖」版本的《What A Sunny Day》，以及改編Pop Punk風格的《The Best Is Yet To Come》，片段還看到林一峰在台下支持。睇完條片，真係明咩叫「青澀」。
除了ToNick、這一年是香港樂隊百花齊放的一年，ToNick希望會有更多人認識樂隊文化：「學Adrian Chan(監製)話齋，遍地開花好緊要，唔係淨係要一兩隊樂隊，大家真係好想樂隊呢個文化更多人去認識，等大家接受，等大家去聽，因為真係每一個音樂人都係好用心去做。(樂隊音樂應該係『文化』而非『潮流』？)冇錯呀！」
希望樂隊音樂可以繼續遍地開花。(資料圖片)