【專訪】林奕匡老婆不計較付出 拒絕金融才俊追求：唔可以辜負佢
林奕匡去年一次過完成求婚、結婚、演唱會幾件人生大事，暫時成了他人生中喊得最多的一年。
回望與太太李靄璣（Rikko）的10年，林奕匡嘴角全程保持上揚，自覺十分幸運，特別是對方曾甘願為他放棄幕前工作，轉做普通文職。「我其實真係無點為佢犧牲，唯一能夠做係保護同埋比名份佢。」
林奕匡去年初推出的《Songs of Love》全以情歌為主，成為人夫之後，推出的《My Taste of Life》較為生活化，風格簡單清新，有洗滌心靈的作用。全碟最有感覺的作品，他說一定是《有淚多好》。「在加拿大舉行婚禮時，在敬茶時已經喊到豬頭咁，雖然Rikko（老婆）屋企人一直都視我如仔一樣，但那一刻有終於等到的感覺，真正成為一家人。」整個婚禮唯一美中不足的是，哥哥和表哥未能參與，幸好有香港場。「我一直希望拍拖10周年結婚，所以去年選擇了8月舉行婚禮，香港揀3月，係因為求婚一周年。」
一開始就Long D
儘管林奕匡以soulmate（靈魂伴侶）形容Rikko，但他們當年卻不是一見鍾情。「04年我參加DJ訓練班時認識她，第一感覺係覺得佢好叻、好自信，而我中文又唔好之餘又薯，後來交換了MSN，愈來愈好傾，07年開始拍拖。」林奕匡雖然最後做唔成DJ，但就得到了Rikko，不過就在戀情剛萌芽時，女友決定回流香港做主播，與大學還沒畢業的林奕匡進行遠距離戀愛。「其實係好大挑戰，甚至到我來香港要做歌手時，她身邊不少朋友都話『你男友入娛樂圈，佢唔紅你又死，佢紅你又死。』但佢真係對我好有信心，一直覺得我會成功，但成功之後會否分開呢？她一直都是抱順其自然的態度。」
隨時隨地都可以放閃
我唔可以辜負佢
Rikko回港後，順利加入無綫並獲得主持《體育世界》以及財經節目的機會，之後更成為無綫首位NBA總決賽直播賽事的女評述員，大好前途，反觀林奕匡當時連唱片公司都未有着落，銀行戶口曾一度得返兩位數。「佢當時有唔少才俊追求，其實大可以騎牛搵馬，但佢反而覺得萬一我真係搵唔到唱片公司，一齊返加拿大都無所謂。佢仲諗埋如果返去搵工，履歷總不能寫artist，於是離開無綫去做寫字樓工。但一個幕前人走去做寫字樓工，工時長之餘，佢著得靚少少返工同事又會有說話，所以那時候她並不是太開心，自己都好難過。」是發憤抑或最後一鋪，反正林奕匡唱出了《高山低谷》，與此同時，他亦鼓勵Rikko再次投身幕前。
「我同佢講做乜都得，所有支出我cover。」雖說在一段感情中，不應去計算哪一方付出較多，但在林奕匡的愛情故事當中，明顯看出Rikko一噸噸的付出，咁林生你又做過乜呢？當事人自己都答唔出。「我10年前已經知道呢個女仔對我咁好，所以唔可以辜負佢……呢段關係對佢其實好唔公平，所以我入行時就算係新人都表明自己有女朋友，出街拍拖從來都唔會避忌。」
走出低谷談何容易
結婚並不是終點
拍拖10年迎來了人生新一頁，林奕匡時刻提醒自己不要忘本。「要維繫一段感情，不是專一就可以，就正如當初佢無放棄我，令我都無放棄自己，結婚唔係終點，而係一個新開始，大家要一齊去增值。」至於生育這個環節，林奕匡說並不太着急。「因為佢中間無咗好多時間，所以我覺得應該要俾返佢。」
攝影：陳順禎
服裝：Fred Perry@ITHK