【流氓大亨】結局係萬梓良親自寫劇本 Do姐:突然好大聲so what

撰文:黃梓恒
出版:更新:

最近《流氓大亨》大受歡迎,事關前日播出萬梓良真打吳啟華的一幕令到勁多人討論,除了覺得那場戲相當迫真,還有更多人想知道究竟真打完點收科?吳啟華嬲到走咗咁之後點算?今日鄭裕玲Do姐就在電台上分享當年的往事,原來除了佢吳啟華,周海媚、曾江和Do姐都試過做受害者。

今日Do姐在電台節目中再次講返《流氓大亨》呢套經典劇。(網上圖片)

Do姐講起萬子這個演員,她說:「呢個演員係非常之認真,佢要一啲反應尤其是打人,佢希望係真啲嘅反應。最近好多人問我一場戲,我呢個記得,喺高等法院門口,嗰次所有女主角都齊晒,我、嘉玲、周海媚,仲有媚姐南紅姐,仲有一個叫吳啟華做奸角。萬子拎起一個垃圾桶一嘢車落吳啟華度,各位如果你係有睇就真係恭喜你,當時我哋係真反應,佢真係拎起嗰個道具垃圾桶車落吳啟華,嚇到我哋啲女人呢,尤其是媚姐,我地捉都捉佢唔住,吳啟華即刻起咗個瘤。」

呢一場戲剩係睇頭都相當吸引。(電視畫面)
+16

「好喇,個場戲完咗,吳啟華一聲唔出跳上㗎車揸走咗,係嬲咗,我哋成班企喺度o晒咀。我個心緊係自私自利喇,我六點鐘起身,入清水灣化妝,去到中環拍得呢兩個鏡頭就俾萬子一個垃圾桶就搞到吳啟華走咗,佢嬲呀,嗰時佢好後生。咁我哋咪望住萬子囉,佢話得㗎喇,呢啲咁嘅細路真係,你等佢冷靜吓,我心諗死喇,咁咪原車返清水灣囉。」

當時仲好後生嘅吳啟華嬲都係好正常。(網上圖片)

返到廠又搵唔到吳啟華,三點鍾又要開廠,好在吳啟華兩點九終於出現,Do姐繼續回憶往事:「嗰陣佢都炆炆地個樣,佢平時都黑口黑面,係而家廿幾歲人先笑得多啲。萬子一見到佢一嘢搭住佢膊頭叫佢出去,傾完一大餐就無事開廠。自此之後大家都好驚,即刻睇返啲劇本有無人會俾萬子打,周海媚係做萬子個妹,但同吳啟華拍拖,之後會俾萬子知道咗就摑佢,大家就話你死喇救你唔到。拍嗰場足足俾萬子打咗幾廿吓,面都紅晒。」

周海媚都中過招。(網上圖片)

「我自己都領過嘢,我唔知係《生命之旅》定《流氓大亨》,佢摑我一巴,我死喇,我拎住個劇本人都震埋。個導演同我講唔使驚,個鏡頭係會打爆個畫面,你塊面會爆晒個畫面,咁隻手離開四吋打過去咪得。我咪即刻通知萬子,佢同我講唔得㗎Dodo,我隻手一定要喺呢度拉弓,如果唔係真,唔會有真實反應,你有乜好講,佢又為套戲,佢覺得係咁樣你點駁返佢呢,結果牙骹都甩埋呀唔係講笑,紅晒塊面。」

【流氓大亨】萬梓良失控真打吳啟華 個種真實感真係拍唔到

【流氓大亨】Do姐拍劇拍電影都要係一姐 後生出名捱得又專業

【流氓大亨】萬梓良認真做戲惹火頭 真打吳啟華搞到要送錶賠罪

【流氓大亨】吳啟華奸得嚟又夠賤 做奸角做足十幾年先洗到底

連Do姐都受罪。(電視畫面)

當然萬子受人尊敬並不只他會打人,其實仲有好多勁嘢,《流氓大亨》個ending係佢寫!Do姐說:「原來佢真係好多本事,有次係講佢飲晒酒醉晒撞到曾江,佢嘔真係可以即刻真嘔,嘔到佢成件西裝都係。仲有《流氓大亨》個ending真係要俾返個credit萬梓良,因為嗰場戲係佢寫,我哋傾過好多ending,因為好多人有反應所以一定要好,咁有次收工已經2am喇,我就緊係返屋企瞓覺,佢就開夜車寫劇本寫到天光。我都唔係點好過,佢六點幾就打俾我,問我可唔可以早啲返,咁我暈鬼咗喺度㗎喇(戲中),無反應,佢話可唔可以聽佢做一次,要返去清水灣,就咁電話得唔得呀?唔得,要現場聽一次。佢真係一個好好嘅演員,聲淚俱下,做得好好,不過好彩佢俾我現場聽一次,如果現場第一次聽,我真係會喊,但我昏迷㗎嘛唔可以有聲。嗰場一開全場靜晒,無人夠膽有聲,連打燈平時好嘈都無聲,佢喺度蘊釀情緒,我就最好喇,喺度瞓渣嘛,真係瞓著咗。突然之間有個人好大聲咁so what,我就知拍緊,成場戲頂多take 2就得咗。」

呢場戲真係做得好好。(電視畫面)