李嘉鬧《包青天》導演唔識尊重演員　武神爆seed：唔係靠大聲靠惡

演員們付出過的努力同汗水當然希望可以獲得觀眾的認同，但最後竟然連名字都沒有印在海報上，又真係講唔過去。TVB「打得之人」的李嘉最近就忙於拍攝劇集《包青天再起風雲》，在劇中飾演王朝嘅佢見到海報有自己個樣但名字卻消失了，令他立即在Facebook出po並表示，「從開拍至今我們也不知一起捱了多少個通宵！我們對白雖然不多，但每集都是有份參與，甚至也有影在宣傳海報上..但為何最後卻連演員名字都沒有印在海報上呢？！你當我們是友情客串？！還是老臨呀？！」一班網友見到後都好火滾，認為TVB好唔尊重佢！其後李嘉接受《香港01》訪問時就透露，「開拍之前佢地打俾我就話今次角色，戲份都好重，影海報有份。其實當時我要搞開武館同餐廳，聽到佢地咁好咪接，所以個陣我都好快咁搞掂武館嘅事。」

李嘉之後續道，「隔無耐佢地又話唔洗影海報，咁都算喇，繼續拍戲。拍到兩個月多啲又話要影。唉，你話乜就乜，咪去影咯。去到琴日我見到微博張海報，無我地嘅名字，點解咁奇怪，係咪溝通出問題呢？」他表示之前都未試過咁，「今次真係半字不提，已經唔去講公唔公平，唔敢同佢講公平，一定唔會有。講真講求財，我錢真係唔缺，求名都唔需要，只係當練下功夫。點解一個基本嘅尊重都無。」

李嘉在訪問中亦講到知道只能夠「呻」兩句就算，「最好笑我係微博見到後罵我有留言，點知個留言之後俾人delete咗。我都唔怪TVB，我知道成個TVB有好多部門，係部門定一個人錯呢究竟？！」他指今次TVB在拍攝上都同以往唔同，「因為佢地想拍到好似內地嘅水準，以前一句對白最多拍一個8-9個take，而家我地係要拍20幾次。人地內地拍劇用一年嘅時間拍，但而家係要4-5個月之內拍完，我覺得係要考慮下整個配套。因為有好多演員都拍到病，係頂硬上。」李嘉指自己雖然是飾演王朝，但好多戲份都要在場，「做包青天同公孫先生個個咪仲辛苦，所以一定要講出黎！」

見到李嘉一次過講咁多事，都睇得出佢嘅無奈，他解釋自己一向不會睇人眼色嘅人，「好似打功夫咁，你打我一拳，我一定還返，係本能反應。因為你唔講只會積累越多，對TVB，演員甚至整個電視行業都唔好，會係惡性循環。」他指出有咁多演員離開TVB都是因為工作環境，「如果係重視演員，至少都要有一個舒服的工作環境，起碼係互相尊重。」原來他其後透露導演有時候都不太尊重演員，「唔係靠大聲靠惡，好多工作人員都唔buy佢呢套，大家都差唔多年紀，應該都有文化水平，希望可以俾啲尊重大家。」

其後Bob接受《香港01》訪問時就指，「好多人都有過呢個經歷， 有我份嘅嘢但無我個樣，以前係電台或者出面做嘢都試過遇到咁個情況，唔係單一事件。呢啲將來回想返都係一個經歷，令到自己成長。」提到李嘉之後都有回應Bob的留言並寫道，「仲要帶住呢種感覺捱多60幾日。」有網友指他們的對話好高質，問到Bob如果遇到這些情況，會否向公司反應？佢就話，「唔需要反應，寧願自己做好啲去到有一日唔洗你出聲，唔出你個名唔出你個樣唔得，我會咁樣去推動同幫自己打氣。」