【開心速遞】KC要死? 網民:無KC我仲睇嚟做乜?

撰文:冼燕珊
出版:更新:

《愛‧回家之開心速遞》中幾對CP都大受歡迎,當中又以KC同Terry呢一對最得觀眾心,甚至被網民封為「最強CP」。不過,飾演KC嘅歐瑞偉日前就喺IG Po咗張相,係Terry喺靈堂雙手捧住KC張車頭相,仲擺出一副喊樣,歐瑞偉寫道:「#開心速遞,284集 (祈求天地放過一對戀人)……別了……」,唔通KC真係要死?

歐瑞偉日前喺IG Po咗張相,係Terry喺靈堂雙捧住KC張車頭相,仲擺出一副喊樣 。(Instagram圖片)

一班粉絲見到呢張相都好大反應,揚言接受唔到KC死:「點解啊!冇KC嘅愛回家仲邊係愛回家!」、「Oh no no no ,冇咗KC等於壯士斷臂!KC & Terry係愛回家系列嘅吉祥物嚟,缺一不可!」、「冇KC冇Helen我仲睇嚟做乜?」,仲有網民勁入戲咁鬧Terry:「舅父乜事?Terry你有冇搞錯?有冇好好照顧舅父㗎?」,另外亦有網民編劇上身,開始估劇情發展:「係咪一人分飾兩角,KC孖生弟弟CK要返嚟幫大佬KC報仇啊?」、「Terry又排緊戲」。

一班網民話接受唔到KC死,仲話KC同Terry係《愛回家》系列嘅吉祥物,缺一不可。(Instagram圖片)

學網民話齋,KC同Terry舅甥情深,呢對CP係《愛回家》系列嘅吉祥物,由第一、二輯《愛回家》開始,兩人已經飾演律師師徒,到第三輯《愛·回家之八時入席》,兩人延續上輯,繼續延續相愛相殺的師徒情深,基情四射。兩人以KC和Terry之名橫跨四輯,佢哋嘅感情可以話係無一對《愛回家》CP及得上的,早已深入民心,所以如果編劇真係要「賜死」KC,真係太無天理。

KC同Terry的感情橫跨四輯《愛回家》,這對CP深入民心。(影片截圖)