【開心速遞】KC同Helen感情最淒美 不斷錯過加失憶橋段似足韓劇
「祈求天父放過一雙戀人……」《愛‧回家之開心速遞》中的KC同Helen好不容易終於知道對方心意，Helen甚至為了KC願意放棄前夫嘅100億遺產，正當佢哋打算排除萬難都要在一起時，KC卻因為先被John(何啟南)打暈，後被一粒魚蛋打中前額陷入昏迷，腦部受到重創，甦醒之後變成一個智商只有5歲嘅小朋友「聰聰」。
眼見即將「有情人終成眷屬」，但KC竟然變成咁，不過Helen都沒有放棄，揚言可以終生照顧聰聰。咁都OK吖，起碼兩個人仲可以喺埋一齊，但編劇又點會咁容易放過佢哋。KC因為同Jenny推撞再次撞親個頭變返正常人，仲喺公司簡布會上口若懸河，非常精靈，正當大家以為呢次真係守得雲開嘅時候，KC竟然忘記晒同Helen嘅感情，仲對佢表現嫌棄，令Helen非常傷心。
KC同Helen嘅感情線可以話係《開心速遞》中最淒美的。由一開始兩人因為寂寞走在一起，做對方的Sex partner，漸漸Helen對KC產生真感情，為咗留喺佢身邊，即使明知對方成日走去溝𡃁妹，只把自己當作後備，佢都啞忍，直至後來KC發現Helen係先佢嘅真愛。
天意弄人，Helen此時被告知前夫留咗100億遺產畀佢，但條件係60歲前唔可以同異性拍拖。KC和Helen起初為了這100億遺產而轉做地下情，奈何無論佢哋去到幾偏僻嘅地方，都逃唔過遺產執行人John佈下嘅線眼。兩人最後也忍痛分手，KC默默地為Helen付出，包括假扮佢嘅鐘點工人照顧佢，與將死嘅富婆司徒獨孤明珠一齊，不惜被佢虐待，被大家看笑話被誤會，只為繼承其50億遺產，可以早日同Helen復合。
KC和Helen即使分開，仍然心繫對方。KC以為只要盡快賺到50億，就有足夠嘅實力和安全感，令Helen放棄100億遺產，返嚟佢身邊。其實佢錯了，對於一個女人來說，一個有情郎比100億更加貴重。但礙於KC永遠只係默默付出，又不斷令Helen產生誤會，以為二人感情已經終結，對佢死心。到近日Helen終於自Terry口中得知KC原來為咗自己犧牲咁多嘢，毅然放棄100億遺產，仲簽埋放棄遺產同意書以示決心。KC聽到Helen嘅決定，即刻衝去搵Helen，期間波折重重，眼見臨門一腳，KC暈倒於Helen屋企樓下。
呢種男女主角不斷錯過嘅劇情，真係同韓劇劇情同出一轍，永遠都係兩個一開始係歡喜冤家，到兩個真係情投意合之時，總要佢哋經歷各種波折。而失憶都可以算係永恆上榜嘅劇情，例如有《天國的階梯》、《冬季戀歌》、《秘密花園》，仲有去年大熱嘅《孤單又燦爛的神——鬼怪》中嘅池恩卓，都係其中一方失憶。不過通常最後都係大團圓結局，所以相信KC同Helen最後都會有情人終成眷屬嘅！