馮盈盈王卓淇曬長腿跳韓國女團舞 袁文傑亂入Freestyle
撰文：冼燕珊
出版：更新：
TVB劇集《果欄中的江湖大嫂》就嚟大結局，劇中演員依然賣力宣傳，其中王卓淇(Erin)日前就喺佢嘅IG放咗條跳舞片，同一班《果欄》演員一齊跳韓國女團TWICE嘅《LIKEY》，提大家記得繼續追劇。
王卓淇同馮盈盈大騷長腿跳舞。(影片截圖)
呢條片分兩部份，第一Part係同小狼女馮盈盈一齊跳，兩個女仔一個著熱褲一個著短裙，大騷長腿，加上動作非常合拍可愛，而且充滿動感，獲得唔少粉絲大讚，仲話想跟住跳埋一份。而另一Part就係同江嘉敏、袁文傑、吳家樂、許家傑一齊跳，不過因為王卓淇比較熟隻舞，所以動作比較流暢，江嘉敏都有努力跟住跳，不過因為唔多熟所以動作比較生硬，但以甜美笑容搭救。而其他人直頭係freestyle亂咁跳，似插科打諢居多，不過氣氛就好歡樂，粉絲都話睇得好開心。
呢場群舞，班男仔雖然亂咁跳，但令人睇得好歡樂。(影片截圖)
王卓淇2014年參加香港小姐奪得亞軍入行，同屆冠軍係邵佩詩，因參選時貌似陳法拉而被媒體稱為「碩士法拉」。Erin 在廣州出世，大學就就讀於廣東外語外貿大學南國商學院，畢業後赴英留學並於西英格蘭大學修讀一年制本科課程。完成學士學位後往英國薩里大學修讀國際商業管理碩士學位。不止學歷有返咁上下，家境都唔錯，據指Erin爸爸於中國內地經營護膚品生意，當年Erin來港參選，仲住喺位於奧運嘅凱帆軒添。