袁偉豪丁父憂含淚留言：你是我心目中最堅強的爸爸

日前剛度過37歲生日嘅袁偉豪，上星期出席活動時顯得憂心忡忡，原來佢為爸爸患癌一事疲於奔命，希望陪住爸爸走過人生最後一段路。呢日佢喺IG上載多張同爸爸嘅照片，宣布袁爸爸終不敵癌魔於5月16日離世，袁偉豪留言道：「樹欲靜而風不止，子欲養而親不在，爸爸永遠懷念您」。

人稱泰哥嘅袁爸爸於7年前確診鼻咽癌，近年更擴散至肝部，從幾張舊照中睇到袁爸爸近年受癌症折磨消瘦不少，喺袁偉豪心目中係「一位為人民服務的好警察，心目中最堅強的爸爸」。近兩年袁偉豪事業起飛JOB接JOB，有傳去年因為工作見唔到嫲嫲最後一面，令佢相當遺憾，故一有時間就會同女友張寶兒，陪伴爸爸左右。

袁偉豪於IG寫上：「樹欲靜而風不止，子欲養而親不在，爸爸永遠懷念您。一位為人民服務的好警察，你是我心目中最堅強的爸爸，辛苦你了﹗不再痛苦，好好休息，放心，媽媽交給我吧。」一字一句盡顯悲痛之情。佢嘅圈中好友胡定欣、岑麗香等都有留言悼念，並叫袁偉豪要振作。