【最熟悉的陌生人.專訪】周祉君透過外傭尋憶:知道自己錯過什麼

撰文:鄺鈺瑩
出版:更新:

外傭被虐又或者外傭虐兒事件近年事有發生,但正所謂人間有愛,ViuTV全新節目《最熟悉的陌生人》搵嚟幾位藝人飛去探訪曾經照顧過佢哋嘅工人姐姐,首集嘅唐寧同李靖筠都係以眼淚作為開場白,節目中唯一一位男嘉賓周祉君相信就唔會有呢啲場面:「我同呢個工人姐姐完全唔熟。」訪問期間,周祉君一直十分輕鬆的分享這次拍攝過程,但最後卻哽咽著說:「原來最熟悉的陌生人的係我阿媽。」

經過今次拍攝,周祉君都幾肯定短時間內唔會再同阿媽合作,因為真係好好好忟,但會考慮同阿媽去旅行,不過問到幾時,佢就笑笑口話自己去旅行都好隨性……(葉志明攝)

周祉君偶爾在港台劇集的casting時遇上了《最熟悉的陌生人》的導演葉文希,雖說自出娘胎以來家中已有外傭,但他卻說不出與「姐姐」的任何回憶,反而周媽媽卻如數家珍一樣,令這次的探訪變成了帶著阿媽去旅行一樣。「我雖然唔可以重溫同姐姐經歷的事,但透過佢可以知道自己在紐西蘭的七年錯過了什麼。」周祉君與妹妹早年先後出國留學,家中只剩下父母,「姐姐」Carman變相填補了兩老的空虛,媽媽由白髮魔女變成了小龍女,也是拜Carman所賜。「佢打理家務之餘,亦安撫到媽媽的不安,我全家、全個屋苑嘅人都好錫佢,我唔知點解。」


 

周祉君帶著媽媽到菲律賓探望在周家工作了12年的carman。

飛抵菲律賓當日,攝影師還在set機,媽媽已經跑了出去與Carman來個大擁抱,那份喜悅對他來說是非常陌生的。「就算我當年喺紐西蘭返嚟,阿媽都無咁興奮,父母係基督徙,生活就係返工放工,朋友可能都係幾個月才見一次,當下更想知Carman有幾吸引。」

周媽媽與Carman感情要好。

周祉君說短短幾日的拍攝,每日都在學習中、每日都從媽媽身上有新發現。「因為未試過同媽媽去旅行,所以都係人生的修練,例如訪問時佢成日都會疊聲,解釋完佢聽又再係咁,又試過話一個人瞓會驚,我話你係基督徒,佢話咁就唔可以驚架咩?都忟架。」看到Carman與媽媽的相處,令周祉君感受到阿媽雖然係阿媽,但阿媽都係女人,唔呻唔代表無心事,Carman在周家工作了12年,成了周媽媽的最大的傾訴對象。

周祉君一直對外傭的概念就是煮飯同打掃,經過今次的《最熟悉的陌生人》的拍攝,對這位沒有血緣的親人有了另一番見解。

「記得有日去幫節目配音,感受最深係最熟悉的陌生人唔係Carman而係我阿媽,每次一講就好篤到我,大家一齊住,但我對佢嘅認知好似好少,我去搵嘅陌生人原來唔只一個而係兩個。」 自知做得唔夠,但問到補救方法時,周祉君說完「打多啲電話」時也心虛了一下,男人嘛,係唔興講出口……「經過呢個trip之後,有時同佢whatsapp感覺得唔妥就會即時打比佢,試過傾足成個鐘,自己亦都開始好實際話佢知遇上了什麼困難,或者係過得好唔好。」