【跳躍生命線】何廣沛入訓練班第一日已想做男一：我唔想浪費時間
如果我在無綫當藝員的，會幾妒忌何廣沛，外型不在講，最重要是命水，入行6年由路人甲到熱播的《跳躍生命線》當第二男主角，同劇的馬神馬德鐘當年捱了10年先有這個位置（《衝上雲霄》，2003年），何廣沛知道自己是幸運的，他很感恩，但不代表他沒有實力，由踏入無綫第一日，他已有很明確的目標：「入去訓練班第一日，公司幫我哋拍咗條片，問我5年後、10年後想點？我當時答5年後我想有人喺街認得我，10年後我想擔正……」心態決定境界，何廣沛距離那個10年目標應該指日可待。
何廣沛出身於小康之家、畢業於加州州立大學會計課程，明乎其實的計數佬，「我由細到大計數好叻，屋企人亦覺得我做會計好，嗰陣我亦覺得好喎，個個行業都要㗎啦，實有嘢做，但我見啲師兄師姐，讀完出嚟，原來仲有排讀㗎，每日好夜收工，啲補鐘夠放成個月假，出嚟做嘢仲要讀書，我就諗...不如揾份自己做得開心㗎啦。」一個計數佬，偏偏選擇一份沒法計算兼風險極高的行業，何廣沛自己都估唔到。
何廣沛出道六年，已是第二男主角，但他自言收入不穩定：「呢行收入唔穩定，你呢套得唔等於下套又得，如果劇集反應唔好，咁連帶嘅外快都會少，所以慢慢嚟啦，希望10年後可以有屬於自己嘅劇集，買樓？先做咗10年計劃先，再做20年嘅計劃啦。」做大台小生，就算已經是劇接劇，原來買樓都要等廿年先有機會想，尤如你同我一樣，何廣沛給人感覺是理性的，連幾多年去到那個位置一早計好，太理性的人其實應該不太適合當這一行。但有些人就是表面理性實質感性……
由如看主角的回憶片段，何廣沛入行到現在共拍了32套劇，他對《跳躍生命線》似乎特別有感覺，「上網睇返首主題曲，見到啲畫面，所有嘢湧晒入個腦，同咁多同事經歷咗四個月，好辛苦但係好美好的時光，嗰段時間可能係我都唔知點過，經常性半條人命咁去拍，而家諗返……都曾經擁有過呢個畫面，而家睇返好感人，最後收視呀，口碑呀，呢啲已經唔重要喇，我諗就係呢種滿足感，係拍劇先畀到我，其他工作揾唔到。」
服裝贊助：Superdry