專訪│演藝事業源於足球場 強尼感激父親傳授基本功:睇嘢闊咗!

撰文:游大東
出版:更新:

人生從來都是一場覺悟之旅。
想起出自英國詭異浪漫公路劇《X你的世界末日》(The End of the F***ing World),第二季開首,便傳來飾演女主角Alyssa的Jessica Barden旁白:「很多時,一些重要時刻,往往在你不為意的時候出現,直至你回頭細想,才發現它有多重大。」(A lot of the time, you don't register the important moments in your life as they happen. You only see that they were important when you look back. )
老土But True。
但用這段對白形容強尼(許博文)的演藝之旅相當貼切。1973年出世,即三年後這位型叔叔便50歲了,但直到近年回望過去才發現,中學時代兩大興趣,成就人生路上兩個最重要篇章。
撰文:游大東
攝影:葉志明、梁碧玲
部份圖片由受訪者提供

回望過去,強尼才明白17年前那次「一時衝動」才能夠成就今天的自己,讓他在娛樂圈找到一個不容易被取代的位置。(梁碧玲攝)

人到中年成為「ViuTV一哥」 一切從官涌石地開始

17年前,強尼是個無名小卒,他在另一個職業界別打拚。「我仲喺間中型建築公司做Project Manager。」機緣巧合之下,強尼加入有線球彩台成為兼職講波佬,三年後離開建築行業,全力開拓演藝事業。17年後的今天,睇《萬遊攻略》,他去克羅地亞土耳其柬埔寨遊埠;睇《地產仔》,他演茶餐廳伙記;睇《有酒今晚吹》,他陪嘉賓一邊飲酒一邊吹水;睇《Chill Club》,見到他演唱蘇永康的《愈吻愈傷心》;11月才播出的《全民造星III》,他已預留檔期再任主持。相比「MIRROR人氣王」姜濤,他才是名副其實的「ViuTV一哥」吧。

「我入呢行係因為有無限可能,我唔知會做啲乜,亦唔知會行咗去邊,嗰種興趣同埋刺激就係喺嗰度嚟。」

官涌球場,是所有事情的起點。「嗰陣時好細個,我諗三、四歲左右,我住佐敦,每逢星期日朝早,就一定係成家人出去飲早茶或者食個早餐,阿媽去官涌街市買餸,老竇就帶我同細佬在官涌球場踢波。」他所說的球場,並非今天在閩街旁邊的佐治五世紀念公園球場,「以前石地(球場)有兩個,大好多,即係而家嘅市政大樓。」

17年前,強尼是個無名小卒,17年後,他已是名副其實的「ViuTV一哥」了。「我入呢行係因為有無限可能,我唔知會做啲乜,亦唔知會行咗去邊,嗰種興趣同埋刺激就係喺嗰度嚟。」(葉志明攝)

老竇許祖賢曾踢甲組 訓練兒子睇波要睇闊啲

強尼的爸爸是前港甲流浪球員許祖賢,與郭家明及黎新祥同期出道,職業踢波跟為興趣落場是兩碼子的事,難怪在兒子眼中,逢禮拜日出現的父子聚會毫不有趣。「係一個訓練!𡃁仔踢波,一定係諗住落球場轆個波出去射龍門,但我老竇唔係,即係Training咁,跑圈先,之後我哋三個只係喺度搓波,唔畀射龍門,佢以前踢過甲組,所以用一個訓練模式同我哋去踢。」

訓練的除了控球技術,還有睇波的角度和分析,現在看來,統統都是基本功。「我嘅足球知識係喺老竇身上學番嚟,細個嗰陣時,一播波就會睇,通常都會覺得,入波先叫好波,但佢教我:『唔係嘅,有陣時射唔入,未必係前鋒渣,可能係個後衛好呢?』咁你咪認識多咗,相比當時同年紀嘅人,我睇波嘅角度亦闊咗,因為佢真係由細踢波踢到大,呢樣嘢對我將來踢波甚至講波,係有好直接嘅影響。」

是的,強尼真的很愛踢波,怎麼說?有得揀,答案自然會出現。那個年代生活簡樸,沒有智能手機沒有SWITCH沒有PS4,撇開睇電視聽電台睇雜誌玩卡牌遊戲那些不說,可以參加的課外活動就只有運動,籃球班、羽毛球班、游泳班。「樣樣都有做,但最後都係鍾意踢波,以前讀男校(新蒲崗天主教伍華中學),唔知點解群埋成班Friend都係鍾意足球,朝朝早,好神心,7點已經返到學校等開鐵閘,一開閘就衝去踢波,上堂前已經成身濕晒,成班人好臭咁上堂。」

文章原本如此描述:「1973年出世,即三年後這位大叔便50歲了。」後來再想,邊有中佬咁貪靚咁姿整?就索性改為「型叔叔」吧。(葉志明攝)

伍華仔大戰工廠阿叔 用西瓜波被鬧爆

年輕人有無限精力,上堂前踢一輪,食午飯時已「叉滿電」,可以繼續踢,而且會趁空檔轉踢新蒲崗的街場,地點是昔日百樂酒樓旁邊,現在已變成百樂護老院。「買個飯盒,扒兩啖,就再踢,日日都係咁。」空間有限,想踢波的人太多,「伍華仔」遇上區內打工的藍領,清一色是大叔,他們不滿「地盤」遭霸佔,遂裝腔作勢:「𡃁仔,走啦!」。

年少氣盛,這些招數怎會有效?「我哋又唔識死,唔肯走,佢有佢哋踢,我有我哋踢,爭持咗一段時間之後,突然間有日班阿叔唔夠人,『喂,𡃁仔,係咪想踢波?同我哋踢!』」留意,強尼這班「伍華仔」踢的是西瓜波,畢竟價錢跟皮球相差很遠,他們獲邀後竟打算連人帶波上陣,遭大叔喝住:「黐線咩?踢番皮波!」由那時開始,強尼開始和成年人切磋球技,踢到中七畢業後,入讀城市大學工程系,先讀高級文憑,再升讀學位課程。

強尼天生熱愛足球,入讀城大後順理成章代表校隊參加大專杯,專踢後衛。認到哪個是他?答案是第二排左邊第一人。(受訪者提供)

踢波踢到代表城大 對手後來變同事

在城大前後五年時間,順理成章加入校隊,踢後衛,曾出戰大專杯,不少在球場上的對手,後來都成為同事。「同期嘅馮嘉奇係HKU(香港大學),我哋喺球場上對過,後來喺Cable講波做過同事,仲有冼家裕,而家都有講波,嗰陣時佢係讀教育學院(現稱香港教育大學),仲有啲唔同學校嘅人,後來都係因為出嚟做嘢之後識番。」

「做嘢」是指由建築轉行做電視之後。強尼承認,當年在城大畢業之後,隨即加入建築行業,沒想過人生會經歷翻天覆地的變化。「當時諗住讀完建築咪出嚟做地盤,畢業後就入去大公司做,第一單就係起志蓮淨院,但因為嗰個年代有『八萬五』,房屋署有好多Project,於是後來公司就將我調咗去專組起政府嘢,就算轉工之後都係咁,起球場、警局、消防局、學校,都係建築署Project,前後夾埋都做咗8年。」

「我諗我真係差唔多10年冇踢波,其實我真係好想踢番!」強尼坦言沒想過自己會有不踢波的一天。「我以為自己會一直踢到老,踢到死,去到六七十歲,都會同班Friend企喺度搓兩腳,冇諗過而家呢個年紀會停晒。」可惜因為之前不斷弄傷腰部和膝蓋,只好無奈放棄。(梁碧玲攝)

做建築八年有車有樓 滿足感蓋不過壓力

打工仔,有邊個唔想升職?強尼入行初時都以為自己會如此,但日子久了,他開始質疑自己。「好似已經睇到將來人生條路係點,當時我已經係Project Manager,月入三萬幾,有車有樓,生活OK,做多幾年,就係Senior Manager,再多幾年資歷,就算到Project Director,再上就係Director,當然唔一定做到,但Career path好清楚。」亦因為建築追求實用安全兼備,細緻是王道,所以相當適合「工作狂」。

「我諗我剛入行做Assistant Engineer,好彩跟着個『大佬』,勁勤力又單身,一個星期有三、四晩都會做到11、12點,咁我又想學嘢,所以每朝都係返早上8點,喺天水圍開工,夜晚跟佢一樣收咁夜,升職又快,同埋以前我係一個好逆來順受嘅人,讀建築咪做建築囉,好正路,但愈做落去就覺得,我唔係真係自發咁勤力,去到做咗8年,我就問自己,係唔係真係咁鍾意而家做緊嘅嘢?」

每一項建築都是集體工程,強尼發現日常工作中,絕大部份時間都是對人不對事,「每日處理人際關係,係多於建築,耐咗就有少少唔係好鍾意嗰種感覺。」當所有事情加起來,得到的滿足感仍不能蓋過壓力、痛苦和奄悶,就是離開的時候了。

因為擔任《全民造星》主持,令強尼曝光率急升,今年11月才播出的《全民造星III》,他已預留檔期再任主持。(資料圖片)

賭波合法化成契機 做冬正日面試做講波佬

又回到2003年。有一天,強尼覺得有種說不出的奄悶,他不想未來30年如一日,適逢當時正值政府通過賭波合法化,有線電視增闢專為賭波而設的球彩台,強尼熱愛踢波,很自然會扭開來看,「命運自選台」在毫無預告的情況下發揮作用。

「我記得8月開台,兩個月之後,有個主持突然間話唔做,喺節目講Bye Bye,然後直接公開招募:『你哋想嚟講波就嚟啦!』我就諗:不如試下啦!因為只係坐喺度諗,其實係冇選擇權,你要做咗嗰樣嘢,真係畀個機會你,你先有得選擇。」

坐言起行,他真的寄求職信去有線,冬至前一天收到電話,話筒傳來一把頗晦氣的聲線:「喂,唔該Johnny Hui!有線電視打嚟,聽日夜晚9點鐘上嚟Interview。」強尼霎時間以此反應:「聽日做冬喎!」對方沒好氣的說:「咁點呀?係咪唔嚟呀?」強尼當時覺得,沒有比追夢更重要,以麻甩佬的溝通方式回答:「嚟囉!」

因為「一時衝動」,那道通往五光十色的演藝之門,就在這段通過程中漸漸打開。很多時,一些重要時刻,往往在你不為意的時候出現,直至你回頭細想,才發現它有多重大。

(強尼專訪二之一)

經過17年的試煉和累積經驗,強尼今天已是多棲藝人,擔任主持、拍戲、拍劇,甚至唱歌。圖為他早前拍攝ViuTV新劇《暖男爸爸》,有幸跟「暴龍哥」鄭中基和「無綫視后」張可頤等猛料之人合作。(資料圖片)
最初加入有線擔任講波佬,後來辮數愈來愈多,更曾與當時仍然叫李嘉馨的李佳芯合作擔任《空間大改造》主持,成為他在有線的代表作。(受訪者提供)

點擊下列圖輯,欣賞更多強尼的幕前演出型佬相:

+7