聖荷西謀殺案︱田蕊妮再演舞台劇仍緊張 未計劃離港發展:好奢侈

撰文:趙允琳
出版:更新:

田蕊妮自從去年宣布不與無綫續約後於4月正式離巢,事隔近一年終於有新作品,在下月一連13場公演的《聖荷西謀殺案》舞台劇中擔任女主角「Ling」。今日(8日)田蕊妮與潘燦良等一眾演員出席《聖荷西謀殺案》舞台劇記者會,透露自己本來打算離開電視圈後出國學演戲,但無奈因疫情關係無法實踐,於是在機緣巧合之下獲編劇莊梅岩、導演甄詠蓓和監製朱仲銘的賞識挑戰演舞台劇,為改變踏出一大步。

(左起)溫玉茹、田蕊妮和潘燦良今日(8日)出席《聖荷西謀殺案》舞台劇記者會。(梁碧玲 攝)

田蕊妮演出舞台劇的經驗不多,僅於2005年與黃凱芹演出過《白蛇.青蛇》,之後都是以拍劇居多,所以事隔16年再踏上舞台令阿田感到非常緊張,由於自己剛剛出道一樣:「係呀!會㗎!企喺台上面唔係一件容易嘅事,無論係做任何一樣嘢,台下面有咁多對眼望住你嘅時候其實正常人都會驚嘅!但我相信我而家係一個成熟嘅演員,同埋都會冇咁驚,無論拍戲定係企喺個台,作為演員都要有自信先可以駕馭得到,而我都係有嘅!」

田蕊妮獲(左起)導演甄詠蓓、編劇莊梅岩和監製朱仲銘的賞識轉型演舞台劇。(梁碧玲 攝)

《聖荷西謀殺案》這套舞台劇於2009年首次公演後大獲好評兼多次在香港和海外進行公演,去年更被改編成同名電影,如今阿田要接劉雅麗和鄭秀文棒演活「Ling」這個角色,她坦言都有少少壓力:「我淨係睇過個劇本,都知有電影版,但我反而專登唔想去睇(電影),因為我都驚我自己會有比較,所以我想以最輕鬆嘅狀態用我嘅感覺去演呢個角色。」

劉雅麗演出的版本堪稱經典,再加上鄭秀文憑電影奪《中美電影節》最佳女主角,又提名「金像獎」影后,但阿田坦言不怕外界拿來與兩位演員作比較:「觀眾去睇一套戲去作出比較都係一件好事嚟,但係喺我嘅角度嚟講,唔同演員演繹一個角色都會有唔同嘅角度,就好似畫家畫同一幅畫都會有唔同嘅感覺一樣。」

田蕊妮離巢後第一部作品,就是擔任舞台劇女主角。(梁碧玲 攝)

田蕊妮表示自從老公杜汶澤建立網上傳媒平台後,自己亦開始轉型退居做幕後:「我都係做開演員演好個角色、諗下造型,甚至乎連諗造型都唔需要,但係當你要做監製或諗節目,要點樣Deliver(傳遞)嗰條橋出嚟呢?同埋要點樣同同事相處,對於我嚟講,所有嘢都係新嘅嘗試!我覺得都幾有趣,真係活到老學到老!」她坦言自己不怕遇到困難,但適當的時候都會向老公尋求幫助:「我哋面對事情嘅處理方法都有自己嘅特色,但係遇着一啲好困難嘅事情都會問佢。我覺得同演戲一樣,你可能有一啲困難嘅經歷,就會慢慢行到一條自己嘅路,每一樣新嘅嘢,你都要盡量去嘗試做,中間可能會有一啲體會,又係一件新鮮嘅事。」

田蕊妮希望可以自己行出自己的路。(梁碧玲 攝)

阿田笑言雖然暫時未能實踐出國讀演戲的願望,但自己亦暫時未有離開香港發展或移民的打算:「我諗對於依家嘅人嚟講,計劃係一件好奢侈嘅事情,我覺得最緊要就係行好今時今日呢一步先啦!」

點擊觀看更多現場精彩照片:

+10