十萬噸情緣︱歐錦棠自爆當年拍到萌輕生念頭:個個以為上郵輪好歎

撰文:陳栢宇
出版:更新:

無綫(TVB)劇集《十萬噸情緣》(2003)最近在翡翠台深宵時段重播,劇集除了有兩大主角張家輝和張可頤火花不斷,一眾配角亦非常出色,當中包括飾演「劉華」的歐錦棠。劇中,「Jason/田偉晨」張家輝將前妻「Yama/方雅文」張可頤介紹給歐錦棠,而歐錦棠竟然心謀不軌有意騙財騙色,奸到出汁。

歐錦棠在《十萬噸情緣》中飾演奸角「劉華」。(電視畫面)

周二(25/5),歐錦棠亦有在社交網站出Post大談拍攝《十萬噸情緣》的趣事,更指這次經歷簡直是辛苦到想自殺:「個個以為拍呢套劇,可以上超級豪華郵輪橫渡太平洋,去美國實景拍攝,一定好歎,其他人我唔知,我淨係記得,我呢世仔唯一一次想自殺,就係呢㗎郵輪上面,因為,我由細到大,都係唔坐得船,大家以為一艘十萬噸郵輪,唔係應該好穩定嗎?Oh , I’m so sorry,出到公海,話知你航空母艦,一樣拋到炒飛天通菜咁。喺船上面兩星期,我未有一日係可以行一條直路,而我,亦已經冇嘢可以再嘔。」他又指自己雖然嚴重暈浪、面青口唇白,但一Roll便做到若無其事,非常有趣。

點擊下圖觀看棠哥在Facebook分享的靚相,原來棠哥當年有三點式美女相伴:

+8

陳秀珠教解暈浪方法

棠哥接受《香港01》訪問時亦有透露更多細節,他說:「有同事話上到大船就會好定,風平浪靜好多,但遇到八級巨浪都係好拋,試過一嘢拋我落床。(食暈浪丸冇用?)零作用,咩都幫唔到手,明明已經嘔到冇晒嘢,但係個胃都係Keep住反,瞓極都瞓唔到,好在陳秀珠後期教我搵啲薑磨粉沖茶飲先舒服番。」

棠哥更笑指他在美國洛杉磯落船時立即親吻大地:「因為之前真係太辛苦,有一晚辛苦到想跳落海!(拍其他劇打死唔上船?)啊,試過拍《誰家灶頭無煙火》時,劇組Book咗架船去南丫島,嘔到燈光師都笑我塊面青晒。(唔搭得船,所以連澳門都冇去過?)咁又唔係,次次去澳門都好神奇,一上船就瞓,一瞓醒就落得船。」

十萬噸情緣|李思蓓原來係「骨精」 16年前做開按摩店做女強人

+27