Jer、Edan@MIRROR搞笑形象獲導演大讚:完全冇指示佢哋要拋開偶包

撰文:劉傳謙
出版:更新:

MIRROR近日推出以百老匯式曲風創作的新歌《BOSS》,其中填詞人林寶早前接受《香港01》訪問時透露,早在聽完Demo後,經理人花姐已經想到一個以百老匯舞台劇出發的MV雛形。花姐在這次MV再次邀請Tin Po和Faith Ma執導,繼前作《WARRIOR》後再度合作,其中Tin Po接受《香港01》訪問時,認同新歌聽起來有種百老匯歌舞劇的感覺,於是大膽提出在迪士尼拍攝,沒想到最後能如願成事,趁樂園關閉後通宵進行。

《BOSS》邀得Tin Po和Faith Ma執導,繼《WARRIOR》後再度擔任MIRROR MV導演。(Tin PoInstagram圖片)

林寶首為MIRROR填詞 揭花姐盼新歌MV主導:係放低偶像包袱嘅態度

MIRROR新歌幫鏡粉將職場壓力變動力 Edan夥Jer放低偶包超爆笑

獲花姐信任放手處理

只是相比上次《WARRIOR》的拍攝過程,Tin Po認為花姐給予製作團隊更大信任,壓力亦因而稍微減輕:「上次《WARRIOR》係第一次同花姐合作,嗰陣都有一定嘅壓力,成個花姐大大個坐係隔離睇住你剪片。不過今次《BOSS》反而花姐冇乜點理過我哋,我哋有一晚喺電話sell完橋,佢交低咗句:『一定要拍得靚。』就收咗線,跟手就放哂手比我哋去處理個MV,好多謝佢嘅信任。」

據Tin Po所指,相比上次《WARRIOR》的合作,這次花姐給予製作團隊更大信任,也特意應自己所想,安排於迪士尼拍攝。(資料圖片)

Lokman因檔期壓軸登場

與過往MIRROR的MV不同,這次Tin Po加插一段故事線,由其中11位成員分析有型明星組、百厭助手組,及出盡全力搶鏡頭的台燈聲四人組,而他們心中都十分敬佩由隊長Lokman(楊樂文)飾演的舞台巨星,最後11子更有機會與偶像同台演出。Tin Po坦言這次減少跳舞鏡頭,除希望在製作上尋求新突破,亦與成員私底下的形象有關:「我哋都知MIRROR除咗平時好有型嘅形象以外,私底下亦都好可愛,好似十二個大細路咁,玩起上嚟就失哂控。如果加上充滿玩味嘅劇情,究竟會引伸啲乜嘢嘅化學作用出嚟?」他也為這次Lokman要到最後一刻才出現解畫:「原本條故事線係包含哂12子,都各自有一個職位,但因為檔期嘅問題,要拍攝前兩晚我哋先得知Lokman要拍攝當晚嘅2630(指開拍翌日凌晨兩點半)先到現場,唯有即時扭橋,將Lokman變成傳說中嘅super star,令佢可以最後壓軸出場,而條故事線又合理。」

Lokman因為工作檔期問題,需要以超級巨星身份壓軸登場。(MV截圖)

Edan、Jer拋開偶像包袱加戲

MV中Edan(呂爵安)和Jer(柳應廷)的面部表情豐富,他們願意放下偶像包袱的搞笑形象深受歌迷喜愛。Tin Po也認為這次與二人的合作相當有趣:「我哋係完全冇指示佢哋嘅角色要拋開偶包,而我哋睇熒幕嘅時候,佢哋自己不停加戲比自己,喺成個拍攝過程入面聽得最多嘅係『如果我哋咁樣跑入嚟好唔好?』、『我哋夾咗啲嘢,做埋比你睇。』,同埋我哋問番佢:『你哋咁樣,花姐會唔會唔比我哋出街?』」不過要MIRROR維持在愉快氣氛下拍攝,他坦言是最大難關:「難嘅地方係要營造一個咁開心嘅百老滙式MV,真係好靠演員去即場撞到啲新嘢出嚟,而維持拍攝氣氛亦都係比較困難嘅事情,但係mirror嘅成員都好好,建立咗好多唔同嘅角色特質比大家睇到。」至於中段Frankie(陳瑞輝)更要用毛巾打姜濤,會否怕MV推出後「姜糖」不滿?Tin Po直言:「我哋都相信皮皮嘅靚仔同可愛會令其他人原諒佢。」

Tin Po認為Edan和Jer相當有趣,原來他從未要求二人拋開偶像包袱。(MV拍攝)

著重鏡頭分配:拍緊嘅係MIRROR唔係個體

向來每位成員在MV的鏡頭分配都成為「鏡粉」最關注的地方,而這次每位成員都有大頭畫面,令歌迷相當滿意。Tin Po直言這次加插故事線,減少咪嘴鏡頭,確保每位成員在鏡頭前都有發揮空間:「其實鏡頭分佈同角色嘅安排上亦有關係,我哋將唔同成員因應佢哋本身各自嘅特性安排係不同嘅角色上,確保到每一個人都會有佢可發揮嘅地方。亦都因為呢歌MV比較少咪嘴嘅畫面,都方便咗我哋去安排每一個人嘅出鏡次數。最大嘅理念係,我哋想話比觀眾知,我哋拍緊嘅係MIRROR,係12個人組成嘅團體,而唔係個體,所以係好多鏡頭上我哋都盡能力將所有人包括在內。」

在角色設定得宜下,MIRROR成員都得到發揮空間。(MV截圖)

為求效果要求MIRROR跳足10次

MV中的跳舞鏡頭同樣值得研究,Tin Po透露每次MIRROR需要跳足8-10次,才能完成一整段跳舞鏡頭:「每次轉唔同嘅機位去做返相對應氛圍同速度感,而我哋每次roll機大部分時間都會用3部機同時拍攝,除非有啲特別嘅音質同舞步,我哋有諗法想特別設計,就會單機進行。」被問到哪位成員較為出眾,他向觀眾推介過往有跳拉丁舞經驗的Tiger(邱傲然):「其實我哋拍MIRROR嘅呢兩次,見到嘅都係佢哋會一齊記舞步。不過呢次我會覺得Tiger本身嘅身體質素加上以往跳拉丁舞嘅底,跳《BOSS》呢隻舞嘅時候個效果會特別出眾啲,極力欣賞。」

Tin Po指每次拍攝跳舞鏡頭時,需要MIRROR跳約8-10次。(MV截圖)

點擊圖輯,重溫MV精彩鏡頭:

+67